Марко 2 - Нов превод на Новиот Завет 2023

Исус исцелува неподвижен човек

¹ По неколку дена, Тој повторно дојде во Капернаум; и се расчу дека е во куќата.

² Веднаш се собраа мнозина, така што немаше место ни пред вратата; а Тој им го проповедаше словото.

³ И дојдоа кај Него со еден неподвижен, кого го носеа четворица;

⁴ па, бидејќи не можеа да пријдат до Него од народот, го открија и го пробија покривот од куќата, каде што беше Тој, и ја спуштија постелата, на која лежеше неподвижниот.

⁵ А Исус, гледајќи ја нивната вера, му рече на неподвижниот: „Синко, ти се простуваат гревовите!“

⁶ Таму седеа некои од книжниците и си помислија во своите срца:

⁷ „Зошто Овој такви хули изговара?! Кој може да простува гревови, освен единиот Бог?“

⁸ Исус веднаш дозна со Својот дух дека тие така мислат во себе, па им ре­че: „Зошто го помислувате тоа во своите срца?

⁹ Што е полесно – да му кажам на неподвижниот: ’Ти се простуваат гре­во­ви­те‘, или да кажам: ’Стани, земи си ја пос­телата и оди‘?

¹⁰ Но за да знаете дека Синот Чо­веч­ки има власт да проштева гревови на земјата“ – му рече на неподвижниот –

¹¹ „Тебе ти велам: стани, земи си ја пос­телата и оди си дома!“

¹² И тој веднаш стана, па, штом ја зеде постелата, излезе пред сите – така што сите се восхитуваа и Го славеа Бо­га, велејќи: „Никогаш вакво нешто не сме виделе!“

Исус го повикува Левиј и ги прифаќа грешниците

¹³ И Исус повторно излезе покрај морето, и сиот народ доаѓаше кај Него, и Тој ги поучуваше.

¹⁴ И минувајќи, го виде Левиј Ал­феев, кој седеше на местото за прибирање данок, и му рече: „Врви по Мене!“ И тој стана и тргна по Него.

¹⁵ А кога Исус седеше на трпезата во неговата куќа, заедно со Него седеа и Неговите ученици и многу даночници и грешници; зашто тие беа мно­зи­на и врвеа по Него.

¹⁶ Книжниците и фарисеите, штом Го видоа како јаде со даночници и греш­ници, им рекоа на Не­го­вите ученици: „Зошто Тој јаде и пие со даночници и со грешници?“

¹⁷ Кога го чу тоа Исус, им рече: „Здравите немаат потреба од лекар, ту­ку болните. Не сум дошол да ги пови­кам праведниците, туку грешниците на покајание.“

За постот. Старото и новото

¹⁸ Учениците на Јован и на фарисеите постеа. И дојдоа некои, па Му велеа: „Зошто учениците на Јован и на фари­се­ите постат, а Твоите ученици не пос­тат?“

¹⁹ Исус им рече: „Зар можат свато­ви­те да постат кога младоженецот е со нив!? Додека е со нив младоженецот, тие не можат да постат;

²⁰ но ќе дојдат денови, кога ќе им го одземат младоженецот и тогаш, во тие денови, и тие ќе постат.

²¹ Никој не крпи ново парче ткаенина врз стара облека; инаку, нејзиното ново парче ќе се откине од старото и отворот ќе биде уште поголем.

²² И никој не става ново вино во стари мевови; инаку, новото вино ќе ги расце­пи мевовите и виното ќе истече, а ме­во­вите ќе се упропастат; туку ново вино се става во нови мевови.“

За саботниот ден

²³ И се случи во саботен ден да ми­нува преку нивите, и врвејќи, Неговите ученици почнаа да кинат класје.

²⁴ А фарисеите Му рекоа: „Гледај, зошто го прават во сабота тоа што не е допуштено?“

²⁵ Но Тој им рече: „Зар никогаш не сте читале што направи Давид, кога имаше потреба и ог­ладне тој и оние што беа со него?

²⁶ Како, во вре­мето на првосвештеникот Авијатар, влезе во Божјиот дом и ги изеде лебовите на предложението, што не смееше да ги јаде никој друг освен свештениците, па им даде и на оние што беа со него!“

²⁷ Потоа продолжи: „Саботата е соз­да­дена за човекот, а не човекот за сабо­та­та.

²⁸ Па така, Синот Човечки е господар и на саботата.“