Јаков 4 - Нов превод на Новиот Завет 2023

Против неслогата

¹ Од каде се борбите и расправиите меѓу вас? Зар не од вашите сладострастија, што војуваат во вашите органи?

² Посакувате и немате; убивате и завидувате, и не можете да добиете; се борите и војувате, а немате, бидејќи не барате.

³ А и кога барате, не добивате, зашто лошо барате, за да го трошите на вашите сладострастија.

⁴ Прељубници и прељубнички, не знаете ли дека пријателството со светот е непријателство со Бога? Оној што сака да му е пријател на светот, Му станува непријател на Бога.

⁵ Или, пак, мислите дека Писмото напразно вели: „Тој со ревност го љуби духот што го вселил во нас.“

⁶ Но Тој дава поголема благодат; за­тоа е речено: „Бог се противи на горде­ли­вите, а на смирените им дава благодат.“

⁷ Па затоа, покорете Му се на Бога; а спротивставете му се на ѓаволот, и тој ќе побегне од вас.

⁸ Приближете се кон Бога, и Тој ќе се приближи кон вас; исчистете ги рацете, вие грешните, осветете ги своите срца, вие колебливите!

⁹ Тагувајте, плачете и липај­те: вашата смеа нека се претвори во плач, а радоста во тага!

¹⁰ Понизете се пред Господ и Тој ќе ве воздигне!

Кој си ти да го судиш ближниот?

¹¹ Не клеветете се еден со друг, браќа: зашто, кој го клевети својот брат или го суди, тој го клевети Законот и го суди Законот. А ако, пак, го судиш Законот, тогаш ти не си извршител на Законот, туку судија.

¹² Еден е Законодавецот и Судијата, Кој може да спаси и да погуби: а кој си ти да му судиш на другиот?

Лоша самодоверба

¹³ Слушајте сега вие, кои велите: „Денес или утре ќе одиме во оној град и таму ќе останеме една година, ќе тр­гуваме и ќе спечалиме“,

¹⁴ а не знаете што ќе стане ут­ре. Што е вашиот живот? Тој е пареа, која се појавува за кратко време, па ис­чезнува.

¹⁵ Место да велите: „Ако Господ сака да бидеме живи, ќе го направиме и ова и тоа.“

¹⁶ А сега се фалите со својата надменост. Секоја таква фалба е зла.

¹⁷ И така, ако некој знае да прави добро, а не го прави, тој прави грев.