Јаков 3 - Нов превод на Новиот Завет 2023

Внимавај на јазикот

¹ Браќа мои, не станувајте мнозина учители, зашто знаете дека ќе добиеме поголемо осудување.

² Сите ние многу грешиме. А ако некој во зборови не греши, тој е совршен маж, способен да го заузда и целото тело.

³ Ете, кога на коњите им ставиме узда на устите, за да ни се покоруваат, тогаш управуваме со целото нивно тело.

⁴ Па, ете, и корабите, иако се навистина големи и силно гонети од бурни ветрови, со мало кормило се управуваат онаму каде што кормиларот сака.

⁵ Па така, и јазикот е мал орган, но се фали со големи работи. Ете, мал оган, а колку голема шума запалува;

⁶ и јазикот – светот на неправдата – е оган; јазикот е така поставен меѓу нашите органи, што го осквернува целото тело и го разгорува течението на животот, а тој самиот, пак, е запален од пеколот.

⁷ Секаков вид ѕверови и птици, влекачи и морски животни, се скротува и се припитомува од човечкиот род,

⁸ но јазикот, тоа зло што не мирува, полно со смрто­носен отров, никој од луѓето не може да го скроти.

⁹ Со него Го благословуваме Бога и Отецот и со него ги колнеме луѓето создадени според Божјото подобие.

¹⁰ Од истата уста излегува и благослов и клетва. Не треба, браќа мои, тоа така да биде.

¹¹ Испушта ли изворот од истиот отвор слатка и горчлива вода?

¹² Може ли, браќа мои, смоквата да раѓа маслинки, или лозата смокви? Та­ка, од ниеден извор не извира и солена и слатка вода.

Мудроста озгора и земната мудрост

¹³ Кој е меѓу вас мудар и разумен? Преку доброто однесување нека ги покаже своите дела во кротоста на мудроста.

¹⁴ Но, ако во своите срца имате гор­члива завист и себичност, не фалете се и не лажете против вистината:

¹⁵ тоа не е мудрост која слегува одозгора, туку земна, душевна, демонска;

¹⁶ бидејќи, каде што има завист и себичност, таму има безредие и сѐ е лошо.

¹⁷ А мудроста што е озгора, најнапред е чиста, а потоа мирна, кротка, спремна да послуша, полна со милост и добри пло­дови, непристрасна и нелицемерна.

¹⁸ Плодот, пак, на правдата во мир се сее од миротворците.