Јаков 2 - Нов превод на Новиот Завет 2023

Верата е непристрасна

¹ Браќа мои, држете се за верата во Исус Христос, нашиот Господ на славата, без да бидете пристрасни.

² Зашто, ако во вашето собрание влезе човек со златен прстен и раскошни алишта, а влезе и сиромав во валкани алишта,

³ па се загледате во оној што носи раскошни алишта и му речете: „Ти седни овде на убаво место!“, а на сиромашниот му ре­чете: „Ти стој таму!“, или: „Седни овде, крај моето подножје!“,

⁴ зарем со тоа не правите разлика помеѓу нив и не станувате ли пристрасни судии?

⁵ Слушнете, возљубени мои браќа: не ги избра ли Бог сиромашните од овој свет за да бидат богати во верата и наследници на царството, ветено од Него на оние кои Го љубат?

⁶ А вие го посрамивте сиромавиот! Нели богатите ве угнетуваат и ве влечат по судови?

⁷ Нели тие хулат на вашето добро име, со кое се нарекувате?

⁸ Ако го исполнувате царскиот закон според Писмото: „Возљуби го ближниот како себеси“ – добро правите.

⁹ Но, ако сте пристрасни, пра­вите грев и Законот ве осудува како прес­тапници.

¹⁰ Зашто оној што го запазил целиот Закон, а згрешил само во едно, бидува виновен за сѐ.

¹¹ Бидејќи Оној што рекол: „Не прави прељуба!“, рекол и: „Не убивај!“ Ако, пак, не вршиш прељуба, а убиеш, стануваш престапник на Законот.

¹² Така зборувајте и така постапувајте, како луѓе што ќе бидат судени според за­ко­нот на слободата.

¹³ Зашто судот ќе биде безмилосен кон оној кој не покажува милост. Милоста торжествува над судот.

Без дела верата е мртва

¹⁴ Каква е ползата, браќа мои, ако некој рече дека има вера, а нема дела? Може ли таквата вера да го спаси?

¹⁵ Ако некој брат или некоја сестра се голи и секој ден страдаат за храна,

¹⁶ па некој од вас им рече: „Одете си со мир, згрејте се и наситете се!“, а не им го даде она што е потребно за телото – каква е ползата од тоа?

¹⁷ Така е и со верата, ако нема дела, сама по себе е мртва.

¹⁸ Но може некој да рече: „Ти имаш вера, а јас имам дела“. Покажи ми ја својата вера без дела, а јас преку моите дела ќе ти ја покажам мојата вера.

¹⁹ Ти веруваш дека Бог е еден – добро правиш; но и демоните веруваат и треперат.

²⁰ Дали сакаш да разбереш, о суетен човеку, дека верата без дела е мртва?

²¹ Нели со дела беше оправдан нашиот татко Авра­ам, откако врз жрт­веникот го положи својот син Исак?

²² Гледаш ли дека неговата вера содејствуваше заедно со неговите дела, и дека преку делата, верата се усовршуваше?

²³ И се исполни Писмото, кое вели: „Авраам Му поверува на Бога, и тоа му се сметаше за праведност“, и тој се на­рече Божји пријател.

²⁴ Гледате дека човекот се оправдува со дела, а не само со вера.

²⁵ Исто така, зарем со дела не се оправда и блудницата Раав, кога ги прими из­ви­дувачите и ги изведе по друг пат?

²⁶ Бидејќи, како што телото без дух е мртво, така и верата без дела е мртва.