Евреите 8 - Нов превод на Новиот Завет 2023

Исус е нашиот Првосвештеник

¹ А најважното од ова што го зборува­ме е дека имаме таков Прво­свештеник, Кој седна од десната страна на престолот на Величието на небесата,

² и е служител на светилиштето и на вистинската скинија, која ја постави Господ, а не човек.

³ Бидејќи секој првосвештеник се поставува за да принесува дарови и жртви; затоа беше потребно и Тој да има што да принесе.

⁴ Зашто, ако Тој беше на земјата, не би бил ни свештеник, зашто има свеш­теници што принесуваат дарови според Законот

⁵ и му служат на она што е само слика и сенка на небесните работи, како што му беше укажано на Мојсеј од Бога, кога ја подигаше ски­нијата: „Гледај, рече, да направиш сѐ според образецот, што ти беше пока­жан на гората.“

⁶ А сега Тој доби толку подобра служба, колку што и заветот на којшто е посредник е подобар, зашто е утврден врз подобри ветувања.

Промена на заветот

⁷ Зашто, ако првиот завет беше без недостаток, тогаш немаше да има простор за втор.

⁸ Но, укорувајќи ги, вели: „Ете доаѓаат денови, вели Господ, и ќе склучам нов завет со Изра­илевиот дом и со Јудиниот дом,

⁹ но не таков завет каков што склучив со нивните татковци во денот, кога ги фатив за рака за да ги изведам од египетската земја, – зашто тие не останаа во Мојот завет и Јас ги оставив, вели Господ.

¹⁰ Бидејќи ова е заветот што ќе му го дадам на Израилевиот дом во оние денови, вели Господ: ќе ги врежам Своите закони во нивните мисли, и на нивните срца ќе ги напишам, и ќе бидам нивен Бог, а тие ќе бидат Мој народ.

¹¹ И никој веќе нема да го учи својот ближен, и никој својот брат, велејќи: ’Познај Го Господ‘, зашто сите, од мал до го­лем меѓу нив, ќе Ме знаат,

¹² бидејќи ќе бидам милостив кон нивните неправди, а за нивните гревови и без­за­конијата нема веќе да си спомнувам.“

¹³ А кога вели „нов завет“, првиот го прогласува за застарен; а она што е изветвено и остарено, е близу до исчезнување.