Евреите 7 - Нов превод на Новиот Завет 2023

Свештеникот Мелхиседек

¹ Зашто овој Мелхиседек, цар салимски, свештеник на Севишниот Бог, кој го пресретна Авраам, кога овој се враќаше од победата над царевите, и го благослови,

² и кому Авраам му даде десеток од сѐ, – тој по значењето на неговото име е прво цар на правдата, а потоа и цар на Салим, односно цар на мирот.

³ Без татко, без мајка, без родословие, немајќи ниту почеток на деновите, ниту крај на жи­вотот и како подобен на Синот Божји, тој останува свеш­теник засекогаш.

⁴ Видете колку е велик оној кому патријархот Авраам му даде десеток од најдобриот плен!

⁵ Оние од Левиевите синови, што примаат свештенство, имаат заповед по Законот да земаат десеток од народот, односно од своите браќа, иако и тие произлегле од Авраамовите бедра.

⁶ Но тој, кој не му припаѓаше на нивниот род, зеде десеток од Авраам и го благослови оној што беше примил ветувања.

⁷ А неоспорно е дека помалиот се благословува од поголе­ми­от.

⁸ Така, овде смртни луѓе земаат десетоци, а таму – Оној, за Кого има све­доштво дека е жив.

⁹ И, така да речам, Левиј, кој прима десеток, и сам даде десеток преку Авраам,

¹⁰ бидејќи уште беше во бедрата на својот татко кога Мелхиседек го сретна.

¹¹ Па така, ако совршенство можеше да се постигне преку левитското свеш­тенство, бидејќи врз основа на него на­ро­дот доби Закон, тогаш зошто беше потребно да се воздигне друг свештеник, по чинот Мелхиседеков, и да не се нарекува по чинот Аронов?

¹² Зашто, ако се промени свештенството, тогаш се јавува потреба да се измени и Законот.

¹³ А Оној за Кого се зборува ова, му припаѓа на друго племе, од кое никој не беше пристапувал до жртвеникот;

¹⁴ зашто е познато дека нашиот Господ произлезе од Јуда, а за свештенството од ова племе Мојсеј ништо не рекол.

Друг свештеник како Мелхиседек

¹⁵ Тоа станува уште појасно кога се воздига друг свештеник, сличен на Мелхиседек,

¹⁶ Кој станал таков не по силата на те­лесната заповед, туку по силата на неуништливиот живот.

¹⁷ Бидејќи е посведочено: „Ти си свештеник довека, по чинот Мелхиседеков.“

¹⁸ А поранешната заповед се укинува поради нејзината слабост и бесполезност,

¹⁹ зашто Законот ништо не доведе до совршенство, па се воведува подобра на­деж, преку која се приближуваме до Бога.

²⁰ Тоа беше потврдено со заклетва. Зашто оние беа станале свештеници без заклетва,

²¹ а Тој – со заклетва, преку Оној што Му рече: „Се заколна Господ и нема да се раскае: ’Ти си свештеник довека, по чинот Мелхиседеков.‘“

²² Затоа Исус стана залог на толку подобар завет.

²³ А тие беа многу свештеници, зашто смртта не им даваше да остане само еден;

²⁴ а Тој, бидејќи живее довека, има свештенство што не изминува.

²⁵ Затоа Тој и може совршено да ги спаси оние што преку Него доаѓаат кон Бога, бидејќи е секогаш жив за да се застапува за нив.

²⁶ Таков Првосвештеник и ни тре­ба­ше: свет, незлобив, неосквернет, од­во­ен од грешните и Кој стана повозвишен од небесата.

²⁷ Кој нема потреба, како другите првосвештеници, секојдневно да принесува жртва прво за своите гревови, а потоа и за оние на народот, бидејќи Тој го изврши тоа еднаш засекогаш, принесувајќи се Самиот Себеси.

²⁸ Зашто Законот за првосвештеници поставува луѓе што се немоќни; а сло­вото на заклетвата што е по Законот, го поставува Синот, Кој е совршен довека.