Ефесјаните 6 - Нов превод на Новиот Завет 2023

Деца и родители

¹ Вие, децата, бидете им послушни на своите родители во Гос­пода, зашто тоа е праведно.

² „Почитувај ги својот татко и својата мајка!“ – тоа е првата заповед со ветува­ње –

³ „за да ти биде добро, и да живееш долго на земјата.“

⁴ И вие, татковците, не дразнете ги своите де­ца, туку подигнувајте ги во воспитанието и науката на Господ.

Слуги и господари

⁵ Вие, слугите, бидете им послушни на своите телесни господари со страв и тре­пет, во простота на срцето, како на Христос,

⁶ не работете само за пред очи, како човекоугодници, туку како Христови слуги, кои ја извршуваат волјата Божја од сета своја душа,

⁷ служејќи со добра волја, како да Му служите на Господ, а не на луѓе,

⁸ знаејќи дека секој, па било тоа роб или слободен, ќе добие од Господ спо­ред доброто, што го направил.

⁹ А и вие, господари, така од­несувајте се кон нив и бидете умерени во строгоста, знаејќи дека и над вас самите има Господар на небесата, во Кого нема пристрасност!

Оружјето што ни го дава Бог

¹⁰ Па така, браќа, зајакнувајте се во Господа и во моќта на Неговата сила!

¹¹ Облечете се целосно со оружјето и оклопот Божји за да можете да им одолеете на ѓаволските итроштини;

¹² зашто нашата борба не е против крв и месо, туку против началствата, против властите, против световните упра­вители на темнината од овој свет, против небесните духови на злобата.

¹³ Затоа земете го оружјето и оклопот Божји, за да можете да се спротивставите во денот на злото, та, откако ќе завршите сѐ, да опстоите.

¹⁴ И така стојте цврсто, препашани со вистината и облечени во окло­пот на праведноста;

¹⁵ и нозете да ви бидат обуени во подготвеност за благовестието на мирот.

¹⁶ А над сѐ, земете го штитот на верата, со кој ќе можете да ги изгаснете сите вжештени стрели на лукавиот;

¹⁷ земете го и шлемот на спасението и духовниот меч, кој е словото Божјо!

¹⁸ Со секаква молитва и молба во се­кое време молете се во Духот, и во такво расположение, бидете будни со целосна истрај­ност и молитва за сите светии

¹⁹ и за мене, та кога ќе ја отворам ус­тата да ми се даде слово за слободно да ја со­општувам тајната на благовестието,

²⁰ заради кое сум пратеник во окови, за да го проповедам смело, како што ми прилега.

Последни поздрави

²¹ А за да знаете и вие како сум и што работам, за сѐ ќе ве извести Тихик, воз­љубениот брат и верен служител во Господ,

²² кого токму заради тоа го пратив кај вас, за да дозна­ете како сме и да ви ги утеши срцата.

²³ Мир на браќата и љубов со вера од Бога Отецот и од Господ Исус Христос.

²⁴ Благодатта нека биде со сите што Го љубат на­шиот Господ Исус Христос со нераспадлива љубов. Амин!