Ефесјаните 5 - Нов превод на Новиот Завет 2023

Да се живее во светлина

¹ И така, подражавајте Го Бога, како возљубени чеда,

² и живејте во љубов, како што и Христос нѐ возљуби и се предаде Себеси за нас како принос и жртва на Бога за благопријатен мирис.

³ А блуд и секаква нечистота или, пак, алчност, воопшто да не се спомнуваат меѓу вас, како што им прилега на светии,

⁴ ниту, пак, гнасотија ни будалесто збо­рување, или шегување, кои се непристојни, туку само благодарност.

⁵ Зашто ова треба да го знаете: ниеден блудник, или нечист, или ненаситник – кој е идолопоклоник, нема наследство во царството на Христос и на Бога.

⁶ Никој да не се мами со празни збо­ро­ви; зашто поради нив доаѓа Бож­јиот гнев врз синовите на непокорноста;

⁷ затоа, не станувајте нивни соучесници.

⁸ Зашто вие некогаш бевте темнина, а сега сте светлина во Господ; живејте како чеда на светлината!

⁹ Бидејќи плодот на Духот се состои во сѐ што е добро, праведно и вистинито –

¹⁰ испитувајте што Му е благоугодно на Господа,

¹¹ и не учествувајте во бесплодните дела на темнината, туку разобличувајте ги!

¹² Зашто за она што го прават скри­шум, срамно е и да се зборува.

¹³ А сѐ што е разобличено, светлината го прави јавно; бидејќи сѐ што е јавно, светлина е.

¹⁴ Затоа е речено: „Стани ти што спи­еш, воскресни од мртвите, и Христос ќе те осветли!“

¹⁵ Па така, добро внимавајте како жи­веете! Не како безумни, туку како муд­ри,

¹⁶ ползувајќи го времето, зашто деновите се зли.

¹⁷ Затоа не бидете неразумни, туку распознајте што е волјата Гоподова!

¹⁸ И не опивајте се со вино, во него има разврат, туку исполнувајте се со Духот,

¹⁹ разговарајќи меѓу себе со псалми и славословија и духовни песни, пеејќи и воспевајќи Го Господ во вашите срца,

²⁰ благодарејќи Му секогаш за сѐ на Бога и Отецот, во името на нашиот Гос­под Исус Христос.

За семејните односи

²¹ Покорувајќи се еден на друг во стра­во­почит Христова.

²² Вие, жените, покорувајте им се на своите мажи, како на Господ,

²³ зашто мажот е глава на жената, како што и Христос е глава на Црквата, и Тој е Спасител на телото.

²⁴ Па, како што Црквата Му се покорува на Христос, така и жените во сѐ да им се покоруваат на своите мажи.

²⁵ Вие, мажите, љубете ги своите жени, како што и Христос ја возљуби Црк­вата и се предаде Себеси за неа,

²⁶ за да ја освети, очистувајќи ја со водна бања преку словото;

²⁷ та да ја претстави пред Себе Црквата во сета слава, која нема дамка или брчка, или нешто слично, туку да биде света и непорочна.

²⁸ И така, мажите се должни да ги љубат своите жени како што ги љубат своите тела. Оној што си ја љуби жената, тој се љуби и себеси.

²⁹ Зашто никој никогаш не го намра­зил своето тело, туку го храни и го негува, како и Господ Црквата,

³⁰ бидејќи ние сме делови на Неговото тело, од Неговото месо и од Неговите коски.

³¹ „Затоа, човек ќе ги остави својот татко и својата мајка, и ќе се присоедини кон својата жена, та обајцата ќе бидат едно тело.“

³² Оваа тајна е голема. Но јас ви зборувам за Христос и за Црквата.

³³ И така, секој од вас да си ја љуби својата жена, како се­беси, а жената да го почитува својот маж.