Ефесјаните 3 - Нов превод на Новиот Завет 2023

Дејноста на Павле меѓу нејудејците

¹ Затоа јас, Павле, сум затвореник на Христос Исус заради вас, незнабошците.

² Бидејќи чувте за распределбата на Божјата благодат, која ми е дадена заради вас,

³ односно дека преку откровение ми е соопштена тајната, како што претходно накратко ви напишав.

⁴ Читајќи го тоа, можете да разберете како сум ја сфатил тајната на Христос,

⁵ која, на луѓето од претходните поколенија не им беше објавена, како што сега им се откри на Неговите свети апостоли и пророци преку Духот,

⁶ односно дека незнабошците се сонас­ледници, делови на едно тело, и соучес­ници на Неговото ветување во Христос преку благовестието,

⁷ на кое му станав служител според дарот на Божјата благодат, која ми е дадена по дејство на Неговата сила.

⁸ Мене, најмалиот од сите светии, ми се даде благодатта да им го благовестам на незнабошците неистражливото Христово богатство,

⁹ и на сите да им расветлам во што се состои распределбата на тајната, криена од вечноста во Бога, Кој создаде сѐ преку Исус Христос,

¹⁰ та разнообразната Божја мудрост сега, преку Црквата, да им се објави на небесните на­чалства и власти,

¹¹ според предвечната замисла, која Тој ја изврши во Христос Исус, нашиот Гос­под,

¹² во Кого имаме слобода и пристап, уверени преку верата во Него.

¹³ Поради тоа, ве замолувам, да не паѓате со духот пред моите маки што ги поднесувам заради вас, зашто тие се за ваша слава.

Христовата љубов

¹⁴ Затоа ги преклонувам своите колена пред Отецот на нашиот Господ Исус Христос,

¹⁵ од Кого се именува секој род на небесата и на земјата,

¹⁶ да ви даде, според богатството на Својата слава, сила за да се утврдите пре­ку Неговиот Дух во внатрешниот чо­век,

¹⁷ и преку верата Христос да се всели во вашите срца,

¹⁸ та вкоренети и утврдени во љубовта да можете да разбирате, заедно со сите светии, што е ширина и должина, што е дла­бо­чина и височина,

¹⁹ и да ја осознаете Христовата љубов, која го надминува секое знаење, за да се исполните со сета Божја полнота.

²⁰ А на Оној што според силата што дејствува во нас, може да изврши неспоредливо повеќе од сѐ што ќе побараме или помислиме,

²¹ Нему нека Му е слава во Црквата и во Христос Исус во сите поколенија и за вечни векови. Амин!