Ефесјаните 2 - Нов превод на Новиот Завет 2023

Од смрт во живот

¹ И вас, кои бевте мртви поради вашите престапи и гревови,

² во кои некогаш живеевте според духот на времето на овој свет, според кнезот на воздушната власт, односно на духот, кој сега дејствува во синовите на непокорот,

³ меѓу кои и ние сите некогаш се водевме според желбите на нашето тело, из­вр­шу­вајќи ги желбите на телото и на по­мис­лите, и по природа бевме, како и дру­ги­те, чеда на гневот.

⁴ Но Бог, Кој е богат со милост, поради Својата голема љубов, со која нѐ возљуби,

⁵ иако бевме мртви поради нашите прегрешенија, нѐ оживеа во Христос – по благодат сте спасени –

⁶ нѐ воскресна со Него и нѐ постави со Него на небесата, во Христос Исус,

⁷ за во идните векови да го покаже преизобилното богатство на Својата благодат, преку добрината кон нас во Христос Исус.

⁸ Зашто по благодат сте спасени пре­ку верата; и тоа не е од вас – туку дар Божји е!

⁹ Не е од дела, за да не се пофали не­кој.

¹⁰ Бидејќи сме Негова творба, создадени во Христос Исус за добри дела, што Бог однапред ги подготви, за да живееме во нив.

Едно во Исус Христос

¹¹ Затоа помнете дека вие, некогашните незнабошци по тело – наречени не­обрезани од оние што себеси се нарекуваат обрезани – со обрезание извршено на телото со рака, –

¹² во она време бевте без Хрис­тос, отстранети од Израилевото општество, туѓи на заветите на ветувањето, без никаква надеж и безбожни во светот;

¹³ но сега, во Христос Исус, вие, кои некогаш бевте далеку, станавте блиски преку Христовата крв.

¹⁴ Зашто Тој е нашиот мир, Кој од двата народа направи еден и ја разруши преградата што беше меѓу нив.

¹⁵ Тој со Своето тело го уништи непријателството, а законот на запо­ве­дите и одредбите го обессили, за да создаде во Себе од двата народа еден нов човек, воспоставувајќи мир,

¹⁶ та во едно тело да ги помири обата со Бога преку крстот, откако на него го уништи непријателството.

¹⁷ Тој дојде да ви благовести мир на сите вас, и далечни и блиски,

¹⁸ зашто преку Него и едните и дру­ги­те имаме пристап кај Отецот, во едниот Дух.

¹⁹ И така, вие веќе не сте туѓи и придојдени, туку сте им сожители на светиите и членови на Божјото семејство,

²⁰ зашто се утврдивте на темелите поставени од апостолите и пророците, имајќи Го како аголен камен Самиот Исус Христос,

²¹ врз Кого целата градба, складно составена, прераснува во свет храм во Господа;

²² во Кого и вие, изградувајќи се, станувате живеалиште на Бога во Духот.