MATIYUS 28 - ALKETAB E DHALEM BASA MADURA

Isa abungo

¹ Saellana are Sabat la lebat, e are Ahad gi' petteng, Miriyam Magdalena ban Miriyam settonganna entar ka koburan jareya.

² O-tao laju badha lendhu se ce' rajana. Badha malaekadda Pangeran settong toron dhari sowarga laju magulu' bato panotobba makam gella', terros alenggi e attassa.

³ Robana malaekat jareya padha ban dhap-keddhap, dineng rasoganna ce' potena.

⁴ Tantara se ajaga e jadhiya katako'en sampe' ngetter, ban akantha oreng mate.

⁵ Dhabuna malaekat jareya ka babine'an gella', “Ba'na ta' osa tako'! Sengko' tao ba'na padha nyare Isa se esalib rowa.

⁶ Sateya la tadha' e dhinna', la abungo akantha se la edhabuwagi dibi' sabbanna. Mara dha' enna', reya' abas kennengnganna pasareyanna.

⁷ Sateya, kassa' ba'na duli entar ka red-moredda, kabala kantha reya, ‘Isa ampon abungo, ban samangken meyos ka Galilea ajangadha'i sampeyan. E ka'dhissa' sampeyan bakal tapanggiya sareng Salerana!’ Kaenga'e apa se la ekoca'agi sengko' ka ba'na reya.”

⁸ Babine'an jareya duli nyengga dhari makam jareya. Atena arassa tako' acampor gumbira, kabbi padha ka'-berka' entara malae red-moredda parkara jareya.

⁹ O-tao Isa etemmo manggi'i babine'an jareya, pas adhabu, “Salam!” Babine'an jareya nyander nyemma'e Isa, laju agellu' padana ban nyemba ka Salerana.

¹⁰ “Ta' osa tako',” ca'na dhabuna ka reng-oreng jareya, “kassa' kabala ka Tang tan-taretan, soro padha entar ka Galilea; e dhissa' reng-oreng jareya bakal tatemmowa ban Sengko'.”

Reppodanna tantara se ajaga

¹¹ Sabatara babine'an gella' ajalan, tantara se ajaga makam gella' badha se padha entar abali ka kottha, areppot ka mam-imam kapala parkara sakabbiyanna kadaddiyan gella'.

¹² Mam-imam kapala aparembagan ban pin-pamimpin Yahudi; tantara se ajaga gella' padha eberri'i pesse sabannya'na,

¹³ laju ebalai kantha reya, “Ba'na kodu ngoca' ja' red-moredda Isa entar ka makamma e bakto malem, sarta ngeco' jinazana teppa'na ba'na padha tedhung.

¹⁴ Ban mon parkara jareya epeyarsa gubennor, ban sengko' ecaca'ana me' olle parcaja ban ba'na me' olle ta' nemmo karekongan pa-apa.”

¹⁵ Tantara se ajaga jareya nampane pesse gella', ban ajalannagi akantha se epessennagi ka aba'na. Daddi sampe' sateya careta jareya gi' ekacaca e kalanganna oreng Yahudi.

Isa ngaton ka red-moredda

¹⁶ Moredda Isa se sabellas oreng padha entar ka gumo' e Galilea akantha se la edhabuwagi Isa.

¹⁷ E bakto nangale'e Isa, red-moredda pas padha asojud abakte. Tape e antarana red-mored jareya gi' badha se mangmang atena.

¹⁸ Isa pas nyander ka seddi'na red-moredda jareya, laju adhabu, “Sakabbiyanna kobasa e sowarga ban e bume la epassra'agi ka Sengko'.

¹⁹ Daddi mara entar ka sakabbiyanna bangsa e sabingkerra dunnya, padaddi Tang mored kabbi. Baptis sakabbiyanna bangsa jareya kalaban nyebbut asmana Rama ban Pottra ban Errohna Allah.

²⁰ Ajari kabbi sopaja padha'a ta'at ka pa-apa se la eparenta'agi Sengko' ka ba'na. Ban kaenga'e, ya, Sengko' abarengngana ba'na terros sampe' are keyamat.”