ETONGAN 1 - ALKETAB E DHALEM BASA MADURA

Oreng Isra'il mabadha caca jiwa se dha'-adha'

¹ E tanggal settong bulan dhuwa' e dhalem taon se kapeng dhuwa' saellana bangsa Isra'il nyengla dhari Messer, PANGERAN adhabu ka Mosa e dhalem Kemah Socce e ra-ara Sinay.

² Dhabuna, “Ba'na ban Harun kodu mabadha caca jiwana sakabbinna ommat Isra'il, menorot kaomma ban kalowargana bang-sebang. Cathet nyamana lalake'an

³ se aomor dhu polo taon ka attas se sanggup daddi tantara. Reng-oreng jareya kodu edhaftar menorot pasukanna bang-sebang.

⁴ Dhari saneyap suku penta settong pamimpinna kaom soro abanto ba'na.”

^5-16 Areya' nyamana reng-oreng se epele dhari ommat se esorowa abanto Mosa ban Harun ban se daddi pamimpinna saneyap suku, iya areya: Suku & Suku Pemimpin Ruben Elizur ana'na Syedeyur Simeyon Selumiyel ana'na Zurisyadai Yehuda Nahason ana'na Aminadab Isakhar Netane'el ana'na Zuwar Zebulon Eliyab ana'na Helon Efraim Elisama ana'na Amihud Manasye Gamaliyel ana'na Pedazur Benyamin Abidan ana'na Gideyoni Dan Ahiyezer ana'na Amisyadai Asyer Pagiyel ana'na Okhran Gad Elyasaf ana'na Rehuwel Naftali Ahira ana'na Enan

¹⁷ Kalaban bantowanna oreng se dhubellas jareya Mosa ban Harun

¹⁸ makon sakabbinna ommat akompol e tanggal settong bulan dhuwa', silsilahna reng-oreng jareya pas esoson menorot om-kaomma se badha e dhalem saneyap sukuna. Nyamana lalake'an se aomor dhu polo taon ka attas ecathet ban ebitong,

¹⁹ akantha se epakonnagi bi' PANGERAN. Jareya kabbi elampa'agi bi' Mosa e ra-ara Sinay.

^20-46 Lalake'an se aomor dhu polo taon ka attas se sanggup daddi tantara, nyamana ecathet menorot kaomma e dhalem sukuna, molae dhari Ruben, pottra sareyangnga Yakub sampe' ka Naftali. Bannya'na reng-oreng jareya: Suku Bannya'na Ruben 46.500 Simeyon 59.300 Gad 45.650 Yehuda 74.600 Isakhar 54.400 Zebulon 57.400 Efraim 40.500 Manasye 32.200 Benyamin 35.400 Dan 62.700 Asyer 41.500 Naftali 53.400 Kabbi: 603.550

⁴⁷ Reng-oreng Lewi ta' edhaftar epapolong ban ku-suku laenna,

⁴⁸ sabab PANGERAN la adhabu kantha reya ka Mosa,

⁴⁹ “E bakto ba'na nyathet nyamana ban bannya'na reng-oreng Isra'il se sanggup daddi tantara, suku Lewi ta' osa cathet.

⁵⁰ Reng-oreng Lewi soro ngoros Tang Kemah ban but-parabudda. Kawajibanna reng-oreng Lewi jareya mekol Tang Kemah ban but-parabudda sarta ngoros Kemah jareya, ban mon akemah kodu neng e sakalenglengnga Tang Kemah.

⁵¹ Mon ba'na mangkada, reng-oreng Lewi se kodu abungkar Tang Kemah jareya, ban mon ba'na ambuwa, oreng Lewi keya se kodu maddek Kemah jareya. Salaenna oreng Lewi, sapa'a bai se nyemma' ka Kemah jareya kodu eokom mate.

⁵² Reng-oreng Isra'il laenna kodu maddek kemahna e kennengnganna, e seddi'anna bul-ombulla pasukanna bang-sebang.

⁵³ Tape oreng Lewi kodu akemah e sakalenglengnga Tang Kemah, kennengnganna panyempennanna Tang kom-hokom. Reng-oreng Lewi jareya kodu ajaga Kemah jareya sopaja ta' sampe'a badha oreng se entar ka seddi'anna, sopaja Sengko' ta' sampe'a ngokom ommat Isra'il.”

⁵⁴ Daddi oreng Isra'il ajalannagi sabarang se edhabuwagi PANGERAN ka Mosa.