Yakobo 1 - Mapangano Alomba 1923

¹ YAKOBO, kapolo wa Mlungu na wa Asikuru Yesu Kristo, ku mitundu kumi na iŵiri ila ya Chimwaziko, yakuŵa nseko.

² Lingani ni nseko ngayo, akwasu, mkawa mmayezyo a mtundumtundu,

³ poziŵa kuti kuyezya mvwano wanu kuchita makoselelo.

⁴ Na makoselelo nakuŵa na mulimo wake wokumanizya, kuti muŵe ŵokumanizya na paliye chilema, ŵosalelera kantu.

⁵ Sembe kati umo wa mweo olelera nzeru namsenge Mlungu, oŵapa ŵonse kwa matapo nosatuzula, ninga zipewe kwake.

⁶ Lomba nasenge kogomezya kosakaika kantu: pakuti uyo okaika olingana na matamba a mchimana okankiwa na mpepo noŵinduka.

⁷ Asalinga uyo muntu kuti apokere kantu kwa Asikuru;

⁸ womtirakuŵiri, wozuilazuila mnjira zyake zyonse.

⁹ Lomba mkwanu mkavu naŵolitamya na mchinzi wake,

¹⁰ na msambazi nokavushiwa kwake: pakuti nga ni mungu wa uzu azalope.

¹¹ Pakuti zuŵa likaperofuma na chitukumila cha line luufotesya uzu; na mungu wa wine ukunkumukila pansi, na maŵonekero a wine aweme ochenekeka: tetyo naye msambazi ni mwati azafotere mmayendero ŵake.

¹² Ana shuko muntu okoselela poyezyewa: pakuti akazomerezyeka azapoke chapeu chofumu cha moyo, chechizomerekezya Asikuru kwa aŵo omtemwa.

¹³ Asanena yeka umo pakuyezyewa, Nuyezyewa na Mlungu: pakuti Mlungu sangoyezyewa na viipa, na mwine yeka ntoyezya ali wonse:

¹⁴ sembe ali wonse oyezyewa pakukokewa na malakalakilo ŵake mwine noŵenzyewa.

¹⁵ Pamene apo malakalakilo, akamita vumo, opapa viipa: na viipa ivyo vikakula vuvyala imfwa.

¹⁶ Msaŵepekewa, akwasu ŵotemweka.

¹⁷ Kupa kuli konse na mtulo uli wonse vufumila kumulu nosikira pansi kufumila kwa Ausu waŵo a vyoŵalila, mwa yeve simngaŵe kuyarukayaruka kano chinzingwa chozyoka.

¹⁸ Mchipangwilo chake mwine etivyala na lizu la chendi, takuŵa nga ni vyanchesya vya vyoumbiwa vyake.

¹⁹ Muziŵa ichi, akwasu ŵotemweka. Lomba ŵantu ŵonse nasampuke pakumvwa, naaŵe ŵosinilila polaŵira, ŵosinilila pokalipa:

²⁰ pakuti ukali wa ŵantu suchita chilungamo cha Mlungu.

²¹ Teti potuŵizya usali wonse nopaka kwa mpulupulu pokerani notekanya lizu lilukomerewemo lukumopuzumusya moyo wanu.

²² Iŵani ŵolichita lizu, nte akumvwa kweka, koliŵepeka mwaŵene.

²³ Pakuti kati muntu ni wolimvwa lizu, nte wochita, olingana na muntu oŵona chinso chake cha chivyalikwilo mchirora:

²⁴ chikomo oliŵona nofumapo, na lomba pano apa oluŵa ni muntu wotyani.

²⁵ Sembe uyo olola mdango lokumanizya, ni la wanoŵene, nokakasyamo, pasaŵa wakumvwa koluŵa sembe wochita milimo, wamene uyu ni ati azoshukishiwa mkuchita kwake.

²⁶ Kati ali wonse olilinga ni wolambila, akakanolesya lulimi lwake lomba oliŵepeka mtima, ulambilo wa uyu ni watyala.

²⁷ Ulambilo uweme na wendi pa menso pa Mlungu na Ausu wasu ni uyu, woyonzya ŵana anchete na anakazi ŵofwilwa mmazuzyo ŵaŵo, nolisunga mwine aŵeve mindilizi ya mcharo chino.