Tito 3 - Mapangano Alomba 1923

¹ ŴAKUMBUSYENI kunakira unduna nopinguzi, kumvwila akuru, kuliikilatu ku milimo yonse iweme,

² kusanena ali wonse viipa, kusaŵa akayambamulomo, kusisikanya, ŵolangizya ŵantu ŵonse malisisyo ŵonse.

³ Pakuti seo nase tenze kale ŵopusa, asimvwa, ŵoluvishiwa, ŵochishiwa ukapolo ku makumbwilo na vyotemwerako vya mtundumtundu, ŵokanilila mchigwininti na tima, kutinkiwa, kununkulana.

⁴ Sembe vikaŵoneke chisomo cha Mlungu Mpuzumushi wasu na chintemwa chake cha ku ŵantu,

⁵ nte chikomo cha milimo yolungama itichita seka, sembe mwa lusungu lwake ni mwechitipuzumusyira, kwa masukilo ŵovyaluka kwakaŵiri na kowamyiwa na Mzimu Mtuŵa,

⁶ wechipungulila pali seo kwa matapo mwa Yesu Kristo Mpuzumushi wasu;

⁷ kuti pochishiwa ŵolungama na chawanzi chake takuŵa apyani mchigomezyo a moyo wa mtatakuya.

⁸ Lizu ili ndochetekereka, na zya ivi nupangwa monena kosindikizya, kuti ŵala omchetekera Mlungu aikeko mtima wochitachita milimo iweme. Ivi ni viweme na vyochitirako ku ŵantu:

⁹ sembe kukonshakonsha kobwata na malukumbakumba na mayambano na ntota zya mdango moleukapo; pakuti ni vyosachitirako na vyatyala.

¹⁰ Muntu akuŵa chilakanga, mkamsoka limo kano kaŵiri, momkana,

¹¹ pamuziŵa kuti wotetyo alusanguke muŵi, noifya na kuŵa wolikonwesya.

¹² Penti nimtumireni Artema kano Tukiko chitani kasansauko konizila ku Nikopoli: pakuti nichiti nikankaleko mwera wonse.

¹³ Zena wadango na Apollo puvyanuwamya vyolwendo waŵo, asasoŵelwa kantu.

¹⁴ Ŵasu naŵo nasambile kuchitachita milimo iweme kochitirako vyopangwika, asaŵa aliye vyotwala.

¹⁵ Ŵonse anili naŵo ampani mtende. Ŵapeni mtende ŵotitemwa mu mvwano. Chawanzi chakuŵa namwe monse.