Tito 2 - Mapangano Alomba 1923

¹ SEMBE mweo molaŵira vila vuyana na mayeruzyo ŵendi,

² akuti analume akurukazi aŵekuŵa ŵolilesya, ŵochinzikika, a mitima yolema, a makosa mu mvwano, mchitemwano, mmakoselelo:

³ tetyo na anakazi akote aŵekuŵa anyino nga ni a utumiki wozila, ŵosazeŵanya kano kumangiwa na walwa unyinji, ŵosambizya vyamchinzi;

⁴ kuti aŵolanga mandola kwatemwa alume ŵaŵo, kwatemwa ŵana ŵaŵo,

⁵ na kuŵa a mitima yolema, ŵosachenchemwa, achembereŵendi, aweme, ponakira alume ŵaŵo, lisanenewa viipa lizu la Mlungu.

⁶ Tetyo na alumbwana moŵachinsa kuŵa a mitima yolema:

⁷ mvyonse moliŵonesya mlingo wa milimo iweme; masambizyo ŵanu nakuŵa ŵosapwambwazika, ŵochinzikika,

⁸ malaŵililo ŵendi ntangakonwe, kuti simlandu muyanu apuvuke, pasaŵa na kantu ka kaŵiŵe kotitonzyirako.

⁹ Akapolo nanakire asikuru ŵaŵo noŵatemwesya mvyonse; ŵosalangulula,

¹⁰ aliye ukatakata, sembe ŵolangizya machetekereko ŵonse aweme; kuti aŵasamike mayeruzyo a Mlungu Mpuzumushi wasu mvyonse.

¹¹ Pakuti chawanzi cha Mlungu chiluŵoneke, choletera ŵonse upuzumushi,

¹² notilanga kuti pokana usilambila na malakalakilo a pa charo takuŵa na mankalilo ŵolilesya nolungama nomkonka Mlungu mnsita ino ya lomba;

¹³ kololera chigomezyo chila chokumbwika nosokoloka kwa mchinzi wa Mlungu wasu mkuru na Mpuzumushi Yesu Kristo;

¹⁴ wamene elipa pa mutu wasu atiŵombole ku misulo yonse, nolituvyira ŵantu aŵekuŵa ŵake mwine, ŵopimpilila milimo iweme.

¹⁵ Ivi movilaŵira, nochimula notuzula nopinguzi wonse. Asampwazyani yeka umo.