Mavundululiwe 1 - Mapangano Alomba 1923

¹ MAVUNDULULIWE a Yesu Kristo, ŵechimpa Mlungu kwalangizya akapolo ŵake, a vintu viti vipuvyoŵapo: naye etuma noŵaziŵisya na malaika wake kwa kapolo wake Yohana:

² wamene evichitira ukamenso lizu la Mlungu na untoni wa Yesu Kristo, nivyo vyonse vyechiŵona.

³ Ana shuko uyo opendamo, na ŵala oŵamvwa malizu a uŵirizi uyu, novisunga vulembe wamo: pakuti nsita iri pafupi.

⁴ YOHANA ku eklezya izyo zisano na ziŵiri zya mu Asiya: Chawanzi kwanu na mtendere, kufumila kwa uyo alipo, na enzepo, na akuza; na ku Mizimu iyo isano na iŵiri iri pantanzi pa chilimba chofumu;

⁵ na kwa Yesu Kristo, ntoni yochetekereka, wawiya wa akufwa, na chiyeruzya wa mafumu a mcharo cha pansi. Kwa uyo otitemwa, uyo etikasulula mviipa vyasu na mlopa wake,

⁶ notichisya kuŵa ufumu, kuŵa ansembe a Mlungu wake na Awisi; kwake uŵeko mchinzi nofumu virimika na virimika. Amen.

⁷ Ŵonani, akuza na mikumbi; na menso ŵonse azamuŵone, na ŵala emlasa; na mitundu yonse ya pa charo ize imlilile. Inde mwandi, Amen.

⁸ Ne nine Alfa na Omega, akuti Asikuru Mlungu, nilipo nenzepo nikuza, Mwine wa mpamvu zyonse.

⁹ Ne Yohana, mkuru wanu wosanzyana namwe mmatamano nofumu na makoselelo vya mwa Yesu, nenze pa chitunda chuitiwa Patmo, chikomo cha lizu la Mlungu na chontoni wa Yesu.

¹⁰ Nenze mwa Mzimu pa siku la Asikuru, nane nichimvwa kuvuli kwangu zungo likuru, nga ni la mbata

¹¹ ikuti, Chiuŵona lemba mbuku nolitumizya ku eklezya ziyo zisano na ziŵiri; ku Efeso, na ku Smurna, na ku Pergamo, na ku Tuwatira, na ku Sardi, na ku Filadelfiya, na ku Laŵodikaya.

¹² Nane nicheuka kuŵona wa zungo olaŵira nane. Nikacheuke niŵona misaniko isano na iŵiri ya goldi;

¹³ na pakati pa misaniko umo opala nga ni mwana wa muntu, wovwala mwinjira mpaka mmendo, nomanga mchifuŵa chikoŵe cha goldi.

¹⁴ Mutu wake na sisi lake vyenze vituŵa nga ni usako uli mbee, nga ni snow; na menso ŵake enze nga ni lulimi lwa mulilo;

¹⁵ na mendo ŵake nga ni mkuŵa wotuuliwa, nga ni wosamiwa mu mchero; na lizu lake nga ni chipomezi cha vimanzi.

¹⁶ Enze na ntandara zisano na ziŵiri mkwanja kwake kwendi: na mkanwa mwake mwifumila chinkalammanja cholumata konsekonse: na chinso chake chenze nga ni zuŵa mluŵalila mchilungu cha line.

¹⁷ Neo penimuŵona nichiwa mnkonde mwake nga nafwa. Naye enisintilila kwanja kwake kwendi echiti, Lekoyopa; ne nine wotatika na wosililila,

¹⁸ na Mwine wa moyo; nenze wakufwa, lomba ŵona, nine wamoyo virimika na virimika, nina vyozulila vya imfwa na vya Hade.

¹⁹ Teti lemba vyawaŵona, na vintu vilipo, na vintu viti vize viŵepo pavuli pake;

²⁰ chakunsei cha ntandara izyo zisano na ziŵiri zyawaŵona mkwanja kwangu kwendi, na misaniko isano na iŵiri ya goldi. Ntandara zisano na ziŵiri ni malaika a eklezya izyo zisano na ziŵiri: na misaniko isano na iŵiri ni eklezya zisano na ziŵiri.