Luka 9 - Mapangano Alomba 1923

¹ PAMENE apo eŵalonganika ŵala kumi na aŵiri noŵapa nsaka nopinguzi pa viŵanda vyonse nopozya matenda.

² Naye eŵasuzulira akaŵirizye ufumu wa Mlungu nopozya alwele.

³ Eŵauzya, Msaula kantu kali konse polwendo wanu, weka muŵango, weka mkoba, yeka mitanda kano ndalama; msaŵa na vyovwala viŵiri.

⁴ Mng'anda iri yonse imti mkoloŵa nkalani mwamene nofumamo mwamene.

⁵ Ali ŵonse ati akanompokelelani mkafumapo pa munzi ula kunkumulani lukungu la mmalwayo ŵanu liŵe untoni kuli ŵeve.

⁶ Naŵo eimapo epita pa minzi kuŵirizya evangelo nopozya ponseponse.

⁷ Lomba Herode chilolo echimvwa zya vyonse vichitika: naye ekanganya ngako pakuti kwinenewa na ŵambi kuti Yohana aluzyuke kwa akufwa;

⁸ na ŵambi kuti Eriya aluŵoneke; na ŵambi kuti umo wa aŵirizi ŵala achomba aluzyuke soti.

⁹ Herode echiti, Yohana nimtenda mutu: lomba uyu ni ŵani unikumvwa zyake vintu vyoteti? Naye esakomuŵona.

¹⁰ Lomba apostolo akawere emlululira vila vyechichita. Naye echiya naŵo nopaluka pa ŵeka ku munzi zina lake Betsaida.

¹¹ Lomba maumba ŵala poŵona emsenselela: naye eŵapokelela nolaŵira naŵo zyofumu wa Mlungu, na ŵa esakopozyewa eŵapozya.

¹² Lomba zuŵa lenze senda; naŵo ŵala kumi na aŵiri echiza enena naye, Ŵasuzuleni maumba ŵaye ku minzi na ku minda iri pafupi, nosaka malo noŵonako vyakulya: pakuti pano tiri paulera.

¹³ Sembe yeve eŵauzya, Ŵapeni mweo ŵalye. Echiti, Tiliye kantu sembe mitanda isano na masaŵi aŵiri, tikakana kuyositira ŵantu aŵa ŵonse vyakulya.

¹⁴ Pakuti enze nga ni analume myanda makumi asano. Naye eŵauzya asambili ŵake, Ŵankalikeni pansi maŵanzya maŵanzya, limo nga ni makumi asano, limo makumi asano.

¹⁵ Naŵo echita tetyo, eŵankalika ŵonse pansi.

¹⁶ Lomba eula mitanda isano na masaŵi aŵiri, elolesya kumulu novishukisya nosuna, noŵapa asambili aviike mnkonde mwa maumba.

¹⁷ Naŵo echilya nokuta ŵonse: naŵo efusa manyenyenswa esala kuli ŵeve maluŵango kumi na aŵiri ŵozula.

¹⁸ Lomba yenzepo penzolomba pa yeka asambili enze naye pamo: naye eŵakonsha kuti, Nga maumba onena kuti ne nne ŵani?

¹⁹ Eyasuka echiti, Ni Yohana Mbatizi; sembe ŵambi akuti, Ni Eriya; na ŵambi kuti umo wa aŵirizi achomba aluzyuke soti.

²⁰ Nipo enena naŵo, Nga mweo mkuti nne ŵani? Petro eyasuka echiti, Nimwe Kristo ula wa Mlungu.

²¹ Lomba eŵauzisya notetula asanenera muntu ichi;

²² echiti, Mwana wa muntu sangalekekumvwa matamano anyinji, nokaniwa na akuruakuru na akuru a ansembe na alembi, nopaiwa nozyushiwa soti siku la mazo.

²³ Naye enena naŵo ŵonse, Kati ali wonse opangwa kuza pavuli pangu naŵolitana noula msalaba wake nsiku na nsiku nonikonka.

²⁴ Chikomo ali wonse osakosunga moyo wake azautaye; sembe ali wonse ati azautaye moyo wake pa mutu wangu, wamene uyo azausunge.

²⁵ Pakuti muntu ashuke tyani akapoka vya mcharo vyonse nolitaya kano kulilipa mwine?

²⁶ Pakuti ali wonse ati amvwe nsoni zya neo na malizu ŵangu Mwana wa muntu azamvwile nsoni zya wamene, pati aze na mtupo wake mwine na wa Awisi na wa malaika ŵozila.

²⁷ Lomba numuuzyani ng'aleze, Alipo ŵambi a aŵa alipeneme pano ati akanolaŵa imfwa peka patonto mpaka pati azauŵone ufumu wa Mlungu.

²⁸ Lomba yenzepo zikaswe nga ni nsiku zisano na zitatu pavuli pa malaŵililo aŵa eŵaula pamo naye Petro na Yohana na Yakobo, ekwera naŵo mlupiri kuyolomba.

²⁹ Naye penzolomba maŵonekero a chinso chake eyaruka, na vyovwala vyake vyenze vituŵa yeziyezi.

³⁰ Nipo ŵonani, elaŵira naye ŵantu aŵiri, Musa na Eriya;

³¹ amene eŵoneka mu mchinzi nonena zyakufwa kwake kwenze pafupi nosilizya pa Yerusalemi.

³² Lomba Petro na ŵala ŵenze pamo naye elemelwa tulo: sembe akatunamisye eŵona mchinzi wake na ŵantu ŵala aŵiri enzepeneme naye pamo.

³³ Nipo yenzepo ŵeve penzolekana naye Petro enena na Yesu, Asikuru, chutiwamila seo kuŵa pano: natimange misasa itatu, umo wanu, umo wa Musa, na umo wa Eriya, nteziŵa chenzolaŵira.

³⁴ Lomba penzolaŵira teti wichiza mkumbi noŵasitika: naŵo eyopa pechiloŵa mu mkumbi.

³⁵ Nalo lizu lifuma mu mkumbi lichiti, Uyu ni Mwana wangu, wosaluliwa wangu: mumvwile yeve.

³⁶ Nipo pelichiza lizu Yesu eŵoneka ali yeka. Naŵo ntenzolaŵira nteuzya na muntu mmasiku ŵala kantu ka vyechiŵona.

³⁷ Lomba yenzepo mmawa mwake akaseluke ŵeve mlupiri liumba likuru limchinguzya.

³⁸ Nipo ŵonani, muntu wa mliumba ekuwa echiti, Asambizi, numpapatirani mloleni mwana wangu mwanalume; pakuti ni mwana wangu sichimo:

³⁹ lomba ŵonani, mzimu umkata, naye okuwa kovurumukizya; nawo umpezula mpakochita povu nofumapo pake movufya nompwantapwanta.

⁴⁰ Neo napapatira asambili ŵanu kuufumya, naŵo aliyokumako.

⁴¹ Yesu eyasuka echiti, We luko lulive mvwano notafula, nize niŵe namwe pamo mpaka zuŵanji nosisikanya namwe? iza naye kuno mwana wako.

⁴² Lomba penzekuza chiŵanda icho chimuwisya nomnyonganyonga koyofya. Sembe Yesu eufyangila mzimu wa lunsa, nompozya msaza nomuwezizya kwa awisi.

⁴³ Naŵo ŵonse ezizwa pokuru wa Mlungu. Lomba pamene ŵonse penzozizwa pa vyonse vyechichita enena na asambili ŵake,

⁴⁴ Malizu aŵa naloŵe mmatu ŵanu: pakuti Mwana wa muntu azapelekewe mmanja a ŵantu.

⁴⁵ Lomba nteziŵa lizu ili, lifisika kwaŵo asaliziŵa: naŵo eyopomkonsha zya lizu ili.

⁴⁶ Lomba yenze ntota muli ŵeve yakuti ni ŵani wa seo ati azaŵe mkuru.

⁴⁷ Sembe Yesu akaziŵe masusyano a mmitima yaŵo eula kamwana nokapanamika mnkonde mwake

⁴⁸ noŵauzya, Ali wonse ati akapokelele aka kamwana mzina langu onipokelela neo: na ali wonse ati anipokelele neo ompokelela uyo enituma: pakuti uyo ali mtontomtonto muli mweo monse, wamene uyo ni mkuru.

⁴⁹ Pamene apo Yohana eyasuka echiti, Asambizi, taŵona muntu enzofumya viŵanda mzina lanu, nase tamlesya pakuti ntokonkana na seo.

⁵⁰ Sembe Yesu emuuzya, Usamlesya: pakuti uyo asamsusyani oyavyana namwe.

⁵¹ Lomba yenzepo apo nsiku pezyenze pafupi nosila zyakuti auliwe kuya kumulu eyumilila nolatizya chinso chake kuya ku Yerusalemi,

⁵² notanguzya ntumi pantanzi pake: nazyo zichiya ziloŵa mmunzi wa Asamariya kumuwamizizya katera malo.

⁵³ Lomba ŵeve ntempokelela pakuti chinso chake chenze nga akuya ku Yerusalemi.

⁵⁴ Naŵo Yakobo na Yohana asambili ŵake akaŵone echiti, Asikuru, kansi mupangwa tiite mulilo ufume kumulu noŵalofya?

⁵⁵ Lomba echeuka noŵatuzula [na kuti, Simuziŵa nimwe a mzimu wotyani].

⁵⁶ Naŵo echiya ku munzi umbine.

⁵⁷ Lomba penzekuya mnjira chite enena naye, Neo nimkonkeni kuli konse kumti mwakuya.

⁵⁸ Yesu emuuzya, Ankandwe ana michembo, na tuni twa mlulezi tuna vivumbo; sembe Mwana wa muntu sana posamila mutu wake.

⁵⁹ Naye euzya muyake, Unikonke neo. Lomba echiti, Asikuru, nilekeni tanganikaŵike ŵata.

⁶⁰ Lomba emuuzya, Ŵaleke akufwa aŵikane akufwa ŵeka; sembe weo nkoya ukaŵirizye pasweta ufumu wa Mlungu.

⁶¹ Naye muyake soti echiti, Nimkonkeni, Asikuru; lomba nilekeni tanganikalailane na ŵala ali kwangu.

⁶² Sembe Yesu emuuzya, Paliye muntu akakata chimbwiri nolola kuvuli owamila ufumu wa Mlungu.