Luka 8 - Mapangano Alomba 1923

¹ LOMBA yenzepo kansita katonto kuti enzotantamo mmizinda na mminzi, enzoŵirizya noleta makani aweme ofumu wa Mlungu; na ŵala kumi na aŵiri enze naye pamo,

² na anakazi ŵambi amene epozyewa mizimu iipa na matenda, Mariya woitiwa Magadalene wamene mwivifuma viŵanda visano na viŵiri,

³ na Yowana mka Kuza chisunga wa ng'anda ya Herode, na Susanna, na ŵambi anyinji, ŵenzoŵatumikila na chuma chaŵo.

⁴ Pamene akalongane maumbamaumba, na aŵo a mminzi yonse akamzile elaŵira na linganizyo:

⁵ Mkomoli ula echiyokomola mbuto yake: naye penzokomola iyake ipona mmbali mwa njira; inyantiwa pansi, na tuni twa mlulezi twiilya.

⁶ Iyake ipona pa chiluŵambe; nayo ikaperokula ifota, pakuti yenzeve mnyonto.

⁷ Iyake ipona pakati pa minga; nayo minga ikula pamo nayo noimyololosya.

⁸ Iyake ipona mu msili uweme, nokula notwala vyotwala vya makumi kumi. Apo pechiti ivi ekuwa, Uyo ana matu akumvwa naamvwe.

⁹ Lomba asambili emkonsha, Ili linganizyo ni lotyani?

¹⁰ Enena, Kwanu kupewa kuviziŵa vyakunsei vyofumu wa Mlungu, sembe ku ŵambi ni mmalinganizyo; kuti poŵona asaŵona, na pakumvwa asaziŵisya.

¹¹ Lomba linganizyo ni ili: Mbuto ni lizu la Mlungu.

¹² Aŵo a mmbali mwa njira ni ŵala echimvwa; pamene apo akuza muŵepeki nolilonda lizu mmitima yaŵo, angozomera nopuzumuka.

¹³ Aŵo a pa chiluŵambe ni ŵala amene akamvwa olipokera lizu nosangalala; aŵa aliye muzyu, ozomera kansita katonto, na pa nsita yoyezyewa opatuka.

¹⁴ Nayo iyo ipona pakati pa minga, aŵa ni ŵala echimvwa, naŵo pakuya mnjira yaŵo omyololoshewa na tupwe na mpango na vyosekesya vya mmoyo uno, ntopyesya ngako.

¹⁵ Nayo ya mu msili uweme, aŵa ni ŵala olimvwa lizu nolikatisya mu mtima wozomereka na uweme, notwala vyotwala nokoselela.

¹⁶ Paliye muntu akayasya msaniko ouvwinikila chiya kano kuuŵika mpampansi mwa malili; lomba ouŵika pa chikalo kuti ŵala oloŵamo akuŵone kuyaka.

¹⁷ Pakuti paliye kantu kefisiwa kamene kati kakanovundululiwa, kano kakunsei kati kakanoziŵikwa nozila kuŵala.

¹⁸ Teti mochenjera mmumvwila: pakuti ali wonse ali nacho wamene azapewe soti; na uyo aliye, azamlonde wamene na icho chakulinga kuti ali nacho.

¹⁹ Pamene apo emzila anyina na akwaŵo, naŵo ntekuma kumpanamila chikomo cha winji.

²⁰ Emuuzya kuti, Anyina wanu na akwanu alipeneme panja osakomuŵonani.

²¹ Lomba eyasuka enena naŵo, Ŵama na akwasu ni ŵala amene oŵamvwa malizu a Mlungu noŵachita.

²² Nipo yenzepo pa siku liyake kuti eloŵa mu wato, yeve na asambili ŵake; enena naŵo, Natitaukile kusilya limbi la chimana: naŵo eponesya wato.

²³ Naŵo penzekuya mu wato yeve eyona tulo: nipo ichiza nkuka pa chimana, na wato wenzozula manzi notondwa.

²⁴ Naŵo emzila nomuusya kuti, Asikuru, Asikuru, tutaika. Naye euka mtulo evifyangila mpepo na mayepezi a manzi, navyo vileka, penze kachetechete.

²⁵ Naye enena naŵo, Nga uli kuni mvwano wanu? Ŵeve poyopa ezizwa nonenana umo na muyake, Nga uyu ni ŵani, pakuuzya chukanga vimpepo na manzi, navyo vummvwila?

²⁶ Lomba ŵefwika ku charo cha Ageraseni choteezyana na Galilaya.

²⁷ Naye akafumile pasilya emchinguzya muntu chite wa ku munzi enze na viŵanda; nsita ikuru ntenzovwala nyula, ntenzonkala mng'anda, sembe mmitupa.

²⁸ Akamuŵone Yesu ekuwa emvunamila mnkonde nonena na malizu akuru, Ni tyani kuli neo na mweo, Yesu, mwe Mwana wa Mlungu wa Kumulu ngako? napapata msanizuzya.

²⁹ Pakuti euuzya mzimu wa lunsa ufume mmuntu uyo. Chikomo wenzomkata kaŵirikaŵiri: na ŵantu emmanga na manjerenjende na nsinga amsungisye, lomba evinyonsola vyomangira noutushiwa na chiŵanda ku malambo.

³⁰ Naye Yesu emkonsha kuti, Zina lako niwe ŵani? Echiti, Nine Legiyo; pakuti viŵanda vinyinji viloŵa mwake.

³¹ Navyo vimtetelera asavipanga kufumamo na kuyoloŵa mchisengu cha abusmo.

³² Lomba wenzepo pamene pala mkusi wa nkumba zinyinji zyenzekulya pa lupiri: navyo vimtetelera avizomezye kuyoloŵa muli zyeve. Naye evizomezya.

³³ Nipo viŵanda vifuma mmuntu uyo, vichiyoloŵa mnkumba: na mkusi wiutukira posondoka pala mchimana nochemwa.

³⁴ Ŵa eziŵetera akaŵone icho chapona eutuka echiyouzya mmunzi na mminda.

³⁵ Naŵo efuma akaŵone icho chapona; emzila Yesu nomfwanga muntu mvyafuma viŵanda alinkezi mnkonde mwa Yesu aluvwale na wa nzeru zyake, naŵo eyopa.

³⁶ Ŵala eŵona eŵauzya umo mwapolera uyo okulamwa viŵanda.

³⁷ Nipo ŵantu ŵonse a chitwa cha Ageraseni chozunguluka emsenga kuti afumeko kwaŵo, pakuti ekatiwa na mwezo ukuru: naye eloŵa mu wato nowereramo.

³⁸ Sembe muntu mvyafuma viŵanda ivyo emsenga kuti aŵe naye pamo: lomba emuwezya echiti,

³⁹ Werera ku ng'anda kwako nolulula vintu vikuru vyakuchitira Mlungu. Naye echiya noŵirizya mmunzi wonse vikuru vyamchitira Yesu.

⁴⁰ Lomba powera Yesu liumba limpokelela; pakuti ŵonse enzomlindila.

⁴¹ Nipo ŵonani, echiza muntu zina lake Yairo, enze mkuru wa sunagoge, evunama mnkonde mwa Yesu nompapatira azaloŵe mng'anda yake;

⁴² pakuti enze na kabutu sichimo, wa vyaka nga ni kumi na viŵiri, enzelele nozilika. Lomba penzekuya yeve maumba ŵala emfwindikizya.

⁴³ Pamene apo mwanakazi, enze na ntenda yakuvwa mlopa vyaka kumi na viŵiri, elofya ku ng'anga vyonse vyenze navyo, ntepoleshewa naŵo ŵonse,

⁴⁴ echiza kuvuli kwake noikumya mpomponje ya chovwala chake: na lomba pano apa kuvwa mlopa kwake kwipwila.

⁴⁵ Naye Yesu echiti, Wanikumya ni ŵani? Ŵonse pechikanauka Petro echiti, na ŵala ŵenze naye pamo, Asikuru, ni maumba omfyandikizyani nompatikizyani.

⁴⁶ Sembe Yesu echiti, Muntu wanikumya, panamvwa kuti mpamvu yafuma mwangu.

⁴⁷ Lomba pechiŵona mwanakazi kuti aliyofisame echiza notetemera nomvunamila mnkonde nokundulula pa menso pa ŵantu aŵo ŵonse chikomo chamkumyira, na kuti wapoleshewa lomba pano.

⁴⁸ Naye emuuzya, Mwanakaziwe, mvwano wako wakupuzumusya; nkoya pa mtendere.

⁴⁹ Lomba akalulaŵira muntu echiza efuma ku ng'anda ya mkuru wa sunagoge echiti, Mwana wanu wafwa; msatamanya Msambizi.

⁵⁰ Sembe Yesu akamvwe emyasuka echiti, Lekoyopa: wingozomera tyala, naye apoleshewe.

⁵¹ Naye akafwike ku ng'anda ntezomezya ali wonse kuloŵa pamo naye, sembe Petro na Yohana na Yakobo na awisi a kabutu na anyina.

⁵² Naŵo ŵonse ŵenzolila misozi nommbumila: lomba echiti, Msalila; pakuti aliyeufwe, lomba ali mtulo.

⁵³ Naŵo emseka pwipwiti poziŵa kuti wafwa.

⁵⁴ Sembe yeve pomkata kwanja eita kuti, Kabutuwe, uka.

⁵⁵ Nipo mzimu wake wiwera, naye epuvyouka: naye euzya kuti ampe kantu kakulya.

⁵⁶ Naŵo emvyala ezizwa: lomba eŵauzisya asakundululira muntu icho chachitika.