Luka 7 - Mapangano Alomba 1923

¹ AKASILE yeve malizu ŵake ŵonse mmatu mwa ŵantu ŵala eloŵa mKapernaumi.

² Lomba mlumbwana wa kenturiyo ngana wotemweka naye enzolwala pafupi kufwa.

³ Naye akamvwe zya Yesu emtumira akuru a Ayuda nomsenga kuti azampuzumusye mlumbwana wake.

⁴ Naŵo akamzile Yesu empapatirisya echiti, Uyo owamila kuti mumchitire ichi:

⁵ pakuti otemwa mtundu wasu, na mwine etimangisyira sunagoge lasu.

⁶ Nipo Yesu echiya naŵo pamo. Naye peenze lomba pafupi na ng'anda yake kenturiyo emtumira viuza vikamuuzye, Asikuru, msalitamanya: panisawamila neo kuti muloŵe mnyansi mwa mtenje wangu:

⁷ ni paniliyolichisya neka kuwamila kumzilani: lomba nenani lizu, na mlumbwana wangu apoleshewe.

⁸ Pakuti nane nne muntu numvwila nsaka, nina manjolinjoli onimvwila neo; nane nunena kuli ili, Nkoya, nalo likuya; na ku liyake, Iza, nalo likuza; na ku mlumbwana wangu, Chita ichi, naye ochichita.

⁹ Nipo Yesu akamvwe ivi ezizwa naye, echeuka elinenera liumba lumkonka, Numuuzyani, Niliyofwanga mvwano ukuru woteti, yai, chukanga mwa Israeli.

¹⁰ Naŵo ŵotumiwa akawerereko ku ng'anda ila emfwanga mlumbwana wapola.

¹¹ Nipo yenzepo kansita katonto kuti echiya ku munzi zina lake Naine; na asambili ŵake kumo echiya naye, na liumba likuru.

¹² Lomba pechifwikila ku chilyango cha munzi, ŵonani, enzouliwa kunja muntu wakufwa, mwana mwanalume yeka wa anyina, naye enze wofwilwa: na ŵantu anyinji a ku munzi enze naye pamo.

¹³ Nipo Asikuru pechimuŵona emchitira chifundo emnenera, Usalila.

¹⁴ Naye ezapo eukumya mtembo: naŵo ŵotwala epanama. Echiti, Mlumbwanawe, nukuuzya, Uka.

¹⁵ Nipo uyo wakufwa euka enkala eyambolaŵira. Naye empa anyina.

¹⁶ Lomba mwezo wiŵakata ŵonse: emchinzika Mlungu kuti, Muŵirizi mkuru wauka pali seo: na kuti, Mlungu wasondera ŵantu ŵake.

¹⁷ Nipo mbiri yake iyi iŵirikila mu Yudaya monse na mchitwa chonse chozunguluka.

¹⁸ Lomba asambili a Yohana emuuzya ivi vyonse.

¹⁹ Naye Yohana eliitira aŵiri a asambili ŵake noŵatuma kwa Asikuru kuti, Kansi nimwe uyo akuza, kano tulolera muyake?

²⁰ Ŵantu ŵala akamzile echiti, Yohana Mbatizi etituma kuli mweo kuti, Kansi nimwe uyo akuza, kano tulolera muyake?

²¹ Pa nsita ila epozya anyinji matenda na vimumpe na mizimu iipa; na anyinji enze mpofu eŵalolesya soti.

²² Naye eyasuka eŵauzya, Nkoyani, mkamuuzye Yohana vimwaŵona novimvwa; mpofu zulola soti, ŵotendeŵala oyenda, amanzonzo osukiwa, ŵotulika matu akumvwa, akufwa ozyushiwa, akavu ana makani aweme oŵirizyiwa kwaŵo.

²³ Ana shuko uyo wamene ati akanopilingishiwa pali neo.

²⁴ Lomba zikafumepo ntumi zya Yohana etatikolinenera liumba zya Yohana, Nga mwifuma na kuya mmalambo kuyoŵonanji? tete losung'unzika na mpepo?

²⁵ Lomba mwifuma kuyoŵonanji? muntu ovwala zya limpinti? Ŵonani, aŵo ovwalila nolyera viweme ali mmang'anda ofumu.

²⁶ Lomba mwifuma kuyoŵonanji? muŵirizi? Inde, numuuzyani, ni opula muŵirizi kwene kantu.

²⁷ Uyu ni ula wizilembewera zyake, Ŵona, nuitanguzya nkalamba yangu pantanzi pa menso pako, Yamene iti ize iwamizyetu njira yako kuntanzi kwako.

²⁸ Numuuzyani, Mwa ŵala ovyalikwa na anakazi muliye umo mkuru kumpula Yohana: sembe uyo ali mtonto mpera mu ufumu wa Mlungu ni mkuru kumpula yeve.

²⁹ Naŵo ŵantu ŵonse akamvwe, na amsonko, emchisya Mlungu ni wolungama, pobatiziwa nobatizo wa Yohana.

³⁰ Sembe Afarisayo na asambizi a dango ekana nzeru ya Mlungu, paliyobatiziwa na yeve.

³¹ Nga teti neo niŵapalanye na chinji ŵantu a luko luno? opalana na chinji?

³² Opalana na ŵana alinkezi pa walo wa makweo noitana umo na muyake na kuti, Tamlizizyani vinonje, namwe muliyovina; tambuma, namwe muliyolila misozi.

³³ Pakuti Yohana Mbatizi echiza wosalya mtanda kano kumwa mvinyu; namwe mkuti, Ana chiŵanda.

³⁴ Mwana wa muntu echiza wakulya na kumwa; namwe mkuti, Ŵonani, nyakulya uyo na chikungu, chiuza cha amsonko na ŵoponta!

³⁵ Lomba nzeru yuŵoneka yolungama na ŵana ŵonse a ine.

³⁶ Nipo umo wa Afarisayo emuita kuti alye naye pamo. Naye eloŵa mng'anda ya Mfarisayo uyo nonkala pakulya.

³⁷ Lomba ŵonani, mwanakazi wamene enze mmunzi, muŵipa; akaziŵe kuti yeve alinkezi pakulya mng'anda ya Mfarisayo uyo echiza nako kansuŵilo ka alabastero ka mafuta ŵonunkila,

³⁸ epanama kuvuli pa mendo ŵake nolila; etatikonasya mendo ŵake na misozi yake, noŵapukuta na sisi la mmutu wake, nofyontesya mendo ŵake, noŵazoleka mafuta ŵala.

³⁹ Lomba Mfarisayo emuita akaŵone enena yeka kuti, Muntu uyu angati ni muŵirizi sembe waziŵa kuti mwanakazi uyu omkumya ni ŵani, ni wotyani, kuti ni muŵipa.

⁴⁰ Nipo Yesu eyasuka emuuzya, Simoni, nina malizu okuuzya. Echiti, Asambizi, laŵirani.

⁴¹ Chiyapuzisya chite enze naŵo amangaŵa aŵiri: umo eyapulako makobiri myanda isano, muyake makumi asano.

⁴² Pechisoŵa vyowezizya eŵalekelera ŵonse aŵiri. Nga ni ŵani wa ŵala ati amtemwe kopula?

⁴³ Simoni eyasuka echiti, Nulinga ni ula wechilekelera kopula. Emuuzya, Wapingula wino.

⁴⁴ Naye pomcheukira mwanakazi enena na Simoni, Uŵona uyu mwanakazi? Niloŵa mng'anda mwako, uliyonipa manzi a mmendo ŵangu: sembe yeve wanasya mendo ŵangu na misozi yake noŵapukuta na sisi lake.

⁴⁵ Uliyonifyonta weo: sembe yeve chitatikile panaloŵamo aliyolekofyontesya mendo ŵangu.

⁴⁶ Mutu wangu uliyouzoleka mafuta: sembe yeve wazoleka mendo ŵangu mafuta ŵonunkila.

⁴⁷ Ni panukuuzya, Viipa vyake vinyinji vyalekelewa, pakuti watemwesya kwene kantu: sembe uyo ukulekelewa patonto kwake wamene otemwa patonto.

⁴⁸ Naye emuuzya mwanakazi, Viipa vyako vyalekelewa.

⁴⁹ Naŵo enzenkezi na kulya pamo naye etatikonena ŵeka na ŵeka, Ni ŵani uyu olekelera na viipa?

⁵⁰ Nipo emuuzya mwanakazi, Mvwano wako wakupuzumusya; nkoya pa mtendere.