Luka 6 - Mapangano Alomba 1923

¹ LOMBA yenzepo pa sabata kuti enzopita yeve pa minda ya mapira, naŵo asambili ŵake enzochera visanku vya mapira na kulya, kuvifikinya mmanja mwaŵo.

² Sembe ŵambi Afarisayo echiti, Muchitiranji icho chosazomerekochita pa siku la sabata?

³ Naye Yesu eŵayasuka echiti, Mwati mnapende chukanga icho chechichita Davide peenze na njala, yeve na aŵo ŵenze naye pamo;

⁴ chakuti eloŵa mng'anda ya Mlungu noula nolyamo mitanda ila yolangizyiwa, noŵapa soti aŵo ŵenze naye pamo, yamene ichisazomereka kuilya, sembe ku ansembe ŵeka?

⁵ Naye eŵauzya, Mwana wa muntu ni asikuru wa sabata.

⁶ Lomba yenzepo pa sabata limbi kuti eloŵa msunagoge mula nosambizya: enzemo mwamene mula muntu enze na kwanja kwake kwendi kofota.

⁷ Alembi ŵala na Afarisayo enzomlolesya kati apozye pa sabata, kuti afwange mompera mlandu.

⁸ Sembe yeve eziŵa malingililo ŵaŵo; emuuzya muntu wa kwanja kofota, Ima, panama apo pakati. Naye eima epanama padera.

⁹ Yesu enena naŵo, Numkonshani mweo, Kansi ni chozomereka pa sabata kuchita viweme, kano kuchita viipa? kusunga moyo, kano kuucheneka?

¹⁰ Nipo eŵalazya pa ŵonse ŵala nomuuzya, Tambikizya kwanja kwako. Naye echita teti, na kwanja kwake kwipola.

¹¹ Sembe ŵeve egamukisya, eyeruzyana umo na muyake mwati amchitire Yesu.

¹² Lomba yenzepo mmasiku ŵala kuti echiya ku lupiri ulo kuyolomba; echesya nomlomba Mlungu usiku wonse.

¹³ Kukache eita asambili ŵake, ŵechisalulapo pali ŵeve kumi na aŵiri, ŵechiita soti apostolo;

¹⁴ Simoni wechiita soti Petro, na Andreya mkwaŵo, na Yakobo na Yohana, na Filipo na Bartolomayo,

¹⁵ na Mattayo na Tomaso, na Yakobo mwana wa Alifayo, na Simoni woitiwa Zelote,

¹⁶ na Yuda mwana wa Yakobo, na Yuda Iskariote wamene enze chivumbula.

¹⁷ Naye esika naŵo pamo nopanama pa mselense, na liumba likuru la asambili ŵake na fwingo la ŵantu ŵofuma mu Yudaya monse na mu Yerusalemi na mchinsinsi cha chimana cha pa Turo na Sidoni, amene echiza kummvwa nopoleshewa matenda ŵaŵo;

¹⁸ na ŵala ŵozuzika na mizimu iipa epoleshewa.

¹⁹ Nalo liumba lonse lisakomkumya: pakuti mpamvu ifuma muli yeve noŵapozya ŵonse.

²⁰ Lomba eŵinusya menso pa asambili ŵake echiti, Mwina shuko mwakavu: pakuti wanu ni ufumu wa Mlungu.

²¹ Mwina shuko mwe mkumvwa njala lomba: pakuti mze mkute. Mwina shuko mwe mulila lomba: pakuti mze mseke.

²² Mwina shuko mweo, akampatani ŵantu, akampatulani nomtuzulani nolitaya zina lanu nga ni liipa, pa mutu wa Mwana wa muntu.

²³ Sekelelani pa siku lila nolumpa na chimwemwe: pakuti ŵonani, chilambu chanu ni chikuru kumulu: pakuti amausu waŵo eŵachitira tetila aŵirizi.

²⁴ Sembe malilo kwanu mwaŵosambazya! pakuti mulupoke mapuzisyo ŵanu.

²⁵ Malilo kwanu, mwe mulukute lomba! pakuti mze mumvwe njala. Malilo, mwe museka lomba! pakuti mze mndandaule nolila misozi.

²⁶ Malilo, akamnenelani ŵantu ŵonse viweme! pakuti amausu waŵo eŵachitira tetila aŵirizi achipazyo.

²⁷ Lomba numuuzyani mweo mkumvwa, Temwani tupondo twanu, chitirani viweme ŵala omtinkani,

²⁸ shukisyani ŵala omshamikani, lomberani ŵala omchitirani kaŵikiŵiki.

²⁹ Uyo okunyata mbovu imo umpe iyake soti; na uyo okulonda chovwinikila usamtana mwinjira wako soti.

³⁰ Umpe ali wonse okusenga; na uyo okulonda viya vyako usamtopa soti.

³¹ Nga ni umo mmupangwila kuti ŵantu amchitireni mweo, mwachitire mweo soti ŵeve tetila.

³² Kati mkatemwa ŵala omtemwani mweo, myamikiwe tyani? pakuti chukanga ŵoponta oŵatemwa ŵala oŵatemwa ŵeve.

³³ Namwe kati mkachitira viweme ŵala omchitirani mweo viweme, myamikiwe tyani? pakuti chukanga ŵoponta ochita tetila.

³⁴ Namwe kati mkayapuzisya ŵala amugomezya kupoka kwaŵo, myamikiwe tyani? chukanga ŵoponta oŵayapuzisya ŵoponta ayaŵo, apoke soti vyamene.

³⁵ Lomba temwani tupondo twanu notuchitira viweme, noyapuzisya kogomezya mperampera; na chilambu chanu chiŵe chikuru, namwe mwakuŵa ŵana a Ula wa Kumulu ngako: pakuti yeve ni wowama mtima kuli ŵosayamika na aipa.

³⁶ Iŵani na chifundo, nga ni umo Ausu wanu mwalili na chifundo.

³⁷ Msapingula, namwe muŵe ŵosapinguliwa: msakonwesya, namwe muŵe ŵosakonweshewa: mangululani, namwe muŵe ŵomanguluka:

³⁸ ipani, ninga mpewe; mlingo ukuru wosindiliwa nosung'unizya nozula tololo azampeni mmanja mwanu. Pakuti mlingo umulinga nawo ni wati aŵomlingiramoni.

³⁹ Lomba eŵasimikira linganizyo soti, Nga mpofu zingatanguzyane? kansi sizingawe zyonse ziŵiri mchisengu?

⁴⁰ Msambili ntopula msambizi wake: lomba ali wonse akaliwamya mtima azaŵe nga ni msambizi wake.

⁴¹ Ulolanji kambandu kali mliso la mkwanu, lomba suchilinga chimuti chiri mliso lako wamwine?

⁴² Kano umneneranji mkwanu, Mkwasu, leka nifumye kambandu kali mliso lako, pausachiŵona wamwine chimuti chiri mliso lako wamwine? We wolipazya, tangofumye chimuti mliso lako wamwine, ningoŵone wino kufumya kambandu kali mliso la mkwanu.

⁴³ Pakuti palive chimuti chiweme chutwala vyotwala vyatyala, soti na chimuti chatyala sichutwala vyotwala viweme.

⁴⁴ Pakuti chimuti chiri chonse chuziŵikwa na vyotwala vya chine. Chikomo mminga ŵantu ntocheramo chiku, kano mchitungwi kucheramo mipesya.

⁴⁵ Muntu muweme ofumya ivyo viri viweme mchuma chiweme cha mu mtima mwake; na muŵipa ofumya ivyo viri viipa mchuma chiipa: pakuti pa mapakilo a mtima ni papoingolaŵira pakanwa pake.

⁴⁶ Namwe muniitiranji neo, Asikuru, Asikuru, nosachita vununena?

⁴⁷ Ali wonse onizila na kumvwa malizu ŵangu noŵachita nimlangizyeni opalana na ŵani:

⁴⁸ opalana na muntu omanga ng'anda, ekumbisya noliula, nozika vya pansi pa luŵambe: nipo pelileta zamba kamana kekuntila pa ng'anda ilaya, lomba kwikakanga kuisung'unzya, pakuti imangiwa wino.

⁴⁹ Sembe uyo akumvwa nosachita opalana na muntu emanga ng'anda pamsili paliye makumbililo, ikekuntila kamana, na lomba pano apa ichiwa; na kunyenyeka kwa ng'anda ilaya kwenze kukuru.