Luka 5 - Mapangano Alomba 1923

¹ LOMBA yenzepo, pelenzomfwindikizya liumba nolimvwa lizu la Mlungu, enzepeneme mmbali mwa chimana cha Genesarete;

² eŵona mawato aŵiri ali mmbali mwa chimana, lomba apayi a masaŵi afumamo enzosuka akombe ŵaŵo.

³ Naye eloŵa mu wato umo, wenze wa Simoni, emuuzya anyezyeko patonto kufumila pasilya. Naye enkala nosambizya maumba yeve enze mu wato.

⁴ Akalekolaŵira emuuzya Simoni, Ponesya mmaŵiliŵili, pozani akombe ŵanu mkasye.

⁵ Simoni eyasuka echiti, Asikuru, tachesya novupa, tiliyopayako: lomba pa malizu ŵanu nipoze akombe.

⁶ Ŵakachite teti ezinga masaŵi anyinji ngako, na akombe ŵaŵo ŵenzopezuka.

⁷ Naŵo eŵacheuzya ayaŵo a mu wato umbi aze aŵayavye. Ŵeve echiza ezuzya mawato ŵonse aŵiri, ni pechiyambombila.

⁸ Sembe Simoni Petro akaŵone efukama mnkonde mwa Yesu echiti, Fumaponi pali neo, Asikuru; chikomo nili mwine wa viipa.

⁹ Pakuti ezizwa, na ŵonse ŵenze naye pamo, na nsangwe ya masaŵi ŵechikasya;

¹⁰ tetyo naŵo soti Yakobo na Yohana, ŵana a Zebedayo, enze ayaŵo a Simoni. Nipo Yesu emnenera Simoni, Usayopa; chitatikile lomba uzoŵe wokasya ŵantu.

¹¹ Naŵo akavuule mawato ŵaŵo pasilya esiya vyonse emkonka.

¹² Lomba yenzepo yeve peenze pa munzi umo, ŵonani, muntu wa manzonzo mmuŵili wonse: naye akaŵone Yesu evunama nompapatira kuti, Asikuru, kati mkapangwa mnganisuke.

¹³ Naye etambikizya kwanja kwake emkumya echiti, Nupangwa; usukiwe. Nipo lomba pano apa manzonzo esila pali yeve.

¹⁴ Naye empanga kuti, Usauzya muntu: lomba nkoya ukalilangizye ku wansembe, nopupa kopola kwako nga ni mwechipangira Musa kuŵa untoni kwaŵo.

¹⁵ Sembe chukanga teti mbiri yake iŵirikila kwene kantu, na maumba akuru elongana kuza kumvwa nopoleshewa matenda ŵaŵo.

¹⁶ Sembe yeve eyongoloka echiya mmalambo nolomba.

¹⁷ Lomba yenzepo pa siku liyake kuti enzosambizya; enzepo Afarisayo na asambizi a dango enzenkezi pafupi, efuma mminzi yonse ya mGalilaya na mu Yudaya na mu Yerusalemi: na mpamvu ya Asikuru yenze naye pamo yopozya.

¹⁸ Nipo ŵonani, ŵantu echiza naye muntu wa manjenje pa chisampi: naŵo esakomlovya nomlalika muli yeve.

¹⁹ Lomba posaŵona momlovyera chikomo cha winji ekwera ku mtenje nomsondosesya pa mpata wa nchelwa zya mtenje, na chisampi chake, umo mkati mwenze Yesu.

²⁰ Poŵona mvwano waŵo echiti, Muntuwe, viipa vyako vyalekelewa kwako.

²¹ Naŵo alembi na Afarisayo eyambolingalinga mmitima kuti, Nga uyu ni ŵani omnenera Mlungu misiyakuŵi? Ni ŵani angalekere viipa sembe Mlungu yeka?

²² Yesu poziŵa malingo ŵaŵo eyasuka eŵanenera, Mulinganji mmitima yanu?

²³ Kansi chipepu ni chini, kunena, Viipa vyako vyalekelewa kwako, kano kunena, Uka uyende?

²⁴ Lomba kuti mziŵe kuti Mwana wa muntu ana nsaka pano pansi yolekera viipa (emnenera wa manjenje), Nukuuzya, Uka, uule chisampi chako na kuya ku ng'anda kwako.

²⁵ Lomba pano apa euka pa menso paŵo, eula chenzolalapo na kuya ku ng'anda kwake nomzizya Mlungu.

²⁶ Nipo ŵonse ŵenze na mazuzu, emzizya Mlungu; naŵo ezula mwezo echiti, Taŵona vyozizwisya lero.

²⁷ Ivi vikasile efumapo, eŵona wamsonko zina lake Levi enzenkezi posonkera, emuuzya, Unikonke.

²⁸ Naye esiya vyonse noima nomkonka.

²⁹ Nipo Levi emteŵetera vyakulya vinyinji mng'anda mwake: mwenze winji ukuru wa amsonko na ŵambi ŵenzenkezi na kulya pamo naŵo.

³⁰ Naŵo Afarisayo na alembi ŵaŵo eŵang'onimira asambili ŵake echiti, Nchinji pamkulya na kumwa pamo na amsonko na ŵoponta aŵa?

³¹ Yesu eyasuka eŵauzya, Aŵo ali makosa ntosaka sing'anga, sembe aŵo olwala.

³² Sinizila kwaita ŵolungama sembe ŵoponta kuti ayaruke mitima.

³³ Naŵo emnenera, Asambili a Yohana olitana vilyo kaŵirikaŵiri nochita mapapatiro, tetyo naŵo ŵa Afarisayo; sembe ŵanu akulya na kumwa.

³⁴ Yesu enena naŵo, Kansi mngalesye ŵana a ng'anda ya ntengo kusalya, mtenzi pakali naŵo pamo?

³⁵ Sembe nsiku ziti zize; apo mtenzi pati azalondewe kwaŵo ninga azalitane vilyo nsiku zyamene zila.

³⁶ Naye eŵasimikira soti linganizyo; Paliye muntu opezulako chigamba cha mwinjira walomba nochitimilizya pa mwinjira wachomba; kati teti angoupandula walomba, na chigamba icho soti chofuma ku walomba chosalingana na wachomba.

³⁷ Paliye muntu otiramo mvinyu walomba mmankomwa achomba; kati teti mvinyu walomba ungoŵapulisya mankomwa, na wine ungotaika, na mankomwa angochenekeka.

³⁸ Sembe mvinyu walomba wotiliwa mmankomwa alero.

³⁹ Paliye muntu akamwa mvinyu wachomba opangwa walomba: pakuti akuti, Wachomba ni uweme.