Luka 4 - Mapangano Alomba 1923

¹ LOMBA Yesu wozula Mzimu Mtuŵa ewerako ku Yordani nouliwa na Mzimu mmalambo masiku makumi ŵane,

² enzoyezyewa na muŵepeki ula. Aliyeulye kantu mmasiku ŵala, naye akasile echimvwa njala.

³ Nipo muŵepeki ula emnenera, Kati nimwe Mwana wa Mlungu uzyani mwala uyu uyaruke mtanda.

⁴ Yesu emyasuka kuti, Kwilembewa, Muntu sangachile na mitanda yeka.

⁵ Naye emuula ekwera naye emlangizya maufumu ŵonse a mcharo chonkalamo ŵantu pa kamfunda kamo.

⁶ Muŵepeki emnenera, Nimpeni mweo nsaka iyi yonse na mchinzi wa ine: pakuti vipewa kuli neo, nane numpa ali wonse unupangwa.

⁷ Teti kati mkanilambila neo vyonse viviŵe vyanu.

⁸ Yesu eyasuka emuuzya, Kwilembewa, Womlambila Asikuru Mlungu wako, yeve yeka ni uuti wotumikila.

⁹ Naye emuulila ku Yerusalemi nomuŵika pa lipembe la kumbwe wa chipupilo nonena naye, Kati nimwe Mwana wa Mlungu muliponye pansi kufuma pano:

¹⁰ pakuti kwilembewa, Aŵasuzulire malaika ŵake zya weo, kukuchi lingizya:

¹¹ na kuti, Mmanja mwaŵo azakutembetere, Kano ungakumbulwe lukasa lwako ku mwala.

¹² Naye Yesu eyasuka emuuzya, Kwinenewa, Usamuyezya Asikuru Mlungu wako.

¹³ Lomba muŵepeki akasile mayezyo ŵonse eimapo pali yeve kwa nsita.

¹⁴ Naye Yesu ewererako mu mpamvu ya Mzimu ku Galilaya: na mbirikisi yake iŵirikila mchitwa chonse chozunguluka.

¹⁵ Naye enzosambizya mmasunagoge ŵaŵo nolemekewa na ŵonse.

¹⁶ Lomba efwika ku Nazarete kwechilelewa, eloŵa mwechiyoŵerera msunagoge pa siku la sabata nopanama kupenda malizu.

¹⁷ Lipewa kwake buku la Isaya muŵirizi. Naye evunukulapo pa buku nofwanga pa malo pelembewa,

¹⁸ Mzimu wa Asikuru ali pali neo, Pakuti enizoleka mafuta kwaŵirizyira makani aweme akavu: Enituma kwalululira kumangulula a mnsinga, Na ku mpofu kulola soti, Kwachisya wanoŵene ŵala okandiwa,

¹⁹ Kululula chirimika chosaluliwa cha Asikuru.

²⁰ Naye evwinikilapo pa buku noliwezya ku mtumiki nonkala pansi: na menso a ŵonse a msunagoge enzomlolesya.

²¹ Nipo eyamboŵauzya, Lero malembo aŵa osilizika mmatu ŵanu.

²² Naŵo ŵonse emchitira untoni nozizwa pa malizu a chawanzi efuma mkanwa mwake: echiti, Kansi uyu nti mwana wa Yosefe?

²³ Naye enena naŵo, Lezee munene kuli neo chisimi ichi, Mwe mweng'anga, mulipozye mweka: vyonse vitichimvwa vichitika mKapernaumi vichiteni vyamene ivyo apa soti pa charo chanu.

²⁴ Naye echiti, Lezee numnenelani, Paliye muŵirizi ozomereka mcharo cha kokwaŵo mwine.

²⁵ Sembe neo chendi numuuzyani, Enzepo anakazi anyinji ŵofwilwa pa Israeli mmasiku a Eriya, apo makumbi ezaliwa vyaka vitatu na myezi isano na umo, pechichiza chilala chikuru mcharo icho chonse;

²⁶ sembe Eriya ntetumiwa kwa ŵala ŵonse, sembe ku Zarepta mpera mcharo cha Sidoni, ku mwanakazi wofwilwa.

²⁷ Enzepo soti amanzonzo anyinji pa Israeli pa nsita ya Erisha muŵirizi ula; lomba paliye ali ŵonse ŵala esukiwa, sembe Naamani yeka Msuriya.

²⁸ Naŵo ŵonse ŵala a msunagoge ezula nokali pechimvwa ivi;

²⁹ eima nompoza kunja kwa linga nomkwekwesyera ku msondo wa lupiri luwimangiwapo munzi waŵo, kuti amdyonkolere pansi.

³⁰ Sembe yeve epita pakati paŵo na kuya.

³¹ Pamene apo esikira ku Kapernaumi, munzi wa mGalilaya. Lomba enzoŵasambizya pa siku la sabata:

³² naŵo ezizwa pa mayeruzyo ŵake, pakuti malizu ŵake ŵenze na nsaka.

³³ Lomba msunagoge mwenze muntu ana mzimu wa chiŵanda cha lunsa; chilila na malizu akuru,

³⁴ Aa! ni syani kuli seo na mweo, mwe Yesu mwa ku Nazarete? kansi mwazoticheneka? numziŵani nimwe ŵani, nimwe Wozila wa Mlungu.

³⁵ Nipo Yesu echifyangila echiti, Myalala, ufume muli yeve. Nacho chiŵanda chikamuwisye apo pakati chifuma muli yeve chiliyomchita kantu.

³⁶ Nipo mazuzu eŵaponera ŵonse, naŵo elaŵizyana umo na muyake kuti, Nga ili lizu ni lotyani? pakuti na nsaka na mpamvu oitetula mizimu iipa, nayo yufumamo.

³⁷ Mbirikisi yake ichiya ndyondyo ku malo ŵonse a chitwa chila chozunguluka.

³⁸ Naye eimapo pa sunagoge ilo noloŵa mng'anda ya Simoni. Lomba anyavyalawake a Simoni ekatiwa chinyong'onyong'o chikuru, naŵo empapatira zya yeve.

³⁹ Naye epanama nomuŵeramila nochifyangila chinyong'onyong'o, nacho chimleka: naye euka lomba pano apa noŵatumikila.

⁴⁰ Lomba zuŵa likati syoo ŵonse ŵala ŵenze na ŵolwala matenda a mtundumtundu echiza naŵo kuli yeve; naye eŵasintilila ŵonse manja ŵake noŵapozya.

⁴¹ Viŵanda navyo vifuma muli anyinji vukuwa na kuti, Mwe nimwe Mwana wa Mlungu. Naye povifyangila ntevizomezya kulaŵira peviziŵa kuti niye Kristo.

⁴² Lomba kukache efumapo echiya ku malambo: naŵo maumba ŵala emsakasaka emzila, echiti timlesye asatisiya.

⁴³ Sembe yeve eŵauzya, Noŵirizyira makani aweme ofumu wa Mlungu ku minzi iyo iyakene soti: pakuti ichi ni chinitumiwa.

⁴⁴ Naye enzoŵirizya mmasunagoge a mGalilaya.