Luka 3 - Mapangano Alomba 1923

¹ LOMBA mchirimika kumi na kasano chofumu wa Tiberiya Kaisari, Pontiyo Pilato peenze mmbili wa Yudaya, na Herode chilolo cha Galilaya, na Filipo mkwaŵo chilolo cha chitwa cha Ituraya na Trakoniti, na Lusaniyo chilolo cha Abilene,

² peŵenze akuru a ansembe Anna na Kayafa, lizu la Mlungu limzila Yohana mwana wa Zakariya mmalambo.

³ Naye echiza mchitwa chonse cha mmbali mwa Yordani, kuŵirizya ubatizo woyaruka mtima kolekelewa viipa;

⁴ umo mkwilembewera mbuku la malizu a Isaya muŵirizi ula, Lizu la wokuwa mmalambo, Wamizyani katera njira ya Asikuru, Lungamikani miseo yake.

⁵ Vivuka vyonse vize viundiwe, Na malupiri ŵonse na milundu vize visishiwe; Na vyobedama vize vilungamiwe, Na njira zya myala zize zisalaliwe;

⁶ Na miŵili yonse ize iŵone upuzumushi wa Mlungu.

⁷ Naye eŵanenera maumba ŵala amene efuma kuyobatiziwa naye, Mwe ŵovyalikwa mnjoka, ni ŵani emsokani kuutuka miya ikuza?

⁸ Teti motwala vyotwala vyowamila kulapa mtima: msayambonena mweka na mweka, Tiri naŵo Abrahamu ausu wasu: pakuti numuuzyani kuti Mlungu mmyala iyi angampanamikire Abrahamu ŵana.

⁹ Na lomba katemo kaikiwira kaŵera mnsinde mwa vimiti: teti chimuti chiri chonse chosatwala vyotwala viweme chotendewa nopozewa mmulilo.

¹⁰ Lomba maumba emkonsha kuti, Nga seo tichitenji?

¹¹ Eyasuka eŵauzya, Uyo ana minjira iŵiri nampeko uyo aliye, naye soti ana vilyo nachite tetila.

¹² Naŵo amsonko soti echizobatiziwa, enena naye, Asambizi, nga seo tichitenji?

¹³ Naye eŵauzya, Msapamba kantu kopula zitemewa kuli mweo.

¹⁴ Naŵo manjolinjoli soti emkonsha kuti, Nase tichitenji? Eŵauzya, Msatetemelesya ŵantu, kano kupamba kantu ka tyala; mokondwa na malipiro ŵanu.

¹⁵ Nipo pamene ŵantu penzololera, na ŵonse penzolingalinga zya Yohana mmitima yaŵo kano kati ni Kristo ula,

¹⁶ Yohana eyasuka eŵauzya ŵonse, Lezee neo numbatizani na manzi; lomba akuza onipula neo mpamvu, unisawamila neo kumangulula nsinga zya nkwaŵilo zyake: uyo azambatizeni na Mzimu Mtuŵa na mmulilo:

¹⁷ msanso wake uli mkwanja kwake, kupyeresyapo posansila pake nolongera mapira mntumba yake; sembe masunga azaŵashoke na mulilo wosazima.

¹⁸ Naye eŵirizyira makani aweme ku ŵantu na machimulo ayakene anyinji;

¹⁹ sembe Herode chilolo, potuzuliwa naye chikomo cha Herodiya, mkazi wa mkwaŵo, na vyonse viipa vyechichita Herode,

²⁰ eyangizyapo pa vyonse ichi soti, chommanga Yohana mkambolimboli.

²¹ Lomba yenzepo apo ŵantu ŵonse ŵala akabatiziwe, naye Yesu soti akabatiziwe nolomba, makumbi ezuliwa,

²² na Mzimu Mtuŵa emsikila na maŵonekero a muŵili wake nga ni nkunda, na lizu lifuma mmakumbi, Niwe Mwana wangu wotemweka; nutemwa nawe kwene kantu.

²³ Yesu mwine pechitatikosambizya enze na vyaka nga ni makumi atatu, enze (nga ni mwenzolingira ŵantu) mwana wa Yosefe, mwana wa Heli,

²⁴ mwana wa Mattati, mwana wa Levi, mwana wa Melki, mwana wa Yannai, mwana wa Yosefe,

²⁵ mwana wa Mattatiya, mwana wa Amosi, mwana wa Naumi, mwana wa Esli, mwana wa Naggai,

²⁶ mwana wa Maati, mwana wa Mattatiya, mwana wa Semeini, mwana wa Yoseke, mwana wa Yoda,

²⁷ mwana wa Yoanani, mwana wa Resa, mwana wa Zerubbabeli, mwana wa Salatiyeli, mwana wa Neri,

²⁸ mwana wa Melki, mwana wa Addi, mwana wa Kosamu, mwana wa Elmadamu, mwana wa Eri,

²⁹ mwana wa Yose, mwana wa Eliyezera, mwana wa Yorimu, mwana wa Mattati, mwana wa Levi,

³⁰ mwana wa Sumeoni, mwana wa Yuda, mwana wa Yosefe, mwana wa Yonamu, mwana wa Eliyakimu,

³¹ mwana wa Meleya, mwana wa Menna, mwana wa Mattata, mwana wa Natani, mwana wa Davide,

³² mwana wa Yesse, mwana wa Obede, mwana wa Bowazi, mwana wa Salmoni, mwana wa Nashoni,

³³ mwana wa Amminadabe, mwana wa Arni, mwana wa Hezroni, mwana wa Pereze, mwana wa Yuda,

³⁴ mwana wa Yakobo, mwana wa Isake, mwana wa Abrahamu, mwana wa Tera, mwana wa Nakore,

³⁵ mwana wa Seruki, mwana wa Reyu, mwana wa Pelege, mwana wa Ebere, mwana wa Shela,

³⁶ mwana wa Kainani, mwana wa Arfakisadi, mwana wa Shemu, mwana wa Nowa, mwana wa Lameke,

³⁷ mwana wa Metusala, mwana wa Enoke, mwana wa Yarede, mwana wa Malaleli, mwana wa Kainani,

³⁸ mwana wa Enosi, mwana wa Sete, mwana wa Adamu, mwana wa Mlungu.