Luka 2 - Mapangano Alomba 1923

¹ LOMBA yenzepo pa masiku ŵala lenzepo tetulo la Kaisari Augusto lakuti charo chonse chonkalamo ŵantu chilembewe.

² Uku ni kulembewa kotatika apo peenze Kureniyo mmbili wa Suriya.

³ Ŵonse echiyolilembesya, ali wonse ku munzi wake mwine.

⁴ Naye Yosefe soti efuma mGalilaya, mmunzi wa Nazarete, echiya ku Yudaya, ku munzi wa Davide woitiwa Betelehemu, pakuti enze wa chiŵanza na luko lwa Davide,

⁵ kuyolilembesya pamo na Mariya, etaniliwa naye, penze wokuzya vumo.

⁶ Lomba yenzepo pamene penze palapa zisilizika nsiku zyovyala kwake.

⁷ Naye evyala mwana wa mwanalume wondola wake; emvunga mnyula nomlalika molyera ng'ombe, pemwenzeve malo ŵaŵo mng'anda ya alwendo.

⁸ Enzepo achiŵeta a mbelele pa charo chamene chila enzonkala ku sanga nolindilila mkusi waŵo usiku.

⁹ Nipo malaika wa Asikuru epanama paŵo, na mchinzi wa Asikuru wiŵasakatira: naŵo eyopa kwene kantu.

¹⁰ Naye malaika eŵanenera, Msayopa; pakuti ŵonani, numleterani makani aweme a chimwemwe chikuru chiti chiŵe ku ŵantu ŵonse:

¹¹ pakuti wamvyalikwilani lero mmunzi wa Davide Mpuzumushi, ni Kristo Asikuru.

¹² Ichi ni chiziŵikwilo kwanu, chakuti mkafwane lucheche luvungiwa mnyula nolala molyera ng'ombe.

¹³ Nipo kovurumukizya wenze pamo na malaika uyo winji wa liumba la kumulu, wenzomlumba Mlungu na kuti,

¹⁴ Mchinzi nauŵe kwa Mlungu kumulu, Na pano pansi intendere mu ŵantu ŵakutemwa naŵo.

¹⁵ Lomba yenzepo pechifumapo malaika paŵo knya kumulu achiŵeta euzyana umo na muyake, Tiyeni lomba ku Betelehemu, tikaŵone ichi chachitika chamene chatiziŵisya Asikuru.

¹⁶ Naŵo ŵechiza maluŵilo efwanga Mariya na Yosefe, na lucheche lilelele mmulimba.

¹⁷ Akaŵone eziŵisya ŵantu lizu lalaŵiriwa kwaŵo la mwana uyu.

¹⁸ Naŵo ŵonse echimvwa ezizwa pa ivyo vinenewa kwaŵo na achiŵeta.

¹⁹ Sembe Mariya enzosunga malizu ŵonse aŵa, kwalukanalukana mu mtima mwake.

²⁰ Achiŵeta naŵo ewererako kumchinzika nomlumba Mlungu kwa vyonse vyechimvwa noviŵona, nga ni umo mkwinenewera kwaŵo.

²¹ Lomba zikasile nsiku zisano na zitatu zyomsirimula, emteya zina lake YESU, lamene liteyewa teti na malaika ula pakaliye nomitiwa mvumo.

²² Apo akasile masiku ŵowamyiwa kwaŵo kwa mlingo wa dango la Musa, echiza naye ku Yerusalemi kumleta kwa Asikuru

²³ (nga ni mkwilembewera mdango la Asikuru, Mwanalume ali wonse ofuma mvumo azochishiwa mtuŵa kwa Asikuru),

²⁴ notira nsembe umo mkwinenewera mdango la Asikuru, Uswa umo kano vikanda viŵiri.

²⁵ Lomba ŵonani, enzemo muntu mu Yerusalemi zina lake Simeoni; uyu enze wolungama nolambila, enzololera mamyalaliko a Israeli: na Mzimu Mtuŵa enze pali yeve.

²⁶ Kwivundululiwa kwake na Mzimu Mtuŵa kuti sati aŵone imfwa pakaliyomuŵona Kristo wa Asikuru.

²⁷ Eloŵa mwa Mzimu mchipupilo: nipo ekavyala kamwana Yesu peloŵa nako, kuti achite nako kwa msango wa dango,

²⁸ pamene apo ekayangatila nomchinzika Mlungu kuti,

²⁹ Munifumyamo lomba kapolo wanu, Asikuru, Pa mtendere mwa lizu lanu;

³⁰ Pakuti menso ŵangu aulola upuzumushi wanu,

³¹ Ula umuŵikira futira pa menso pa ŵantu ŵonse;

³² Mwenje wosanikira Mitundu, Na mchinzi wa liumba lanu Israeli.

³³ Lomba awisi na anyina enzozizwa na ivi vinenewa vyake;

³⁴ naye Simeoni eŵashukisya nomnenera Mariya anyina, Ŵona, aka kaikiwa kwa kuwa nouka kwa anyinji mwa Israeli, na kuŵa chiziŵikwilo chosushiwa;

³⁵ inde, na chinkalammanja chize chipuzye moyo wako wamwine, kuti malingililo a mmitima inyinji ivundululiwe.

³⁶ Lomba enzepo mwanakazi Anna, muŵirizi, mwana wa Fanweli, wa mtundu wa Asheri (enze wokota ngako, enze na mulume vyaka visano na viŵiri chitatikile undola wake,

³⁷ naye enze wofwilwa vyaka makumi asano na atatu na mpuzyo vine). Uyu ntenzofuma mchipupilo, enzolambila nolitana vyakulya nopapatira usiku na mzuŵa.

³⁸ Ezako pa nsita yamene ila empa Mlungu chiŵongo, nolaŵira zya yeve kwa ŵala ŵonse enzololera kununuliwa kwa Yerusalemi.

³⁹ Naŵo akasilizye vyonse vyenze mwa dango la Asikuru ewererako ku Galilaya, ku munzi waŵo Nazarete.

⁴⁰ Lomba kamwana kekula, kekosa nozula nzeru: na chawanzi cha Mlungu chenze pali keve.

⁴¹ Naŵo emvyala enzekuya chaka na chaka ku Yerusalemi pa siku likuru la pasaka.

⁴² Naye apo penze wa vyaka kumi na viŵiri ŵeyako ŵeve umo muwenzele msango wa siku lila likuru;

⁴³ naŵo akasile masiku ŵake, penzowerera, mlumbwana ula Yesu esalila kuvuli mu Yerusalemi; na emvyala aliyoziŵe.

⁴⁴ Polinga kuti ali mchikunka epitilila msinzo wa nsiku imo, nipo emsakasaka mwa akwaŵo na mwa anansi ŵaŵo:

⁴⁵ naŵo pakaliyomfwanga ewererako ku Yerusalemi kumpapima.

⁴⁶ Lomba yenzepo, akapitepo masiku atatu, emfwanga mchipupilo enzenkezi pakati pa asambizi kuŵamvwa noŵakonsha makonsho:

⁴⁷ naŵo ŵonse omumvwa ezuzuka na mano ŵake na mayasuko ŵake.

⁴⁸ Akamuŵone ezizwa: na anyina emnenera, Mwanawe, ni chinji pawatichitira teti? ŵona, auso na neo tenzokusaka kolanguluka.

⁴⁹ Yeve enena naŵo, Nga syani pemwenzonisaka? simwiziŵa kansi kuti nakupimpilila vya Ŵata ŵangu?

⁵⁰ Ŵeve aliyoziŵa lizu lyechinena naŵo.

⁵¹ Nipo eima naŵo pamo, echiza ku Nazarete, elinasya kuli ŵeve: na anyina enzosungave malizu aŵa ŵonse mu mtima mwake.

⁵² Yesu naye enzokula nzeru na msinku, na pa chisomo kwa Mlungu na ku ŵantu.