Luka 13 - Mapangano Alomba 1923

¹ LOMBA enzepo ŵambi pa nsita yamene ila amene emuuzya zya Agalilaya, ŵechisanzya Pilato mlopa waŵo na nsembe zyaŵo.

² Naye eyasuka enena naŵo, Kansi mulinga kuti Agalilaya aŵa ŵenze aipa kupula Agalilaya ŵonse pechimvwa mazuzyo aŵa?

³ Numuuzyani, Yai: lomba mkakanoyaruka mitima namwe kumo monse mze mchenekeke tetila.

⁴ Kano ŵala kumi na asano na atatu, ŵeliponera lipembe la pa Silowamu noŵapaya, mulinga kuti ŵenze anyaluŵifya kupula ŵonse onkala mu Yerusalemi?

⁵ Numuuzyani, Yai: lomba mkakanoyaruka mitima namwe kumo monse mze mchenekeke.

⁶ Lomba esimika linganizyo ili lakuti, Muntu ngana enze na chiku wozikiwa mmunda wake wa mipesya, naye echizosakiramo vyotwala aliyofwanamo kantu.

⁷ Nipo enena na wolima mipesya, Ŵona, virimika ivi vitatu nikuzosaka vyotwala muli chiku uyu niliyofwanamo: muwisye; ni chinji pakuingolonda msoko?

⁸ Naye eyasuka enena naye, Asikuru, mlekeni na chaka chino, tanganimsakulile noŵikamo vipombwe:

⁹ nipo akatwala pavuli pake naaŵe; sembe kati ntemo, ninga mumtende.

¹⁰ Naye enzosambizya msunagoge liyake pa zuŵa la sabata.

¹¹ Lomba ŵonani, mwanakazi ana mzimu wolwala virimika kumi na visano na vitatu; naye enze wofokoŵala, sangaŵinuke peka patonto.

¹² Naye Yesu akamuŵone emuita nomuuzya, Mwanakaziwe, wamangululiwa mkulwala kwako.

¹³ Naye emsintilila manja: nipo lomba pano apa eyondololewa nomchinzika Mlungu.

¹⁴ Lomba mkuru wa sunagoge ponyeka mtima Yesu papozya pa sabata eyampukila eŵanenera maumba, Zuŵapo nsiku zisano na imo zyakukatilamo ŵantu milimo: teti mwakuzopozyewa mzyamene izyo, nte pa siku la sabata.

¹⁵ Sembe Asikuru emyasuka na kuti, Mwe mwaŵolipazya, kansi mweo monse pa sabata ntemumangulula ng'ombe yake kano bulu wake pa chilyero noipesera ku manzi?

¹⁶ Nga uyu mwanakazi pakuŵa mwana wa Abrahamu, wechimanga Satana, ŵonani, virimika kumi na visano na vitatu, kansi nte chiweme kumangululiwa pa chomangira ichi pa zuŵa la sabata?

¹⁷ Naye penzolaŵira ivi, ŵomsusya ŵonse ekolewa nsoni: na liumba lonse litemwa na vyonse vyamchinzi vichitika naye.

¹⁸ Teti echiti, Nga ufumu wa Mlungu uli nga ni chinji? niulinganisye nanji?

¹⁹ Ulingana na kambuto ka sinape kechiula muntu nokataya mmunda mwake; nako kekula na kuŵa chimuti, na tuni twa mlulezi twenzonkala mmisambo ya chine.

²⁰ Naye echiti soti, Niulinganisye nanji ufumu wa Mlungu?

²¹ Ulingana na chizamba chechiula mwanakazi nochifisa mmilingo itatu ya unga, mpaka wonse pewiŵila.

²² Lomba echiya epita pa mizinda na pa minzi enzosambizya noyave ku Yerusalemi.

²³ Nipo muntu enena naye kuti, Asikuru, kansi ŵala opuzumushiwa ni ŵopendeka? Naye eŵauzya,

²⁴ Mokoselela kuloŵa pa mulyango popatikizya: pakuti numnenelani anyinji azasakoloŵapo, sati akumeko.

²⁵ Mnecho akati uke nozalapo pa mulyango, namwe mkatatikopanama panja nokunta ku chisasa na kuti, Asikuru, mtizulileko; naye akayasuka nonena namwe, Sinumziŵani kwamwafuma;

²⁶ ninga motatikonena, Tenzekulya na kumwa pa menso panu, na mweo mwenzosambizya pa njira zyasu;

²⁷ naye anene kuti, Numuuzyani, sinuziŵa kwamwafuma; fumaponi pali neo, mwe mwa milimo iipa.

²⁸ Kuze kuŵepo kulila nokukuta menu, apo pamti mkaŵone Abrahamu na Isake na Yakobo na aŵirizi ŵonse mu ufumu wa Mlungu, na mweo mweka ŵopozewa kunja.

²⁹ Naŵo azafume ku matulilo a zuŵa na ku maloŵero na ku mpoto na ku mwera nonkala pansi mu ufumu wa Mlungu.

³⁰ Lomba ŵonani, alipo ŵosalilila amene azaŵe ŵotangula, alipo ŵotangula amene azaŵe ŵosalilila.

³¹ Pa nsita yamene ila echiza Afarisayo ŵambi echiti kwake, Fumaponi mwakuya: pakuti Herode osakompayani.

³² Naye eŵauzya, Kamuuzyeni nkandwe uyo, Ŵona, nufumya viŵanda nopozya lero na mailo, na mazo nize niwamyiwe.

³³ Lomba nakuya ulwendo wangu lero na mailo na mazo: pakuti sichukumika kuti muŵirizi achenekeke kunja kwa Yerusalemi.

³⁴ Aa Yerusalemi, Yerusalemi, uŵapaya aŵirizi noŵapozera myala ŵala otumiwa kwake! kangani kenisakolonganika pamo ŵana ŵako nga ni nkuku myulonganikira tusiyosiyo twa ine mmapapiko a ine, namwe mwikana!

³⁵ Ŵonani, ng'anda yanu yusiiwa kwanu ya chiza: nane numuuzyani, Simuniŵona soti mpaka pamti mnene, Ana shuko uyo akuza mzina la Asikuru.