Luka 12 - Mapangano Alomba 1923

¹ PA nsita yamene ila pechilongana mafwingomafwingo a ŵantu mpakokandana eyambonena na asambili ŵake potatika, Nkochenjerani mweo na chizamba cha Afarisayo, chamene chiri malipazyo.

² Sembe paliye kantu kovwinikiliwa kamene kati kakanovunukuliwa, na kofisika kamene kati kakanoziŵikwa.

³ Teti vyonse vimunena mu mfinzi vize vimvwike mkuŵala; navyo vimuŵereŵesya mkwatu mvipinda vya kuntambo vize viŵirizyiwe pa mitenje.

⁴ Nane nikuti kuli mweo mwakwasu, Msayopa ŵala oupaya muŵili, na pavuli pake aliye na kantu kochita soti.

⁵ Lomba nimsokeni ni ŵani umti moyopa: Muyopeni uyo wamene akapaya ana nsaka yopoza mGehenna; inde, numuuzyani, Yopani wamene uyo.

⁶ Kansi tumpeta tusano situsitiwa tundalama tuŵiri? na keka kamo ka uto koluŵika pa menso pa Mlungu.

⁷ Sembe chukanga sisi la mmutu wanu lupendewa lonse. Msayopa: mkufwa chitema chikuru kupula tumpeta tunyinji.

⁸ Nane numuuzyani kuti ali wonse ati anizomere pa menso pa ŵantu, tetyo naye Mwana wa muntu soti azamzomere pa menso pa malaika a Mlungu:

⁹ sembe uyo ati anikane pa menso pa ŵantu azakaniwe pa menso pa malaika a Mlungu.

¹⁰ Na ali wonse ati amnene Mwana wa muntu chize chilekelewe kwake: sembe uyo ati amchitire Mzimu Mtuŵa msikila sichiti chilekelewe kwake.

¹¹ Naŵo akamtwalani ku masunagoge na kwa achiyeruzya na ansaka msachita tupwe mumti muyasukire, na malizu ŵosyani, kano kunenanji:

¹² chikomo Mzimu Mtuŵa azamsambizyeni mkamfunda kamene kala vimti mnene.

¹³ Nipo umo wa mliumba emnenera, Asambizi, muuzyeni mkwasu ayaŵane nane chipuna.

¹⁴ Lomba enena naye, Muntuwe, ni ŵani eniika neo chipingula kano chipatula wa weo?

¹⁵ Naye eŵauzya, Nkochenjerani, molilesya ku kaso konse: pakuti moyo wa muntu suyana na mapakilo a chuma chali nacho.

¹⁶ Lomba eŵasimikira linganizyo echiti, Mmunda mwa msambazi ngana mwiwera vilyo vinyinji:

¹⁷ naye elinga yeka kuti, Nichitenji, panusoŵa molongera vilyo vyangu?

¹⁸ Naye echiti, Nichite teti: nipasule ntumba zyangu nomangisya zikuru; nze ntunshiremo mapira ŵangu ŵonse na vintu vyangu.

¹⁹ Nane niniti ku moyo wangu, We moyo, uli navyo vintu vinyinji vyoŵikiwira katera ku virimika vinyinji; pumula, ulye, umwe nosangalala.

²⁰ Sembe Mlungu emuuzya, We wopusa, usiku uno moyo wako usakiwe kwako; na vintu viwiikira katera viviŵe vya ŵani?

²¹ Woteti ni uyo olilongera yeka mpango, ntali nazyo mpango zya kwa Mlungu.

²² Naye enena na asambili ŵake, Ni panumuuzyani, Msachita tupwe na moyo wanu lakuti tilyenji; kano na muŵili wanu lakuti tivwalenji.

²³ Pakuti moyo upula vilyo, na muŵili upula minjira.

²⁴ Lukanani akwalala kuti ntokomola kano kusanja; aliye vimatilo kano mantumba; naye Mlungu oŵalyesya: ninga na mweo mupula ngako tuni!

²⁵ Ni ŵani wa mweo pochita tupwe angaliyangizye msinku mkono?

²⁶ Teti kati kumkangani kuchita na katonto, muchitiranji tupwe na viyake vila?

²⁷ Lukanani vipwiŵi mvukulila: sivukata milimo kano kuvuta; lomba numuuzyani, Chukanga Solomoni mu mtupo wake wonse aliyovwalila nga ni chimo cha ivi.

²⁸ Sembe kati Mlungu ouvwalika teti uzu wa msanga, wamene uŵapo lero na mailo utaiwa mu mchero, nga kansi ntangamvwalikeni mweo kopula, mwe mwatonto mvwano?

²⁹ Namwe msasaka chimti mulye na chimti mumwe, msalanguluka mmitima.

³⁰ Pakuti ivi vyonse ni viyusakasaka mitundu ya pano pansi: sembe Ausu wanu oziŵilatu kuti ivi vumsoŵani.

³¹ Lomba sakani ufumu wake, ivi ninga viyangizyiwe kwanu.

³² Msayopa, kamkusi ka mbelele; pakuti chumtemwesya Ausu wanu kumpani ufumu.

³³ Sitisyani vimuli navyo na kupa vyabule; mulitimire vibeti vya ndalama vyosaguka, mpango zya pamulu zyosalopa, piisaza njivi na kanzerenzere pasachecheta.

³⁴ Pakuti pali mpango zyanu na mtima wanu nawo ni pauti uŵe.

³⁵ Muluunda mwanu mwakuŵa momanga, na misaniko yanu yokolera;

³⁶ na mwaŵene mwakuŵa nga ni ŵantu ololera asikuru ŵaŵo pati awere ku winga; kuti akaza nokunta apuvyomzulilako.

³⁷ Ana shuko alumbwana ŵala asikuru akaza ŵati azafwange ali tuni: lezee numnenelani kuti azavwale noŵankalika ŵeve pakulya na kuzoŵatumikila.

³⁸ Naye akaza pa nsita yakaŵiri yolondezyana, kano pa yakatatu, noŵafwanga teti ana shuko alumbwana ŵala.

³⁹ Lomba ziŵani ichi, chakuti mnecho angati eziŵa nsita iiti izilemo njivi sembe echesya, sembe aliyoleka ng'anda yake kutuliwa.

⁴⁰ Namwe kumo moliwamyira futira: pakuti pa nsita imsalukana ni pati aze Mwana wa muntu.

⁴¹ Lomba Petro echiti, Asikuru, kansi musimikira linganizyo ili kuli seo kano na ku ŵonse?

⁴² Naye Asikuru echiti, Nga ni ŵani chilolesya wochetekereka na wanzeru asikuru wake wati aike pa a mchiŵanza chake kwasongezya pa nsita yake?

⁴³ Ana shuko mlumbwana uyo asikuru wake akaza wati afwange ochita tetyo.

⁴⁴ Lezee numuuzyani kuti amuŵike pa vyonse vyali navyo.

⁴⁵ Sembe kati mlumbwana uyo akati mu mtima mwake, Asikuru ŵangu amuka kuza, naye akatatikonyata alumbwana na vituntulu, na kulya na kumwa nokolwa,

⁴⁶ asikuru wa mlumbwana uyo aaze pa siku lasalolera, na pa kansita kasaziŵa, azamkoŵere nomuŵika chitwa chimo na ŵosazomera.

⁴⁷ Naye mlumbwana uyo wamene eziŵa vyakupangwa asikuru wake nosaikilatu, nosachita umo mwakupangwila, azanyatiwe na vitimbo vinyinji;

⁴⁸ sembe uyo asaziŵa, nochita vyowamila vitimbo, azanyatiwe na vitimbo vyopendeka. Kwa uyo naye wamene opewa vinyinji ni kuviti vize visakiwe vinyinji: na kwa uyo wakusungika vinyinji ni kwati azasake vinyinji ngako.

⁴⁹ Neo nichizopoza mulilo pa charo cha pansi; nga nusakanji kati ulukolere?

⁵⁰ Lomba nili nawo ubatizo unti nibatiziwe nawo; aa! niliye potukulukira mpaka pauti usilizike!

⁵¹ Kansi mulinga kuti nichizoleta mtendere pa charo cha pansi? numuuzyani, Yai; sembe ngakongako ni mapatukano:

⁵² pakuti chitatikile lomba azaŵemo asano mng'anda imo ŵopatukana, atatu ŵosusya aŵiri, na aŵiri ŵosusya atatu.

⁵³ Azapatukane, awisi na mwana wake, na mwana na awisi; anyina na mwana wake mwanakazi, na mwana mwanakazi na anyina; nyavyalawake na mmikazi, na mmikazi na nyavyalawake.

⁵⁴ Naye enena na maumba soti kuti, Mkaŵona mkumbi ukwera kuli mzambwe mupuvyonena kuti, Ikuza mvula yosusa; nipo yuŵapo.

⁵⁵ Nayo ikakunta mpepo ya ku mwera mkuti, Chikuza chiŵe; nacho chuŵapo.

⁵⁶ Mwe mwaŵolipazya, muziŵa kuchilinga chinso cha charo na kumulu; nga pamsaziŵa kulinga nsita ino.

⁵⁷ Ni chinji pamsapingula mweka chamene chiri chiweme?

⁵⁸ Pakuti paukuya pamo na muyako wa mlandu kwa chipingula, wopimpilila pa njira kuyana naye; kano angaye nawe kwa chipingula, na chipingula angakutwale ku chilolo, na chilolo chingakupoze mkambolimboli.

⁵⁹ Neo nukuuzya kuti suti ufumemo peka patonto, mpaka pauti ulipe kansilililo ka ndalama.