Luka 11 - Mapangano Alomba 1923

¹ NIPO yenzepo yeve enzolomba pachite, lomba akaleke umo wa asambili ŵake emnenera, Asikuru, tisambizyeni kulomba, nga ni umo Yohana naye mwechisambizyira asambili ŵake.

² Naye eŵauzya, Mkalomba monena, Ŵata, Zina lanu nalulemekewa. Ufumu wanu naukuza. [Vimupangwa navuchitiwa, nga ni kumulu tetyo na pano pansi.]

³ Mtipe nsiku zyonse chakulya chasu cha nsiku.

⁴ Mtilekere viipa vyasu, pakuti seo seka nase tuŵalekera amangaŵa ŵasu ŵonse. Msatiulila poyezyewa.

⁵ Naye enena naŵo, Nga ni ŵani wa mweo angaŵe na chiuza nochiila pakati posiku nochiuzya, Muyangu, muniyapuzye mitanda itatu;

⁶ pakuti chiuza changu chanizila, chiri polwendo, nane niliye kantu kochiteŵetera;

⁷ naye ali mkati angayasuke na kuti, Msaniŵevya: ku mulyango lomba ni kozala, na ŵana ŵangu ali nane pamo pa mpasa; siniuka kumpani?

⁸ Numuuzyani, Chukanga okanouka nompa pakuŵa chiuza chake, sembe chikomo cha ntina yake ni pati auke nompa vyonse vyakusaka.

⁹ Nane nikuti kuli mweo, Sengani, ninga chipewe kwanu; sakani, ninga mfwange; kuntani, ninga chizuliwe kwanu.

¹⁰ Pakuti ali wonse osenga opokera; na uyo osaka ofwanga; na uyo okunta chizuliwe kwake.

¹¹ Nga ni ŵani wa mweo akaŵa awisi, mwana wake akasenga mtanda angampe mwala? kano saŵi, angampe njoka pa malo pa saŵi?

¹² Kano akasenga sumbi kansi angampe chere?

¹³ Teti kati mweo pamuli mwaipa muziŵa kuŵapa ŵana ŵanu mitulo iweme, nga Ausu wanu a kumulu angaŵape ngako kupula Mzimu Mtuŵa ŵala omsenga?

¹⁴ Naye enzofumya chiŵanda chisilaŵira. Lomba yenzepo chikafume chiŵanda silaŵira elaŵira, na maumba ezuzuka.

¹⁵ Sembe ŵambi ŵechiti, Kwa Beelzebule mkuru wa viŵanda uyu ni pakufumya viŵanda.

¹⁶ Ŵambi naŵo pomuyezya esenga kwake chiziŵikwilo chofuma kumulu.

¹⁷ Sembe yeve poziŵa malingililo ŵaŵo eŵanenera, Ufumu uli wonse ukayaŵanikana kulisusya wine uchishiwa masala; na chiŵanza chikayaŵanikana kususya chiŵanza chupasuka.

¹⁸ Naye Satana soti akayaŵanikana kulisusya yeka, nga ufumu wake utang'e syani? pamulaŵira kuti nufumya viŵanda kwa Beelzebule.

¹⁹ Kati neo nufumya viŵanda kwa Beelzebule, nga ŵana ŵanu ovifumya kwa ŵani? teti ni pati aŵe ŵompingulani.

²⁰ Sembe kati nufumya viŵanda na munwe wa Mlungu, lomba ufumu wa Mlungu ulumzileni.

²¹ Apo wa chanalume ana mauta pakulindila luŵanza lwake viya vyake viri mtendere:

²² sembe apo wa chanalume wompula akamzila nomkanga, omlonda mauta ŵonse ŵenzochetekera noyaŵa vyotapa vyake.

²³ Uyo asali nane pamo onisusya; naye wamene asaunjika nane pamo omwazya tyala.

²⁴ Uyo mzimu wa usali ukafuma mmuntu uyendayenda pa chinkamu kusaka popumula; lomba popumbula ukuti, Niwerere ku ng'anda kwangu kwinifuma.

²⁵ Nawo ukaza uifwanga yopyerewa nosamikiwa.

²⁶ Pamene apo ukuya noliulila mizimu iyakene isano na iŵiri iipa kupula wine; nayo yuloŵamo nonkala: na unkalo wosalilila wa muntu uyo ni uŵipa kupula ula wotatika.

²⁷ Nipo yenzepo pechinena ivi mwanakazi muyake wa mliumba etumpula lizu lake nomnenera, Lina shuko vumo limvyalani na maziŵa emwinyonka.

²⁸ Sembe yeve echiti, Ngakongako mwandi ana shuko aŵo olimvwa lizu la Mlungu nolisunga.

²⁹ Lomba maumba penzomuunganila etatikonena, Luko luno ni luko luŵipa: lusaka chiziŵikwilo; lomba sichiti chipewe chiziŵikwilo kuli leve, sembe chiziŵikwilo cha Yona.

³⁰ Pakuti nga ni umo Yona mwenzele chiziŵikwilo kuli Anineve, tetyo naye soti Mwana wa muntu ni mwati azaŵere ku luko luno.

³¹ Mfumukazi ya kuli kampambe ize iukirane popinguzi ula na ŵantu a luko luno noŵapa mlandu: pakuti ifuma kunsilililo kwa mcharo kuza kumvwa nzeru zya Solomoni; lomba ŵonani, wompula Solomoni ali pano.

³² Ŵantu ŵala a ku Nineve azaimirane popinguzi ula na luko luno nolipa mlandu: pakuti eyaruka mitima poŵirizya kwa Yona; lomba ŵonani, wompula Yona ali pano.

³³ Paliye muntu akayasya msaniko ouŵika mchisengu kano mnyansi mwa chitundu, sembe pa chikalo nipo, kuti ŵala oloŵamo akuŵone kuyaka.

³⁴ Msaniko wa muŵili wako ni liso lako: liso lako likaŵa lamsuma muŵili wako nawo ni wozula kuŵala; sembe likaŵa liipa muŵili wako nawo ni wozula mfinzi.

³⁵ Teti nkoŵona kuti kuŵala kuli mwako kusaŵa mfinzi.

³⁶ Teti kati muŵili wako wonse ni wozula kuŵala, uliye pa malo pafipa, uzozule kuŵala monsemonse, nga ni msaniko muukusanikira poyaka kwa wine ngwee.

³⁷ Lomba penzolaŵira Mfarisayo emkonsha akalye kwake: naye eloŵamo nonkala pakulya.

³⁸ Naye Mfarisayo akaŵone ezizwa pakuti aliyotangulosamba pakulya.

³⁹ Asikuru enena naye, Lomba Mwafarisayo musuka kunja kwa ntumo na kwa lulilo; sembe mkati mwanu muluzule malilizya na viipa.

⁴⁰ Mwe mwaŵopusa, kansi uyo ekupoza kunja sempoza mkati namo?

⁴¹ Lomba ipani vyabule vya mkati; ŵonani, ninga vyonse vyakuŵa vyosukiwa kwanu.

⁴² Sembe malilo kwanu, Mwafarisayo! pakuti mupatula chimo cha pa kumi chiŵoleŵole na tumbuto twa luta na ndiŵo zyonse, nolumpila upinguzi nomtemwa Mlungu: lomba ivi mngati mwivichita, nosavileka viyake vyosachitiwa.

⁴³ Malilo kwanu, Mwafarisayo! pakuti mutemwa vilimba vya mchinzi mmasunagoge na malonje a pa mawalo.

⁴⁴ Malilo kwanu! pakuti muli nga ni mitupa yosaŵoneka, na ŵantu okandapo ntoziŵapo.

⁴⁵ Lomba umo wa adango ŵala eyasuka emnenera, Asambizi, pamunena teti mutituzula nase kumo.

⁴⁶ Naye enena, Malilo kwanu namwe, mwadango! pakuti mutwalika ŵantu mitolo yovufya kutwala, namwe mweka simuisunka mitolo na umo wa minwe yanu.

⁴⁷ Malilo kwanu! pakuti muimanga mitupa ya aŵirizi ŵala ŵechipaya amausu wanu.

⁴⁸ Teti nimwe ntoni nozomerezyana na milimo ya amausu wanu: pakuti ŵeve eŵapaya, na mweo muimanga mitupa yaŵo.

⁴⁹ Teti soti nzeru ya Mlungu ichiti, Nize niŵatumire aŵirizi na apostolo; ŵambi ŵala azaŵapaye noŵatamanya;

⁵⁰ kuti mlopa wa aŵirizi ŵala ŵonse wivwishiwa chitatikile ponkazikika charo cha pansi uzopindiwe ku luko luno,

⁵¹ chitatikile mlopa wa Abele mpaka mlopa wa Zakariya, echenekeka pakati popupila nsembe na pa ng'anda yozila: inde, numuuzyani uzopindiwe ku luko luno.

⁵² Malilo kwanu, mwadango! pakuti mwichiimyapo chozulila cha maziŵilo: muliyoloŵamo mwaŵene, na ŵala ŵenzoloŵamo mwiŵalesya.

⁵³ Naye akafumemo mulamwa alembi ŵala na Afarisayo eyambomuyumilizya nomuŵala alaŵire vinyinji;

⁵⁴ emfisamila nomsonda mkanwa.