Luka 10 - Mapangano Alomba 1923

¹ LOMBA pavuli pa ivi Asikuru ekoloŵeka ayakene makumi asano na aŵiri, eŵatanguzya aŵiri aŵiri pantanzi pake mmunzi uli wonse na mmalo muli monse, mwamene mwati aze mwine.

² Enena naŵo kuti, Kuwezya kupaka, sembe amilimo ni ŵochepa: teti momsenga mwine wowezya kuti alaizye amilimo ku kuwezya kwake.

³ Nkamuyani: Ŵonani, numtumani nga ni tumbelele pakati pa mimbulu.

⁴ Msatwala mkoba wa ndalama kano wa nkana, kano nkwaŵilo: msalonjera muntu pa njira.

⁵ Mnanda muli monse mumti mkaloŵe tangamnene, Mtende nauŵe ku nanda ino.

⁶ Kati akaŵamo mwamene mwana wa mtende, mtende wanu uswere pali yeve: sembe kati muliye, uwerere soti kwanu.

⁷ Mnanda mwamene mula nkalani, kulya na kumwa vyakupeleka: pakuti wamulimo owamila nkana zyake. Msatantamo mmang'anda

⁸ Mmunzi uli wonse umti mkaloŵemo, naŵo akampokelelani, ilyani vyakumteŵeterani,

⁹ noŵapozya alwele ali mwamene noŵauzya, Ufumu wa Mlungu wampanamilani.

¹⁰ Sembe mmunzi uli wonse umti mkaloŵemo, naŵo akakanompokelelani, fumani nkoyani ku miseo ya wine nonena,

¹¹ Chukanga lukungu la mmunzi wanu lukangamila ku malwayo ŵasu tulikunkumulila kwanu: lomba ziŵani ichi, chakuti ufumu wa Mlungu wapanamila.

¹² Neo numuuzyani kuti mlandu wa Sodoma suti uzokule pa siku lila nga ni ula wa munzi wamene uyo.

¹³ Malilo kwako, Korazini! malilo kwako, Betsaida! pakuti vyampamvu vichitika muli mweo vingati vichitika mTuro na mSidoni sembe eyaruka mitima chombalimbi, nonkala mvigudulu na mlito la paziko.

¹⁴ Lomba mlandu wa Turo na wa Sidoni suti uzokule popinguzi ula nga ni wanu mweo.

¹⁵ Nawe Kapernaumi, uzotumpuliwe kumulu kansi? uzosishiwe mpaka mu Hade.

¹⁶ Uyo ommvwilani mweo onimvwila neo; na uyo omkanani mweo onikana neo; na uyo onikana neo omkana uyo enituma.

¹⁷ Naŵo ŵala makumi asano na aŵiri ewerako notemwa echiti, Asikuru, chukanga viŵanda vutinakira mzina lanu.

¹⁸ Naye eŵauzya, Nimuŵona Satana epona nga ni kalaŵelaŵe kufuma kumulu.

¹⁹ Ŵonani, nimpani nsaka yokandila njoka na vichere na mpamvu yonse ya kapondo ako: paliye kantu kati komlasani peka patonto.

²⁰ Lomba msasangalala pa ichi chakuti viŵanda vumnakirani: sangalalani ngakongako pakuti mazina ŵanu alulembewe kumulu.

²¹ Pa kansita kamene kala yeve esangalala mwa Mzimu Mtuŵa echiti, Numlumbani, mwe Ŵata, Asikuru wa kumulu na pansi, pemwifisa ivi ku anzeru na kwa aŵo oziŵa novivundulula ku malucheche: inde, Ŵata, pakuti choteti chenze chotemwesya mmenso ŵanu.

²² Vyonse vinipewa na Ŵata ŵangu: paliye muntu oziŵa kuti Mwana ni ŵani, sembe Ŵata niŵo; na kuti Ŵata ni ŵani, sembe Mwana niye, na ali wonse wakupangwa Mwana kumvundululila.

²³ Nipo eŵacheukira asambili echiti kunsei, Ana shuko menso amene oviŵona ivyo vimuŵona mweo:

²⁴ pakuti nikuti kuli mweo kuti aŵirizi na mafumu anyinji enzopimpilila kuviŵona vimuŵona mweo, aliyoviŵona; na kuvimvwa vimkumvwa mweo, aliyovimvwa.

²⁵ Lomba ŵonani, chite msambizi wa dango epanama emuyezya echiti, Asambizi, nichitenji kuloŵa mu upyani wa moyo wosasila?

²⁶ Echiti kwake, Mdango mwilembewa vinji? upenda syani?

²⁷ Naye poyasuka echiti, Womtemwa Asikuru Mlungu wako na mtima wako wonse, na moyo wako wonse, na vizo vyako vyonse, na nzeru zyako zyonse, na mwanansi wako nga ni muulitemwera weka.

²⁸ Enena naye, Wayasuka paweme: nkochita teti, ninga wakuŵa na moyo.

²⁹ Sembe yeve esakolikanila enena na Yesu, Nga mwanansi wangu ni ŵani?

³⁰ Yesu eyasuka echiti, Muntu enzofuma ku Yerusalemi kusikira ku Yeriko: naye ekumana na tupondo, twamene twimvula minjira twimnyata nofumako, kumsiya pafupi na kufwa.

³¹ Chite wansembe enzekuya chimyenderamo mnjira ila: naye akamuŵone elambalala mmbali.

³² Tetila na Mulevi soti pechifwikapo nomuŵona elambalala mmbali.

³³ Sembe Msamariya chite enze polwendo wake echiza penze yeve: naye akamuŵone emchitira chifundo,

³⁴ echiza kwake empombezya mmaluma notiramo mafuta na mvinyu; emkwereka pa nyama yake mwine, empelekezya ku ng'anda ya alwendo nomsungisya.

³⁵ Lomba mmawa mwake efumya makobiri aŵiri, empa mwine wa ng'anda ya alwendo echiti, Msungisye uyu; iri yonse iuti utaye yopulamo neo nikazowera soti nze nkuwezezye.

³⁶ Ni ŵani wa aŵa atatu, ulinga, enze mwanansi wake wa uyo ekumana na tupondo uto?

³⁷ Echiti, Ni uyo emchitira chifundo. Yesu naye emuuzya, Nkoya nawe, ukochita teti.

³⁸ Lomba ŵeve penzekuya eloŵa yeve mmunzi wakuti: naye mwanakazi chite zina lake Malita empokelela mng'anda yake.

³⁹ Enze naye mkwaŵo zina lake Mariya, wamene soti enkala pansi mnkonde mwa Asikuru na kumvwa malizu ŵake.

⁴⁰ Sembe Malita echenjerekwa na viteŵeto vinyinji; naye emzila na kuti, Asikuru, kansi simuŵikako mtima kuti mkwasu wanilekelela kuteŵeta neka? teti muuzyeni aniyavye.

⁴¹ Sembe Asikuru eyasuka emuuzya, Malita, Malita, uchita tupwe notamana na vinyinji:

⁴² sembe chintu chimo chasoŵa: pakuti Mariya wasalula chitwa chiweme chamene sichiti chilondewe kwake.