Aroma 1 - Mapangano Alomba 1923

¹ PAULO, kapolo wa Yesu Kristo, woitiwa kuŵa mpostolo, wopatuliwa ku evangelo ya Mlungu,

² yechipangana kale mwa aŵirizi ŵake mmalembo ŵozila,

³ ya Mwana wake, evyalikwa mu mbuto ya Davide mwa muŵili,

⁴ eikiwa kuŵa Mwana wa Mlungu kwa mpamvu mwa mzimu wa utuŵa pozyuka soti kwa akufwa; ni Yesu Kristo Asikuru wasu,

⁵ mwitipokera muli yeve chawanzi nopostolo komvwila kwa mvwano mmitundu yonse, chikomo cha zina lake:

⁶ mwa aŵa ni mmuli soti, ŵoitiwa kuŵa a Yesu Kristo:

⁷ kuli ŵonse ali mu Roma, ŵotemweka na Mlungu, ŵoitiwa kuŵa asanto: Chawanzi kwanu na mtendere kufumila kwa Mlungu Ausu wasu na Asikuru Yesu Kristo.

⁸ Potatika numuŵonga Mlungu wangu mwa Yesu Kristo kwa mweo monse, pakuti mvwano wanu uŵirikila mvyaro vyonse.

⁹ Pakuti Mlungu ni ntoni yangu, unutumikila mu mzimu wangu pa evangelo ya Mwana wake, yakuti numtomolani kosaleka,

¹⁰ nosenga nsiku zyonse mmalombero ŵangu, kano lomba posila niŵe na shuko pa chipangwilo cha Mlungu lomzilani.

¹¹ Pakuti nulyokalyoka kumuŵonani, kuti nimpekoni mtulo wa mwa mzimu lona kuti mnkazikike;

¹² wakuti neo pamo namwe nipuzishiwe muli mweo, tonse na mvwano wa ayasu, wanu na wangu.

¹³ Sinupangwa muŵe ŵosaziŵa, akwasu, kuti kanyinji nichiti mu mtima mwangu nikamzileni (lomba nuchenjerekwa kuza na lero), niŵe na chotwala muli mweo soti, nga ni mwa a Mitundu ŵambi.

¹⁴ Nina mangaŵa kwa Ahellene na kwa Akunja, kwa anzeru na kwa aliye nzeru.

¹⁵ Teti, umo mnukumikirako neo, nuliikilatu kuŵirizya evangelo kwanu soti mwe muli mu Roma.

¹⁶ Pakuti sinikumvwa nsoni na evangelo: chikomo ni mpamvu ya Mlungu ya ku upuzumushi ku ali wonse ozomera, ku Muyuda potatika, na ku Muhellene soti.

¹⁷ Pakuti muli yeve ni muvundululiwa chilungamo cha Mlungu chofumila ku mvwano nopewa ku mvwano: umo mkwilembewera, Sembe ŵolungama azaŵe moyo na mvwano.

¹⁸ Chikomo ukali wa Mlungu uvundululiwa kufumila kumulu kosusya kusasoŵa Mlungu konse nosalungama kwa ŵantu, ovindikizya vyendi pa vyosalungama;

¹⁹ pakuti icho chingaziŵikwe cha Mlungu chuŵoneka muli ŵeve, chikomo Mlungu echiŵonesya kuli ŵeve.

²⁰ Pakuti vyosaŵoneka vya yeve chitatikile popoza vyaro vuŵonekesya, pavuziŵikwila na vyochitiwa, ni mpamvu yake ya mtatakuya nomlungu wake; tetyo ni paaliye mpandila:

²¹ pakuti pomziŵa Mlungu aliyomlemekezya nga ni Mlungu, kano kuŵonga; lomba enze atyalatyala pa masusyano ŵaŵo, na mtima waŵo wopululila wifipishiwa.

²² Polisokolola kuŵa anzeru echiŵa ŵopusa,

²³ nosintanisya mchinzi wa Mlungu wosaŵola ku maŵonekero a kalango ka muntu woŵola, na ka tuni, na vilwani vya mendo ŵane, na vyokalaŵa.

²⁴ Tetyo Mlungu ni pechiŵatailizya mmakumbwilo a mmitima yaŵo ku vyachiputa, vyakuti miŵili yaŵo ichitiwa mpuvu mwa ŵeve:

²⁵ pakuti esintanisya vyendi vya Mlungu ku wenye, nolambila notumikila chopozewa kumpula Wopoza, woŵirikila mperampera. Amen.

²⁶ Chikomo choteti Mlungu ni pechiŵatailizya ku makumbwilo a mzundu: pakuti anakazi ŵaŵo esintanisya unkalo wa chivyalikwilo ku uyo usali wa chivyalikwilo:

²⁷ tetyo na analume soti eleka unkalo wa chivyalikwilo wa anakazi nochentulana mmakumbwilo ŵaŵo umo na muyake, analume kuchita vyansoni na analume ayaŵo, nolipokera chilambu chowamila umavyavya waŵo.

²⁸ Nipo nga ni umo mwechikanila kuŵa naye Mlungu nomziŵilatu, Mlungu eŵatailizya ku mtima woluvika, kuchita vyosawamila,

²⁹ powanda vyosalungama, uŵipa, kaso, chigwininti; nopaka ukwa, upondo, mulomo, chiŵepeko, kapate; ŵoŵereŵesya,

³⁰ akulya nkonto, ŵomtinka Mlungu, anchululila, ampuvya, ŵolilumba, ŵosonsomba viipa, ŵosamvwila eŵavyala,

³¹ aliye nzeru, ŵosula mapangano, aliye chintemwa, aliye chifundo:

³² amene, poŵaziŵa matetulo a Mlungu akuti ŵala ochita vyoteti owamila imfwa, ntovichita vyamene ivi tyala, lomba ozomerana na ŵala ovichita.