Akolose 1 - Mapangano Alomba 1923

¹ PAULO, mpostolo wa Kristo Yesu mchipangwilo cha Mlungu, na Timoti mkwasu,

² kwa asanto na akwasu omchetekera Kristo a pa Kolose: Chawanzi kwanu na mtendere kufumila kwa Mlungu Ausu wasu.

³ Tumpa chiŵongo Mlungu Awisi a Asikuru wasu Yesu Kristo, nomsengerani mweo nsiku zyonse,

⁴ petichimvwa zyozomera kwanu mwa Kristo Yesu, na zya chitemwano chimuli nacho kuli asanto ŵonse,

⁵ chifukwa cha chigomezyo icho chosungiwira kwanu kumulu, chamene chimwichimvwa zyake kale mu lizu la chendi cha evangelo,

⁶ ila imzilani; nga ni umo mwilili soti mvyaro vyonse yochita vyotwala nokula mtalalila, nga ni muli mweo soti, chitatikile pa siku limwimvwilamo noziŵa chawanzi cha Mlungu pa vyendi;

⁷ nga ni umo mmwisambilila kwa Epafra kapolo muyasu wotemweka, wamene ali mtumiki wochetekereka wa Kristo pa mutu wasu,

⁸ wamene soti etilululila chitemwano chanu cha mwa Mzimu.

⁹ Chikomo choteti nase kumo, chitatikile pa siku litimvwilamo, ni patisaleka kusengera nopapatilila mweo, kuti mozula kuziŵa chipangwilo chake mnzeru zyonse zya mwa mzimu na mkuziŵisya,

¹⁰ koyendayenda umo mkumuwamilila Asikuru kotemwesya konse, kuchita vyotwala pa milimo yonse iweme nosunsuruka mkumziŵa Mlungu;

¹¹ potang'ishiwa na mpamvu zyonse mwa vizo vya mchinzi wake, kosisikanya konse na kalekelezi na chimwemwe;

¹² kumpa Ŵata chiŵongo etiwamizizya kusanzyana mu upyani wa asanto ŵala a mkuŵala.

¹³ Etipokesya mu mpamvu ya mfinzi, notisezyera mu ufumu wa Mwana wake wotemweka:

¹⁴ muli yeve ni mtiri nako kuŵombolwa kwasu, kulekelewa kwa viipa vyasu:

¹⁵ wamene ni chipazyo cha Mlungu wosaŵoneka, wawiya wa vyopozewa vyonse;

¹⁶ pakuti muli yeve ni mviumbiwa vyonse, vya kumulu na vya pa charo, vyoŵoneka na vyosaŵoneka, kano vilimba vyofumu kano maukuru kano maunduna kano mansaka; vyonse viumbiwa mwa yeve na kuli yeve;

¹⁷ naye niye wa pantanzi pa vyonse, na muli yeve ni mvukamantana vyonse.

¹⁸ Yeve ni mutu wa muŵili, ni eklezya: wamene ni chiyambi, wawiya wa mwa akufwa, kuti mvyonse aŵekuŵa wotatika.

¹⁹ Chikomo kwimtemwesya Awisi kuti mwa yeve ni mwati aŵonkala mazulilo ŵonse,

²⁰ na kwa yeve kuyanisya vyonse na mwine, akachite mtendere mu mlopa wa pa msalaba wake; kwa yeve niko, kano vya pa charo, kano vya kumulu.

²¹ Na mweo, amene mwenze kale amazeze nopondo mmitima yanu mmilimo yanu iipa, lomba emuyanisyani

²² mmuŵili wa nyama yake pakufwa, amtwaleni atuŵa mitima na chiliye chilema na ŵosasomokewa pa menso pake:

²³ kati mkankalilila mu mvwano, ŵozikiwa na ŵonkazikika na ŵosatera pa chigomezyo cha evangelo imwichimvwa, iŵirizyiwa mvyopozewa vyonse pansi pa lulezi; inichishiwa neo Paulo mtumiki wa ine.

²⁴ Lomba nusangalala mkuzingwa kwangu pa mutu wanu, nokumanizya neo mmuŵili wangu visoŵa mmatamano a Kristo pa mutu wa muŵili wake, ni eklezya.

²⁵ Nichishiwa mtumiki wa ine, mu uchilolesya wa vya Mlungu wipewa kwangu kuli mweo wolikumanizya lizu la Mlungu,

²⁶ ni chakunsei chifisiwa chitatikile pa nsita zyonse na maluko, sembe lomba chivundululiwa kwa asanto ŵake,

²⁷ ŵechitemwa Mlungu kwaziŵisya mpango zya mchinzi wa chakunsei ichi mwa a Mitundu ni vinji, chamene ni Kristo muli mweo, chigomezyo cha mchinzi.

²⁸ Tuŵira mbila yake, nosoka ŵantu ŵonse noyeruzya ŵantu ŵonse mnzeru zyonse, kuti totwala ŵantu ŵonse ŵowamizyiwiratu mwa Kristo;

²⁹ kwa ichi ni kunuvupira nane soti, nokoselela mmachitiwilo ŵake ochita mulimo muli neo kwa mpamvu.