Afilipi 1 - Mapangano Alomba 1923

¹ PAULO na Timoti, akapolo a Kristo Yesu, kwa asanto ŵonse a mwa Kristo Yesu a pa Filipi, pamo na aaskofu na atumiki:

² Chawanzi kwanu na mtendere kufumila kwa Mlungu Ausu wasu na Asikuru Yesu Kristo.

³ Numyamika Mlungu wangu pali ponse nikamkumbukani,

⁴ nsiku zyonse mkupapatira kwangu konse kuli mweo nupapatira kosekera,

⁵ chifukwa chomvwana kwanu mkukumanya evangelo chitatikile siku lotatika kuza na lomba.

⁶ Nuchetekera chamene ichi, chakuti uyo eŵangila mulimo uweme muli mweo azausilizye kuza na ku siku la Yesu Kristo:

⁷ nga ni umo mkuniwamilila neo kulinga teti zya mweo monse, pakuti ku menso kwangu kwakula, chikomo mmanjerenjende ŵangu na mkupanamila notang'isya evangelo mweo monse musanzyana nane mchawanzi.

⁸ Pakuti Mlungu ni ntoni yangu yakuti nulyokalyoka mweo monse mmalusungu a Kristo Yesu.

⁹ Nane nusenga ichi, chakuti chitemwano chanu chiwande mtalalila mkuziŵisya nopatula konse;

¹⁰ kuti molinga wino ivyo vusiyana, na kuŵa na mitima iliyomwaru nosaponta kantu mpaka na siku la Kristo;

¹¹ mozula chotwala cha vyolungama, chamene chiri mwa Yesu Kristo, viŵeko kwa Mlungu mchinzi na malumbo.

¹² Lomba nupangwa mziŵe, mwakwasu, kuti vila vyenze pali neo vuponera ngakongako kokumanya evangelo,

¹³ teti nsinga zyangu ni peziŵonekera pasweta mwa Kristo pa liumba lonse la manjolinjoli a Kaisari na ku ŵonse esalapo;

¹⁴ na winji wa akwasu a mwa Asikuru pochinchila na nsinga zyangu ni pakupulamo nokaŵalala kulilaŵira lizu la Mlungu chiliye mwezo.

¹⁵ Ayake mwandi omuŵirizya Kristo kwa tima na kayambamulomo; na ayake soti kwa mtima umo:

¹⁶ ŵambi otetyo kwa chintemwa, pakuziŵa kuti niluŵikiwe kochilikila evangelo:

¹⁷ sembe ŵambi otetyo kopumvya, kwa umwaru, nolinga kuti anikulile mazuzyo mnsinga zyangu.

¹⁸ Ni chinji nakale? nte kantu sembe kuti monsemonse, kano mmalipazyo kano mvyendi, Kristo oŵirizyiwa. Neo nutemwa nako, inde nakutemwa,

¹⁹ panuziŵa kuti ichi chiniyarukile kuŵa upuzumushi, mmalombero ŵanu na mmapero a Mzimu wa Yesu Kristo,

²⁰ umo mnulolera nogomezya, nisakula mutu mkantu konse, sembe kwa mkanka wonse, nga ni nsiku zyonse teti na lomba kumo, Kristo atumpuliwe mmuŵili wangu, kano mmoyo kano mkufwa.

²¹ Pakuti kuli neo kuŵa na moyo ni Kristo, na kufwa ni pindu.

²² Sembe kuŵa na moyo mmuŵili — kati uku ni chotwala cha mulimo wangu, ninga chinti nisalule sinuziŵa.

²³ Lomba nupanikiwa na ivi viŵiri, panili nako kupangwa koimapo na kuŵa mnkonde mwa Kristo; ni kuweme kwene kantu:

²⁴ sembe kuŵererera mmuŵili ni kowamila ngako pa mutu wanu.

²⁵ Nane panina chigomezyo ichi nuziŵa kuti niŵererere, inde, niŵererere na mweo monse, kosunsuruka kwanu notemwa na mvwano;

²⁶ kuti kulitamya kwanu kuwande kwa Kristo Yesu muli neo mkusokoloka soti kwangu pali mweo.

²⁷ Ichi cheka chakuti mayendero ŵanu nakuŵa ŵowamila evangelo ya Kristo: kuti nikazomuŵonani kano nikakanoŵapo nitanikilwe mankalilo ŵanu akuti mulimbilila mu mzimu umo, nolwila mvwano wa mu evangelo na mtima umo.

²⁸ Msaŵa na maswenta mkantu konse na ŵala omsusyani: kwamene ni chiziŵikwilo cha machenekeko kuli ŵeve, sembe kwanu ni chopuzumushi, ula wofumila kwa Mlungu;

²⁹ pakuti kwanu kulupewe pa mutu wa Kristo nte kumzomera kweka, sembe soti kuzuzika pa mutu wake,

³⁰ mwina malangulusi emwiŵona muli neo, na lomba amkumvwa a muli neo.