Aefeso 6 - Mapangano Alomba 1923

¹ MWE mwanamwe, amvwileni emvyalani mwa Asikuru, pakuti ichi nchiweme.

² Wolemekezya auso na anyoko (nilo tetulo lotatika lina chipango),

³ kuŵe kuweme kwako, soti ulalukisye pa charo.

⁴ Namwe ŵata, msatatika ŵana ŵanu, sembe kwalela mkulanga na mkuchimula kwa Asikuru.

⁵ Mwe mwakapolo, amvwileni aŵo emtekani mmuŵili, noyopa nongatamila, na mitima yanu iliyomwaru, nga ni kwa Kristo;

⁶ nte mu ukapolo wa pa menso, nga ni ŵotemwesya ŵantu, sembe nga ni akapolo a Kristo, ŵochita chipangwilo cha Mlungu na mtima.

⁷ Motumikila notemwa, nga ni kumtumikila Asikuru, nte ŵantu,

⁸ pamuziŵa kuti vyonse viweme vyakuchita ali wonse azapokere soti vyamene kwa Asikuru, kano ni mulanda, kano ni mwanoŵene.

⁹ Namwe mwasikuru, moŵachitila tetila nolekopingila, pamuziŵa kuti Asikuru ŵaŵo na ŵanu ali kumulu, na kuti kuli yeve kuliye salu.

¹⁰ Mvyosalapo, mtang'ishiwe mwa Asikuru na mu mpamvu ya vizo vyake.

¹¹ Vwitikilani mauta ŵonse a Mlungu, kuti mukoselele kususya machencheneko a muŵepeki.

¹² Pakuti kuusyana kwasu kosali na muŵili wa mlopa na nyama, sembe na maukuru, na mansaka, na mafumu a mfinzi yalomba oyeruzya mcharo cha pansi, na maumba aipa a mizimu kumulu.

¹³ Chifukwa choteti moliulira mauta ŵonse a Mlungu, kuti mukoselele msiku lila liipa, nipo mkazosila milimo yonse kuimilatu.

¹⁴ Teti imani, ŵolimangila vyendi muluunda, nolivwika pa chifuŵa chichilingizyo cha chilungamo,

¹⁵ nolimangila mmalwayo chiwamizyo cha evangelo ya mtendere;

¹⁶ moliulira soti chisyango cha mvwano, chimti mozimyirako mimvwi yonse yoyaka mulilo ya nyaluŵifya ula.

¹⁷ Ulani soti chapeu chopuzumushi, na chinkalammanja cha Mzimu, chamene chila ni lizu la Mlungu.

¹⁸ Nsita zyonse mosenga mwa Mzimu na masengero ŵonse na mapapatiro, nosimpamo posensera konse nosengera asanto ŵonse,

¹⁹ na neo kumo, kuti malizu apewe kuli neo popambanula pakanwa pangu, niziŵisye na mkanka chakunsei cha evangelo,

²⁰ inili pali yeve nkalamba ya mmanjerenjende; kuti mu yeve nilaŵire kwa mkanka, nga ni umo mnuwamilila kulaŵira.

²¹ Lomba kuti namwe kumo mziŵe zya kuno kwangu, mununkalila, Tukiko, mkwasu wotemweka na mtumiki wochetekereka mwa Asikuru, azamziŵisyeni vyonse:

²² unutuma kwanu lona kuti mziŵe mankalilo ŵasu, soti ampuzisyeni mitima.

²³ Mtendere uŵe kwa akwasu, na chintemwa na mvwano, kufumila kwa Mlungu Ŵata na Asikuru Yesu Kristo.

²⁴ Chawanzi chiŵe pali ŵonse omtemwa Asikuru wasu Yesu Kristo kwa chinkalilizi.