Aefeso 5 - Mapangano Alomba 1923

¹ TETI iŵani ŵomkonkesya Mlungu nga ni ŵana ŵotemweka;

² noyendayenda mchitemwano, umo Kristo naye mwechimtemwerani nolitwala pa milandu yasu, chopupila na nsembe kwa Mlungu kwa chinunko chonunkila paweme.

³ Sembe kachenche na usali wonse kano ulakalaka, kunenewa visanenewa muli mweo peka patonto, umo mkuŵawamilila asanto;

⁴ kano chiputa, kano kulaŵira vyopusa, kano myati, ivyo visawamila: sembe ngakongako chiŵongo.

⁵ Pakuti ichi muchiziŵisya ngako chakuti paliye wakachenche, kano wa usali, kano wolakalaka wolambila tulango, ati azapyane ufumu wa Kristo na wa Mlungu.

⁶ Asamuŵepekani muntu na malizu atyala: pakuti chikomo cha ivi kukalipa kwa Mlungu ni pakuŵazila ŵana a mpwazyo.

⁷ Teti msaŵa ŵosanzyana naŵo;

⁸ pakuti mweo mwenze kale mfinzi, sembe lomba muli chiŵalilo mwa Asikuru: moyendayenda nga ni ŵana a mchiŵalilo

⁹ (pakuti chotwala cha mkuŵala chiri poweme wonse na pa chilungamo na vyendi),

¹⁰ kuziŵisya vyomtemwesya Asikuru ni vinji.

¹¹ Msasanzyana na milimo yosatwala ya mfinzi, sembe ngakongako mwikanisye;

¹² chikomo vila vuchitika naŵo kunsei, chukanga kuvilaŵira kumvwisya nsoni.

¹³ Sembe vyonse vikakanishiwa vuvundululiwa pasweta na chiŵalilo: pakuti chiri chonse chovundululiwa pasweta ni chiŵalilo.

¹⁴ Teti ni pakunena yeve, Iŵa menso, weo uli mtulo nouka kwa akufwa, ninga Kristo akuŵalile.

¹⁵ Teti lolesyani wino umo mmuyenderayendera, nte nga muliye nzeru, sembe ena nzeru,

¹⁶ kokumanizya nsita pakuti nsiku ziri ziipa.

¹⁷ Teti msaŵa ŵobwata, lomba ziŵani chipangwilo na Asikuru ni vinji.

¹⁸ Msakolwa walwa, mwamene muli machentukilo, lomba mozula Mzimu;

¹⁹ molaŵizyana mweka na masalmo na nzimbo na mazumilo a mwa mzimu, ŵoimba nopinda kosekera na mitima yanu kwa Asikuru;

²⁰ nsiku zyonse mumpe Mlungu Ŵata chiŵongo kwa vyonse mzina la Asikuru wasu Yesu Kristo,

²¹ nonakirana umo na muyake mkumuyopa Kristo.

²² Mwe mwatengwa, molisisya kwa alume ŵanu, nga ni kwa Asikuru.

²³ Chikomo mwanalume ni mutu wa mkazi, nga ni Kristo naye mwalili mutu wa eklezya, pakuŵa mwine mpuzumushi wa muŵili.

²⁴ Lomba nga ni umo eklezya myulisisyira kwa Kristo, na anakazi naŵo ni mwati aŵoŵera kwa alume ŵaŵo mvyonse.

²⁵ Mwe mwanalume, temwani akazi ŵanu, nga ni umo Kristo naye mwechiitemwera eklezya nolitwala kuli yeve;

²⁶ kuti aituvye pamene akaisuke na masukilo a manzi pamo na lizu,

²⁷ kuti alipe mwine eklezya ya mchinzi, iliye maŵala kano mankwinya, kano viri vyonse vyoteti; sembe kuti yakuŵa ituŵa na iliye chilema.

²⁸ Na analume kumo naŵotemwa tetyo akazi ŵaŵo ŵene nga ni miŵili yaŵo ŵene. Uyo omtemwa mkazi wake olitemwa mwine:

²⁹ pakuti paliye yeka umo etinka muŵili wake mwine nsita zyonse; lomba ouchizya noufukata, nga ni Kristo soti na eklezya:

³⁰ pakuti se nise vizo vya mmuŵili wake.

³¹ Chikomo choteti mwanalume ni pati asiye awisi na anyina nosungana na mkazi wake; naŵo ŵonse aŵiri aŵekuŵa muŵili umo.

³² Chakunsei ichi ni chikuru: lomba nulaŵira zya Kristo na zya eklezya.

³³ Lomba namwe kumo umo umo motemwa ali wonse mkazi wake mwine nga ni mwakulitemwera mwine; na mkazi nayope mulume wake.