Aefeso 4 - Mapangano Alomba 1923

¹ LOMBA neo, wa mnsinga wa Asikuru, numchimulani kuyendayenda kowamila maitiwe emwiitiwa naŵo,

² nolichefya konse nosisikanya, na kalekelezi, nomvwana umo na muyake mchitemwano;

³ mochita ntina yosunga umo wa Mzimu mchomangira cha mtendere.

⁴ Pali muŵili umo, na Mzimu umo, nga ni umo mmwiitiwira soti mchigomezyo chimo cha maitiwe ŵanu;

⁵ Asikuru umo, mvwano umo, ubatizo umo,

⁶ Mlungu umo na Ausu waŵo ŵonse, wamene ali pamulu pa vyonse, na kwa vyonse, na mvyonse.

⁷ Kwa seo umo umo kwipewa chawanzi chila umo muwenzele mlingo wa mtulo wa Kristo.

⁸ Tetyo ni pechiti, Pamene pechikwera kumulu echisya ukapolo uŵe kapolo, Noŵapa ŵantu mitulo.

⁹ (Lomba ichi chakuti ekwera, ni chinji sembe kuti esika soti mvitwa vya pansi pa charo?

¹⁰ Uyo wamene esika ni wamene soti ekwera pamulu pa pamulu kuti azuzye vyonse.)

¹¹ Naye eŵapa ŵambi kuŵa apostolo, na ŵambi aŵirizi, na ŵambi aevangelisti, na ŵambi achiŵeta na asambizi;

¹² kowamisya asanto, ku mulimo wotumikila, kolunduluzya muŵili wa Kristo:

¹³ mpaka seo tonse patiti tikafwike ku umo wa mvwano na womziŵisya Mwana wa Mlungu, ku muntu wopera, ku mlingo wa msinku wa mazulilo a Kristo.

¹⁴ Tisaŵa soti asaza, ŵotenukatenuka nopyepyuuliwapyepyuuliwa na mpepo yonse ya mayeruzyo, na mayere a ŵantu, mchiŵepeko, mu uchenjezi woluvisya;

¹⁵ sembe ponena vyendi mchitemwano tosunsuruka mvyonse mwa yeve, wamene ni mutu, ni Kristo.

¹⁶ Kufumila mwa yeve muŵili wonse wokumikizyiwa nolundikiwa pamo poyavyana kwa mayano ŵonse, umo mchuchitira chizo chiri chonse mulimo wake wowamila, uukuzya muŵili kolilunduluzya weka mchitemwano.

¹⁷ Teti nunena ichi nochita untoni mwa Asikuru wakuti lomba msayendayenda mweo umo mwakuyenderayendera a Mitundu naŵo, mchimeko cha mitima yaŵo,

¹⁸ popewa chififya mnzeru zyaŵo, nochishiwa apakwenda pa moyo wa Mlungu chikomo chopululila kuli mwaŵo, mlandu woyumisya mitima yaŵo;

¹⁹ amene ŵala palutindile elitwala ŵeka ku videde, kuchita chiputa chonse kolilizya.

²⁰ Sembe mweo muliyomsambila teti Kristo,

²¹ kati mwimmvwila kaya noyeruzyiwa mwa yeve, nga ni umo vyendi mvilili mwa Yesu:

²² kuti mvule mmankalilo ŵanu ŵotatika untu wakale, uyo usasilatu posakila makumbwilo ŵosempa;

²³ na kuti mchitiwe alomba mu mzimu wa malingililo ŵanu,

²⁴ novwala untu walomba, uyo wipozewa mchipazyo cha Mlungu mchilungamo na mu utuŵa wa chendi.

²⁵ Kwa ichi motaya wenye nolaŵira vyendi ali wonse na muyake: pakuti se nise vizo vya umo na muyake.

²⁶ Pokalipa msaponta: zuŵa lisachoma pa kapatikizya kanu,

²⁷ pambi msampa chikalo muŵepeki ula.

²⁸ Uyo enzopunsha asapunsha soti: sembe ngakongako naŵochicha kukata na manja ŵake mulimo uli uweme, kuti aŵe nacho chompa uyo osoŵelwa.

²⁹ Kulaŵira konse kosasa kusafumila pakanwa panu, sembe kotetyo ni kowamila kumanga munzi ikaza nsita yake, kuti kuŵape chawanzi aŵo akumvwa.

³⁰ Msamndandaulisya Mzimu Mtuŵa wa Mlungu, mwa yeve mmwikomewa malaka ku siku lonunuliwa.

³¹ Ululu wonse, na nkanza, nonyeka mtima, nosemekezyana, na msankantila navulekewa pali mweo, na kaŵikiŵiki konse:

³² namwe mochitirana chisomo umo na muyake, na kuŵa na mitima ya chitinti, ŵolekelelana, nga ni umo Mlungu soti mwa Kristo mwechilekelela mweo.