Aefeso 3 - Mapangano Alomba 1923

¹ CHIFUKWA choteti neo Paulo, womangiwa wa Kristo Yesu pa milandu yanu, mwa Mitundu,—

² kati kaya mwichimvwa zya mawamizyo a chawanzi chila cha Mlungu chinipewa neo kuli mweo;

³ zyakuti povundululiwa chiziŵikwa kwangu chakunsei ichi, nga ni umo mnilembera na malizu ŵochefya.

⁴ Pa aŵa mkapendapo mwakuziŵa mano ŵangu a pa chakunsei cha Kristo;

⁵ chamene pa maluko ayakene chiliyoziŵikwa ku ŵana a pano pansi, umo mchisokololewera kwa apostolo na aŵirizi ŵake ŵozila mwa Mzimu;

⁶ chakuti a Mitundu na apyani ŵamo, na vizo vimo vya mmuŵili, na a chilongera chimo cha chipango cha mwa Kristo Yesu kwa evangelo,

⁷ inichishiwa mtumiki wa ine, umo muwenzele mtulo wa chawanzi cha Mlungu chila chinipewa neo nga ni mpamvu yake umo myuchitira mulimo.

⁸ Kuli neo, nine mtonto kupula asanto ŵonse, chipewa chawanzi ichi choŵirizya kwa a Mitundu mpango zyosakumika kulondolewa zya Kristo,

⁹ noŵaŵonesya ŵantu ŵonse mawamizyo a chakunsei ni vinji, chila chifisika chitatikile maŵeromaŵero mwa Mlungu wamene eumba vyonse;

¹⁰ lona kuti lomba mu eklezya ziziŵikwe ku maufumu na mansaka a kumulu nzeru zya mtundumtundu zya Mlungu,

¹¹ nga ni myenzele nzeru ya maŵeromaŵero yechipangilatu mwa Kristo Yesu Asikuru wasu:

¹² mwa yeve ni mtiri nawo mkanka na maloŵero osazinazina pomchetekera kwasu.

¹³ Teti nusenga kuti msatembuka pa matamano ŵangu pali mweo, amene aŵa ni mchinzi wanu.

¹⁴ Chikomo choteti ni panupeteka nkokola zyangu kwa Ŵata,

¹⁵ muuitiwa uusu wonse wa kumulu na pano pansi,

¹⁶ kuti ampeni mweo, umo mzilili mpango zya mchinzi wake, kutang'ishiwa na mpamvu pa untu wa mkati kwa Mzimu wake;

¹⁷ kuti Kristo aŵonkalilila mmitima yanu kwa mvwano; lona kuti mzikiwe mizyu pansi nonkazikika mchitemwano,

¹⁸ mukoseretu kuziŵisya pamo na asanto ŵonse tyani mlutumba na muutali na msinku na kunoka,

¹⁹ noziŵa chintemwa cha Kristo chamene chopula maziŵilo, kuti mzuzyiwe kuza na ku mazulilo ŵonse a Mlungu.

²⁰ Lomba kwa uyo okumochita kololombwe kupula vyonse vitusenga kano kulinga, mwa mpamvu yuchita milimo muli seo,

²¹ kwa yeve uŵeko mchinzi mu eklezya na mwa Kristo Yesu ku maluko ŵonse a chandalila. Amen.