Aefeso 2 - Mapangano Alomba 1923

¹ MWEO empani moyo pemwenze akufwa pa misulo yanu na viipa,

² mmwenzoyendayenda kale mmayendero a charo chino cha pansi, mwa mmbili wa nsaka ya mlulezi, ya mzimu ukata mulimo lomba mu ŵana a mwano;

³ etenzonkala kale seo sonse nase pakati paŵo mmakumbwilo a miŵili yasu, kuchita vipangwilo vya muŵili na vya malingililo, nase tenze kavyalikwilo ŵana a ku ukali nga ni esalapo.

⁴ Sembe Mlungu, wosambazya mchifundo, kwa chintemwa chake chikuru chechititemwa nacho,

⁵ chukanga petenze akufwa pa misulo yasu, etipa moyo pamo na Kristo (kwa chawanzi ni kwimwipuzumukila),

⁶ notiusya pamo naye notinkalika pamo naye pa chifuto cha pamulu mwa Kristo Yesu:

⁷ kuti mnsita zikuza akaŵonesye mpango ngazyo zya chawanzi chake potichitira lusungu mwa Kristo Yesu.

⁸ Pakuti kwa chawanzi ni kwimwipuzumukila kwa mvwano; nawo sufumila muli mweo mweka: ni mtulo wa Mlungu:

⁹ si wa milimo, asalitamya muntu.

¹⁰ Pakuti se nise ŵomasiri wake, ŵoumbiwa mwa Kristo Yesu ku milimo iweme, yechiwamizya katera Mlungu kuti toyendayenda mwamene.

¹¹ Teti mokumbuka kuti chombalimbi mweo mwa Mitundu mmuŵili, amene muteyewa Kusasirimuka na ŵala oteyewa Chisirimuko, cha mmuŵili, chochitiwa na manja,—

¹² kuti mnsita zila mwenze amazeze kwa Kristo, apakwenda pa mtundu wa Israeli, na achilwendo pa mapangano a chipango, mwenzeve chigomezyo, mwenzeve Mlungu pa charo.

¹³ Sembe lomba mwa Kristo Yesu mwe mwenze patali kale muluvwenderere pafupi mu mlopa wa Kristo.

¹⁴ Pakuti yeve ni mtendere wasu, echita ŵonse aŵiri kuŵa umo, nochikuma chipinda choyaŵanya,

¹⁵ pechichifumyapo chitinko mmuŵili wake, nicho dango la matetulo ŵoŵikiwilatu; kuti mwa yeka aumbe mu ŵonse aŵiri muntu umo walomba nochitirako mtendere,

¹⁶ kumbi aŵayanisyireko ŵonse aŵiri mmuŵili umo na Mlungu kwa msalaba, akapaireko chitinko.

¹⁷ Naye echizoŵirizya nkani ziweme zya mtendere kuli mweo mwenze patali, na mtendere kwa ŵala ŵenze pafupi:

¹⁸ pakuti mwa yeve tonse taŵiri ni mtiri namo moloŵera mwasu mwa Mzimu umo kwa Ŵata.

¹⁹ Teti simuli lomba alwendo na ŵosunsuntika, sembe mwe nimwe enekwaŵo a asanto a munzi umo na a chiŵanza cha Mlungu,

²⁰ pamumangiwa pa makumbililo a apostolo na aŵirizi, na Kristo Yesu mwine ni chimwala cha pa ngondya;

²¹ mwa yeve mamangiwilo ali ŵonse, olundikiwa wino pa mayano, ni mwakukulila kuŵa chipupilo chozila mwa Asikuru;

²² mwa yeve namwe soti ni mmumangiwamo pamo, mwakuŵa ponkala pake Mlungu mwa Mzimu.