2 Timo 1 - Mapangano Alomba 1923

¹ PAULO, mpostolo wa Kristo Yesu kwa chipangwilo cha Mlungu, mwa chipango cha moyo wa mwa Kristo Yesu,

² kwa Timoti, mwana wangu wotemweka: Chawanzi, lusungu, mtendere, kufumila kwa Mlungu Ŵata na Kristo Yesu Asikuru wasu.

³ Numuŵonga Mlungu, unutumikila chitatikile kwa ausu wasu mchikumbutima chiweme, pakuti numkumbukani kosaleka mmalombero ŵangu; usiku na mzuŵa

⁴ nukumbwa kumuŵonani, noluusya misozi yanu, kuti nizule chimwemwe:

⁵ panulukana mvwano wosalipazya uli mwanu, wamene witangula kuŵa mwa Loisi ambuya wanu, na Yunike anyina wanu, nane nulinga na muli mweo.

⁶ Teti ni panumkumbusyani mkolezye mtulo wa Mlungu, uli mwanu mkusintila manja kwangu.

⁷ Pakuti Mlungu aliyotipa mzimu wa mwezo, sembe wa mpamvu na wotemwa na wolilesya.

⁸ Teti msachita nsoni pontoni wa Asikuru wasu, kano pali neo wa mnsinga wake: lomba mosanzyana mmazuzyo na evangelo mwa vizo vya Mlungu.

⁹ Yeve etipuzumusya notiita na maitiwe ŵozila, nte mmachitiwilo ŵasu, sembe mwechilingilatu mwine na mwa chawanzi chake, chipewa kuli seo mwa Kristo Yesu pantanzi pa nsita na nsita,

¹⁰ sembe lomba chiluvundululiwe mkusokoloka kwa Mpuzumushi wasu Kristo Yesu, wamene ekandamizya imfwa nosanikira moyo nosaŵola mu evangelo,

¹¹ kwiniikiwa muŵirizi na mpostolo na msambizi.

¹² Teti ni panuzuzika soti na ivi: lomba sinuchita nsoni, panumziŵa uyo unuchetekera, nane nuziŵisya kuti angokumako kuchilingizya chilusungikiwe kuza na ku siku lila.

¹³ Mwakuŵa nacho chikochezyo cha malizu ŵendi emwichimvwa kuli neo mu mvwano na mchintemwa vya mwa Kristo Yesu.

¹⁴ Icho chiweme chilusungikiwe chilingizyani mwa Mzimu Mtuŵa onkalilila muli seo.

¹⁵ Ichi muziŵa, chakuti ŵonse a mu Asiya eniminzukira; muli ŵeve ni Fugelo na Hermogene.

¹⁶ Asikuru naŵape lusungu a mchiŵanza cha Onesiforo, pakuti enzonichizya kaŵirikaŵiri, naye ntechita nsoni na linjerenjende langu;

¹⁷ lomba peenze mu Roma enipapimapapima nonifwana

¹⁸ (Asikuru nampe kufwana chitinti kwa Asikuru msiku lila); soti na mvinyinji vyenzotumikila pa Efeso muziŵa kwene kantu.