Lucas 1 - Ntsoj Lucas tmatya'aky Jesús jyüky'ajjt

Lucas tkëjxja'ay Jesús jyüky'ajjt

¹ Jäj nimay jaa'y ttunkëtë jäts tjaypyät'të't tukkë'yë tij ojts Yës Teety tüny ya'at it maj ëëtë'm yaj njüky'ëë'yë'n,

² najj tmatyaktë pënjäty t'ijxtë ntsoj tukkë'yë tsyoo'ntaajky, nits ojts mëët yëktappawa'antë jäts tkajpxwa'kxtë't Yës Teety y'aaw y'ayuujk

³ Tëj ëjts mëët kë'm yëkxon tuta'aky nyëktëywya'atsy ntsoj jä' y'ijxë tukkë'yë tsyoo'ntaajky, jakëjxts ëjts tëj nkëjxja'ay jupwa'atsy ntsoo'm jä' jyajjty, nits mijts muku'uk Teófilo

⁴ yëkxon tëy wa'ats xnijawë't tyëy'ajjtpë mati' tëj myëkwaajnë.

Tu'uk Yës Teety tyumpë mati' jäm tsapjotm tnikkäjpxy ku Juan Bautista kyä'äxwa'any

⁵ Nit ku Herodes y'ijjty yyëkkuttüky Judea, jäm y'ijjty tu'uk teety kyukkajjpë mati' txëëw Zacarías, Abías myëëttumpë. Mëët tyo'oxytyëjjk mati' txëëw Elisabet, teety Arón nyaskä'äxë.

⁶ Oy jä' y'ijjty jyaa'yëtë jyükyëtë Yës Teety wyinkujkm jäts kyuytyuntë'p yëkxon Yës Teety pyawaa'n kyuttujjk.

⁷ Kä'äts jä' y'ijjty pën y'uu'nktë jä'ku Elisabet kä'ä junë y'uu'nkpaaty, jäts tëj y'ijjty mëët myajaa'y'eenyëtë.

⁸ Tu'kyaajjë ku Zacarías jyaa'y pyaajtëtë jäts Yës Teety tmuttu'ntë't,

⁹ nits najj naa'xkë'n jä' xëmë teety ttuntë jäts twin'ijxtë't twinwa'atë't pën poom tyëkto'ypy tsaptijkypy jä'äts tyuntë jäts Zacarías tyakitaajkë.

¹⁰ Ku Zacarías y'ijjty jäjp poom tyëktoy tsaptijkypy, jäjpts mëët tsaptëjkwimpy nimay jaa'y y'ijjty nyuu'kxta'aktë.

¹¹ Ku atsu'ujky Zacarías t'ijxpaajty tu'uk Yës Teety tyumpë mati' jäm tsapjotm mimp, tyänë akany'tsyow maj jäjp poom tyoy.

¹² Kuts twinku'ijx'ëëy, attëy'ajat ttattaany jäts mëjk y'atsë'ëjk'ajjtë.

¹³ Nits Yës Teety tyumpë nyëë'mxë: —Zacarías, katij mtsë'ëkë, jä'ku tëj Yës Teety tmatoy mnuu'kxtaajkë'n, jäts mto'oxytyëjjk Elisabet myëëtë'p tu'uk una'ajnk, mati' mijts mxëëwmo'op Juan.

¹⁴ Mtajotkujjkta'akp mijts jä', jäts nimay mëët jaa'y ttaxonta'aktë't ku jä' una'ajnk kyä'äxt,

¹⁵ jä'ku nimëjj m'uu'nk y'itt Yës Teety wyinkujkm. Nijunë jä' nëëj tka'uukt mati' mukp, jäts Yës Teety jyaa'wë'n y'am jyotm pawa'anë'p oy niyam wyä'në kyakke'exy.

¹⁶ Juan tu'mp jäts Israelë'tjaa'y Yës Teety t'awimpittëtë't.

¹⁷ Jä' twintuwëkkë'p Wintsën, mëët jaa'wë'n jäts mëjk'ajjtën mati' yëk'ayuujknajxpë Elías y'ijjty jyakyejpypy, najjts nittaak nitteety y'uu'nktëjjk tmëëtnamyu'oy'attë't, jäts pën kupety jaa'y'eetyë'p winjaa'w'ajjt tpaat'të't. Najjts Juan kajjp tyëkni'oyë't jäts t'a'ijxtë't Wintsën.

¹⁸ Nits Zacarías tyëktëëy Yës Teety tyumpë: —¿Ntsoj y'ijxë ëjts nnijawë't jäts tunë'p jä' najj tukkë'yë ntsoj tëj mwa'any? Jä'ku tëj ëëts nmajaa'y'eenyë mëët nto'oxytyëjjk.

¹⁹ Nits Yës Teety tyumpë y'atsoojjë: —Gabriel ëjts nxëëw, Yës Teety ëjts ntuujnjääpy, Jä' ëjts xpakkäjxp jäts mijts ntanijawë't ixyam ya'at oymyatya'aky.

²⁰ Kumkä'äts tëj xtëyjyawë ntsoj ëjts tëj nwa'any, uum mta'nt ixyam, kunë'm tukkë'yë najj kyuytyunë't.

²¹ Jäjpts kajjp tëjkwimpy y'ijjty y'a'ijxtë, jäts nyayëktëë'axajjëtë tu'uk janitu'uk tikëjxë'm Zacarías tyaa'në'y'ooky jäjp tsaptijkypy.

²² Kuts Zacarías pyitsëëmy kä'ä jä' y'ijjty y'okkäjpxynyajxnë, jä'yë jä' kyë' tyëkyo'oy najjts kyäjpxy, nits twinjaa'w'eetyë jäts Yës Teety y'ijjty tëj myukkäjpxyë jäjp tsaptijkypy.

²³ Kuts Zacarías tyunk pyuujky tsaptijkypy nits nyëjkxnë tyëjkëntüjpy.

²⁴ Ku najj nyajjxy, nits tyo'oxytyëjjk Elisabet y'uu'nkpaajty, jäts muwoxk po' tyëjkëntüjpy kyapitsëëmy, jä'ku najj jä' y'ijjty wyinmay:

²⁵ «Tëj ëjts nwintsën xpa'ayoy, jäts kä'ä jaa'y ëjts x'okka'oy'ijxnë't ku ëjts una'ajnk nkamëëtë.»

Tu'uk Yës Teety tyumpë mati' jäm tsapjotm tnikkäjpxy ku Jesús kyä'äxwa'any

²⁶ Tutujjk po' y'ijjty Elizabet uu'nk tnikkëjxmë, ku Yës Teety tpakkejjxy kyukkexy'eepyë Gabriel jäm Galilea y'itjotm maj tu'uk kajjp txëëwë Nazaret,

²⁷ jäm y'ijjty kyukkajjpë tu'uk appetykyiixy mati' txëëw María; kä'ä jä' junë y'ijjty yaa'ytyëjjk tmëëtë, tëts jä' y'ijjty yyëkkajpxtannë jäts tmëët'amäjtskë't tu'uk yaa'ytyëjjk mati' txëëw José, yëkkuttujkpë David nyaskä'äxë.

²⁸ Nits Yës Teety tyumpë mati' jäm tsapjotm mimp, tyëjjk'ëëy tijkypy maj jäjp y'ijjty María, nits nyëë'mxë: —¡Jotkujjkta'ak mijts, tëj Yës Teety mkunüü'kxyë! Jäj mijts Wintsën mmëët'ätyë.

²⁹ Jäts María attëy'ajat ttattaany jä' ayuujk, jäts nyayëktëyë nyayëktu'mps'ätyë tij jä' najj Yës Teety tyumpë tyijjpy.

³⁰ Nits Yës Teety tyumpë nyëë'mxë: —María, katij mtsë'ëkë, mijts mtaxömpy Yës Teety pyuttëjjk'ëë'ny.

³¹ Ixyam yi'it una'ajnk xnikkëjxmë't, myëkkä'äxp tu'uk mijxy'uu'nk, jäts mijts xxëëwmo'ot Jesús.

³² Nimëjj jä' m'uu'nk y'itt, yëkkuttujkpë niwintsën jä' Yës Teety pyëmë't, naa'xk ojts yëkkuttüky myëjjteety David, jäts mëët yyëkkuxëëwë't Yës Teety tsapjötypy y'uu'nk,

³³ nits tniwintsënë't xëmëkkëjxm Israelë'tkajjp. Nijunë jä' kyuttujjk kyajjupkëxt.

³⁴ Nits María tyëktëëy Yës Teety tyumpë: —¿Ntsoj y'ijxë najj jyatt, kä'änë'mts ëjts n'amäjtskë?

³⁵ Jäts Yës Teety tyumpë y'atsoojjë: —Yës Teety jyaa'wë'n mniminë'p, jäts Yës Teety tsapjotm myajaaw mtanaxkita'akë'p. Jakëjxts jä' una'ajnk nijkxy yyëkkuxëëwë Yës Teety y'uu'nk, ku kä'ä tij takkoo'ny tjakyepy.

³⁶ Ninyajj mëët mpamuku'uk Elisabet, myëëtëwyämpy tu'uk una'ajnk, oyë'm tëj jyamajaa'y'eenyë jäts pën kyajpxtë'p nijunë una'ajnk tkamëëtë't, ixyam tutujjk po' una'ajnk tnikkëjxmë.

³⁷ Jä'ku Yës Teety kä'ä tij tsip tsu'ux jyajjtxyë.

³⁸ Nits María wyaany: —Wintsën ëjts tu'uk nmuttümpy; wä'n Yës Teety najj tüny naa'xkë'n ëjts xtamutsöky. Kuts najj María y'atsooy nits Yës Teety kyukkexy'eepyë wyimpijtnë.

María tëjk'ayo'oy Elisabet

³⁹ Nit'ämpy, María nyijkxy jottakkoy maj jäm tu'uk kajjp kojpkjotm Judea y'itjotm,

⁴⁰ jäts jya'ajty Zacarías tyëjkëntüjpy nits tkajpxtaay Elisabet.

⁴¹ Kuts Elisabet tkäjpxymyatooy María, jäts tjaa'w'ëëy y'uu'nk nyakyo'ojyë jyotm, nits Yës Teety jyaa'wë'n tyanaxkitaajkë.

⁴² Jäts mëjk wyaany: —¡Yës Teety tëj mkunüü'kxyë naa'xk nippën jatu'uk to'oxytyëjjk, jäts tëj mëët tkunüü'kxy m'uu'nk mati' jäm mnikkëjxm'eepy!

⁴³ ¿Pën ëjts, jäts ëjts nwintsën tyaak yaj xnija'att?

⁴⁴ Jä'yë ku ëjts mijts tëj nkäjpxymyatoy, jotkujjk ëjts tëj n'uu'nk nyakyo'oyë njotm.

⁴⁵ ¡Tëj Yës Teety mkunüü'kxyë, jä' ku tëj xtëyjyawë jäts kuytyunë'p jä' tukkë'yë ntsoj tëj mnee'mxyë!

⁴⁶ Nits María wyaany: «Wintsën myëjj'ajjt ëjts n'aaw njoojt tyaxontäkypy;

⁴⁷ nnitsokpë Yës Teety kyëjxm ëjts njaa'wë'n jyotkujjkta'aky

⁴⁸ jä'ku tëj ëjts Yës Teety ntuta'aky'ajjt x'ijxë, ixyam jäts xëmëkkëjxm ëjts jaa'y xnëëjmë't mëjjxontaajk mijts mtaxömpy;

⁴⁹ jä'ku Yës Teety mati' maykyëjjxë'p tukkë'yë tëj ëjts mëjjmay'ajjt xtuujnë. ¡Wa'ats jä' xëmëkkëjxm xyëëw y'ity!

⁵⁰ Xëmëkkëjxm Yës Teety tpa'ayoy pënjäty wintsë'ëjk'ajjtë'p.

⁵¹ Tukkë'yë myëjk'ajjt tyëktuuny: yyëkkutakkoykyëjjx tukkë'yë jaa'y wyinmaa'ny mati' nimëjj najyaa'w'ajjtëtë'p,

⁵² pyëjkëjjxjaay yëkkuttujkpëttëjjk kyuttujktaajk nits tmëjjkejjxy ayoopëttëjjk.

⁵³ Tëj kääky jee'kyxy ttappaaty pënjäty yu'oo'ktë'p nits kumeenyjyaa'y janajjyë tpakkäjxkëjxnë.

⁵⁴ Pyuttëjjk'ëëy tyumpë, israelë'tjaa'y jäts kä'ä junë tjaa'tyakkooy tpa'ayo'ot.

⁵⁵ Najj jä' twanpäjjtjaay ëëtë'm n'ap n'ok, jä' Abraham mëët tukkë'yë nyaskä'äxë.»

⁵⁶ Tuwëëk po'jën María tsyënaay Elisabet tyëjkëntüjpy, nitnë'mts wyimpijtnë.

Ku Juan Bautista kye'exy

⁵⁷ Ku Elisabet y'uu'nk pyo'paajty, tu'uk mijxy'uu'nk kye'ejxy.

⁵⁸ Kuts myuku'uktëjjk mëët myu'awinkontsënääpyë tnijaa'w'eetyë ntsoj y'ijjty tëj Elisabet Yës Teety pya'ayoyë, nits yo'ymyujktë jäts oy jotkujjk tmëëtxontaktë.

⁵⁹ Kyutuktujjk xëëw myuku'uktëjjk jatu'kyaajjë yo'ymyujktë, jäts una'ajnk ttsuktë't naa'xkë'n jä' tkajjpëtë, nits y'ijjty txëëwmo'owa'antë naa'xkë'n tyeety txëëwë, Zacarías.

⁶⁰ Jäts tyaak t'akkajpxtujjky: —Kä'. Juan yë' xyëëwë'p.

⁶¹ Nits jaa'y y'atsoojjë: —¿Pënts najj mtokmuxëëwëwyämpy? Kä'äts pën mmuku'uk najj txëëwë.

⁶² Nits kyë' t'a'ijx'eetyë t'appaajt'eetyë najjts tyeety tyëktëëjjäätyë ntsoj y'ijxë y'uu'nk txëëwmo'owa'any.

⁶³ Jäts Zacarías t'amatooy tu'uk pu'uy'uu'nk, jämts tkëjxjaay: "Juan yë' xyëëwë'p." Nits nitukkë'yë jaa'y win'ijxp ttattankëjxtë jä' ayuujk.

⁶⁴ Jäts ojts jatu'kyaajjë Zacarías kyäjpxynyäxy, nits Yës Teety ttaxontak'axajjy najjts tmëjj'ijxy tmëjjkejjxy.

⁶⁵ Nitukkë'yë jaa'y attëy'ajat tyankëjxtë, jäts tukkë'yë Judeat'it tnityamukkäjpxyëtë tnityamatya'akyëtë tukkë'yë mati' y'ijjty tëj tyünyë.

⁶⁶ Pënts jä' tmatootë nits kë'm nya'y'awimay'ätyëtë: «¡Tij jä' nijkxy una'ajnk tüny ku yyääkt!» Jä'ku jä' una'ajnkëjxm y'ijjty Yës Teety tyëknikkä'äjxjë'ëky myëjjputtëjjk'ëë'ny.

Zacarías Yës Teety tmëjjkexy

⁶⁷ Nits Zacarías, jä' una'ajnk tyeety, tyanaxkitaajkë Yës Teety jyaa'wë'n, nits tnikkäjpxy tij y'ijjty mimp, jäts wyaany:

⁶⁸ «¡Mëjj'ijxy mëjjkexy y'ity Yës Teety, Israelë't jaa'y Wyintsën, jä'ku tëj nyaajx kyajjp tniminy jäts tyëknitso'okt!

⁶⁹ Tëj xtanikkejjxyë'n tu'uk mëjjnitsokpë, tyumpë David nyaskä'äxë.

⁷⁰ Najj jä' twantaajky jekynyë kyäjpxynyäjxpë y'am:

⁷¹ Jäts xputtëjjk'ëë'yë'm nits npitsëë'më'n nmutsip'eepyë kyë'jë'm jäts mëët pënjäty ka'ijxyë'm xjaa'w'ajjtyë'm,

⁷² nits pya'ayo'op mëët ëëtë'm n'ap n'ok jäts nijunë tkajaa'tyakko'yty ntsoj ojts wa'ats käjpxy tyäny.

⁷³ Najj jä' ojts twampäjjtëmë ëëtë'm nteety Abraham: nits xmoo'yë'm

⁷⁴ jä' jüky'ajjt maj kä'ä tij x'atsë'ëjk'ëë'yë'n, maj nmutsip'eepyëttëjjk kya'atsipt kya'atsu'uxt, najjts nmuttuu'në'n

⁷⁵ tëy wa'ats, pën nii'xyë'n njüky'ajjtyë'n.

⁷⁶ Jäts mijts uu'nkënaj, Yës Teety tsapjötypy yëk'ayuujknajxpë myëkkuxëëwë't, jä'ku mijts Wintsën mwintuwëkkë'p jäts nyëë' tyuu' xyëkni'oy'ajjtë't,

⁷⁷ nits xtanijawë't nyaajx kyajjp nits tëj Yës Teety tyakkoo'ny myää'kxtujjkxyëtë jäts moojyë'p nitsoojkë'n.

⁷⁸ Jä'ku, myëjjpa'ayoo'n këjxm Yës Teety xtanikkejjxyë'n jatu'uk xëëw'ajajjk,

⁷⁹ jäts tnijajjt tnitëë'xt pënjäty jüky'eetyë'p mëjj akkootsy'attüjpy, nits tuu' xtani'ijx'ëë'yë'n mati' jotkujk'ajjt xtappaajtë'm.»

⁸⁰ Najjts jä' y'ijjty una'ajnk yeeky jäts mëët jyaa'wë'n myëjkpeky, tëtsta'aky itjötypy jä' jyüky'ëëy kunë'm xëëw tpaajty ku Yës Teety pyakkäjjxë jäts Israelë'tjaa'y tka'ama'yty.