Yer. 1 - EBIBILIA ENDAKATIFU

Yeremia

¹ Kamakhuwa ka Yeremia okhwa Hilikia, mulala khu basaayi be lukoba lwa Anatoti mu sibala sia Benjamini.

² Elomo ya Wele Omunyali Owa Bioosi yecha khu Yeremia khu mwiiko kwe khumi na kitaru nikwo Yosia okhwa Amoni aaba omwami owa Yuda,

³ lundi Wele Omunyali Owa Bioosi alomaloma khu Yeremia nga Yehoyakimu okhwa Yosia ne aba omwami. Wele Omunyali Owa Bioosi lundi alomaloma ne Yeremia biise bikali khukhwola khu mwiiko kwe khumi na mulala kwe bubwami bwa Sedekia okhwa Yosia nga omwami owa Yuda. Mu mwesi kwa kharaano kwe kumwiiko mwenokwo babaandu ba Yerusalemu batiilwa bayilwa mu mbaambe.

Kumulaango kwa Yeremia

⁴ Wele Omunyali Owa Bioosi amboolela ali,

⁵ “Ese nakhurobora ne khakhubuumba munda mwa mao, lundi nakhutakaasa ne okhasaalwa tawe. Nakhurobora khuba omung'oosi we chikholo.”

⁶ Ese nakobosia ndi, “Aa Omwami WELE! Lola se manyile khulomaloma tawe. Ese siili mwana.”

⁷ Ne kakhali Wele Omunyali Owa Bioosi amboolela ali, “Okhaboola oli ‘Ese siili mwana tawe.’ Sikila khu boosi nibo ndakhurumakho olacha, mala obaboolele buli siindu nisio ese khulakiilisia.

⁸ Okhabaria tawe, sikila ese ndaba alala ne nawe khukhuliinda. Ese Wele Omunyali Owa Bioosi nalomile.”

⁹ Nio Wele Omunyali Owa Bioosi akololosia kumukhono kwewe, mala andiila khu munwa, nio amboolela ali, “Lola, nareere kamakhuwa kase mukhanwa mwowo.

¹⁰ Endaalo yino ese nakhuelesie ewe bunyali, khu kholo choosi ne khu bwami, khurusiao khukhwonakaka, khukhwombakha ne khubiaala.”

Kamalola kabili

¹¹ Wele Omunyali Owa Bioosi andeeba ali, “Yeremia olikho obona siina?” Ese namukobosia ndi, “Naboone lusakia lwe kumurongooro kwa Alimondi.”

¹² Nio Wele Omunyali Owa Bioosi amboolela ali, “Waboone bulayi bwene, sikila ese ndaloleelelanga mbone ndi kamakhuwa kaase keecha khuuba ka ng'ali.”

¹³ Nio Wele Omunyali Owa Bioosi aandeeba lundi ali, “Siina sisiindi nisio olikho obona?” Namukobosia ndi, “Naboone endekhelo efutare ebunaswa elikho yibuuya.”

¹⁴ Nio Wele Omunyali Owa Bioosi amboolela ali, “Libuna lilaama ebunaswa liche khu bamenywa be mu sibala sino boosi.

¹⁵ Sikila ese ndikho ndanga chikholo che bubwami bwe ebunaswa choosi chiiche. Chiliicha mala buli ekholo eliimikha bubwami bwayo asilibwa sia Yerusalemu, elibubotookhelela kamasiisi koosi ne kamasiisi ke chingoba cha Yuda.

¹⁶ Ne ese khalomalome bukhalaki bwase khu kholo echo, khulwe bumayaanu bwacho bwoosi bwe khukhundekha ese. Chosiisie biiunya bulayi khu bawele babaandi, ne khusaaya bibiindu nibio babaandu babeene bekholela.

¹⁷ Ne kakhali ewe Yeremia, yirekekha winyokhe obaboolele buli siindu nisio khulaka. Okhabaria tawe, ne busa ndakhuambia chisoni ebweeni wabwe.

¹⁸ Ne Wele Omunyali Owa Bioosi aloma ali, lola nakhukholile ewe luno khuba lukoba lusire, enjeko eye sichuuma, ne kamasiisi ke kumukasa khu sibala sioosi ne khu baami ba Yuda ne babaana babwe, basaayi ne babaandu bamwo.

¹⁹ Balapana nawe ne kakhali se balakhuula tawe sikila ndi nawe khukhuliinda.”