Sef. 1 - EBIBILIA ENDAKATIFU

¹ Buno buli burume nibwo Wele Omunyali Owa Bioosi aelesia Sefania mu siise nisio Yosia okhwa Amoni aba omwami owa Yuda. Sefania aba we lisaaye lio mwami Hesekia raraawe owa Amaria. Amaria aba raraawe owa Ketalia ne Ketalia aba raraawe owa Kushi ne Kushi aba raraawe owa Sefania.

Endaalo eye bukhalaki bwa Wele Omunyali Owa Bioosi

² Wele Omunyali Owa Bioosi aloma ali, “Nja khubunia buli siindu khu sibala.

³ Ndabunia babaandu boosi, ne chisaang'i, chinyuni ne ching'eeni. Ndarusiao bamayaanu. Ndeera babaandu boosi khu sibala, ne se aliio olarama tawe.

⁴ “Ndaukuuma babaandu ba Yuda alala ne bamenywa ba Yerusalemu boosi. Ndeera babaandu babarama basaayanga Baali, ne se aliio okhakhebulile basaayi bakhamanyile wele nibo basaayanga tawe.

⁵ Khabunie yesi yesi oniinanga khu nju ne khusaaya enyanga, kumwesi ne ching'enieesi lundi khabunie abo basayaanga ne khukhwechuba mu Wele Omunyali Owa Bioosi mala lundi benamila ne khusaaya wele Moleki.

⁶ Ndabunia abo babakaluukhana balekha khu khunoonda ese Wele Omunyali Owa Bioosi, abo bakheecha niio ndi namwe beenya bukeleki bwase tawe.”

⁷ Endaalo eli siimbi niyo Wele Omunyali Owa Bioosi acha khukholelamo bukhalaki, khwako sila busa ebweeni wo Mwami WELE, Wele Omunyali Owa Bioosi alikho arekekha khu siinja babaandu bewe nga bibiaayo bie embosio ne aalangile basiku ba Yuda khukhwicha bayaaye.

⁸ Ne khu ndaalo eye siiukuumo sia Wele Omunyali Owa Bioosi, Wele Omunyali Owa Bioosi aloma ali, “Ndiukuuma babemeelesi ne babaana be babaami ne naabo boosi baloonda kimiima kie chikholo chichiindi.

⁹ Ndiukuuma abo boosi basaaya bulayi bwene nga babaandu bakhamanyile Wele tawe, babeeba ne khukhwira nio bechusie enju yo mwami wabwe ne bibiindu bie bunuuli.”

¹⁰ Wele Omunyali Owa Bioosi aloma ali, “Khu ndaalo eyo, mukhaulile biililo mu Silibwa silaangwa sie Ching'eeni, mu Yerusalemu mukhaulile liliesasaara elubeka luuya lwe lukoba ne kumuulo kumuboofu mu ngulu.

¹¹ Yesasaara mala mulile ne muulila kano enywe mumenyile emwaalo we lukoba sikila babofuli bakhabe bafwiile boosi.

¹² Siise esio ndibukula etaa mala khosie mu Yerusalemu. Khaukuume babaandu baali nabio lundi babanyalikha, baloma bali, ‘Wele Omunyali Owa Bioosi salakholakho bulayi namwe bubi tawe.’

¹³ Kimiaandu kiabwe kilinuulwa ne chinju chabwe chilianjukhwa bakhaba ne bombakha chinju se balichimenyamo tawe bakhaba ne babiaala kimisabibu se balinywa endali yakio tawe.”

¹⁴ Endaalo emboofu eya Wele Omunyali Owa Bioosi eli siimbi eli siimbi mala elikho yiicha khangu! Endaalo eyo ekhabe eye lilieunamila endaalo ng'eneyo akhaba banamae banyindaafu balifwa kimiooyo mala balile lukali.

¹⁵ Eliba endaalo eye lirima, endaalo eye butinyu ne buchuuni, endaalo eye libuna ne lilionaka, endaalo eye sisiilima ne khufuumba, endaalo eye kamafuumbi ne sisiilima sikali,

¹⁶ endaalo eye khukhupa ekhoombi eye liie khu ngoba chisire ne khu ndeleelwa chindeeyi.

¹⁷ Ndireera butinyu khu baandu mala balikeenda nga babofu sikila bakholeele ese Wele Omunyali Owa Bioosi bubwoni, sifuki siabwe sikhachukhwe asi nga kameechi, ne kimibili kiabwe kikhabolele asi.

¹⁸ Efwesa yabwe ne sahabu se bikhabasikule khu ndaalo eye lirima lia Wele Omunyali Owa Bioosi tawe. Sibala sioosi sikhabunisibwe ne kumulilo kwe lirima liewe, alirao sisiakamo sia khangu khu bamenywa boosi be mu sibala.