Khur. 1 - EBIBILIA ENDAKATIFU

Baisiraeli bapisibwa siibi mu Misiri

¹ Kano niko kamasina ke babaana be sisoleeli ba Isiraeli ba baacha e Misiri ne Yakobo, buli sia mulala ne enju yewe.

² Baaba Rubeni, Simioni, Lawi, ne Yuda.

³ Isakari, Sebuluni ne Benjamini.

⁴ Dani, Nafutali, Kati ne Asieri.

⁵ Lisaaye lia Yakobo lioosi alala liaba bukali bwe babaandu kamakhumi saba. Yosefu aaba ali e Misiri khale.

⁶ Ekhumaliilikha Yosefu, ne bawandaaye boosi, ne eselukho eyo yoosi bafwa.

⁷ Ne kakhali lisaaye lia Yakobo liasaalana mala liatasikha. Baba babaandu be kamaani kamakali lundi basalaanila buli abuundu mu sibala sia Misiri.

⁸ Omwami okundi okhamanyakho Yosefu tawe amiia Misiri.

⁹ Aaboolela babaandu bewe ali, “Lola Baisiraeli bano bali bakali lukali lundi bakhukhila efwe kamaani.

¹⁰ Khe mwiche, khukanakane nisio khukhola. Ne busa balatasa khuba bakali nio oli liie likhukwakho, baambaane ne basiku befwe bakhuule mala belukhe khukhwama mu sibala sino.”

¹¹ Khwako Bamisiri babaraakho babemeelesi be kimilimo babakhosie kimilimo kimisiro. Baisiraeli bombakhila Farao chingoba che kamabiikhilo cha Pitomu ne Ramusesi.

¹² Ne kakhali nga nilwo bapisibwa siibi lukali, nga bachiililila khukucha ne khusalaanila buli abuundu. Khwako Bamisiri baria Baisiraeli.

¹³ Bamisiri bakhosia Baisiraeli kimilimo kimirafu.

¹⁴ Bakhola limenya lie Baisiraeli liaba lilume khubirira mu khubaelesia kimilimo kimiandalafu kie bubwombakhi ne kimilimo chingano choosi mu mikuunda. Se bakholelakho Baisiraeli siisa tawe.

¹⁵ Nio omwami owe Bamisiri alomaloma ne bakhasi Baeburania basaasianga. Mulala aba bali Sifura, ne okundi bali Pua. Aababoolela ali

¹⁶ “Ne mulikho ne musaasia bakhasi Baeburania, loleelesia. Omwana aaba ne ali omusoleeli mu mwiira, ne aaba omukhaana, mulekha amenye.”

¹⁷ Ne kakhali ba basaasianga abo baria Wele. Se bakhola nga omwami aabalaka bakhole tawe. Ne kakhali balekha babaana be sisoleeli bamenya.

¹⁸ Nio omwami owe Bamisiri alaanga basaasianga chana mala abareeba ali, “Siina sikila ne mukholile lino? Siina sikila ne mukheerire babaana basoleeli tawe?”

¹⁹ Bakhasi basaasianga baboolela Farao bali, “Sikila bakhasi Baeburania se bali nga bakhasi Bamisiri tawe. Banyindaafu lundi basaala obasaasia ne asiili khubolakho tawe.”

²⁰ Khwako Wele aaba omulayi khu bakhasi basaasianga abo mala Baisiraeli baaba bakali lundi be kamaani.

²¹ Wele aelesia bakhasi basaasianga abo lisaaye liabwe sikila bamuria niye.

²² Nio Farao lundi alaka babaandu bewe boosi ali, “Buli mwana Omueburania osaalwa, mucha mu mumwaate mu luuchi lwa Naili. Ne kakhali lekha bakhaana boosi bamenye.”