Est. 1 - EBIBILIA ENDAKATIFU

Kwini Bashiti aloba khuria omwami Ahuswero

¹ Omwami Ahuswero amiia chingoongo emia ndala ne kamakhumi kabili na saba khukhwama India khukhwola Esopia

² Mu ndaalo ng'ene echo omwami Ahuswero amiia nali mu lukoba luboofu lwa Susa.

³ Mu mwiiko kukhola khataru kwe bubwami bwewe, akhola naikara khulwe babemeelesi bewe ne bakholi bewe, babemeelesi bakhulu be banamae ba Pasha ne Baametia, babaandu be efuma ne babemeelesi be chingoongo.

⁴ Khulwe chindaalo emia ndala ne kamakhumi munane, Ahuswero ekesia buiinda bukali bwe bubwami bwewe, ne efuma yewe.

⁵ Enyuma we chindaalo chino, omwami aakhola naikara khulwe babaandu boosi ba baaba mu lukoba lwa Susa, baiinda ne bataambi sitube. Naikara yamala chindaalo saba. Yakholelwa khu luuya lwe siluundu sie lichipi lio mwami.

⁶ Abuundu ao aang'oonebwa ne chipasia chiwaanga ne chimbuusi chichabowa khu mikhanda kie engubo eya katani ne enapeenda khu mbete che efwesa ne khu bisiindi bie kamabaale kamawaanga. Biabao bitaanda bie esahabu ne efwesa khu luya lwe kamabaale kamawaanga, kamabesemu, kang'enang'ena, ne kamabaale ke bukusi bwe angaaki.

⁷ Barumikhiranga bikoombe bie esahabu khunywa. Bikoombe bienebio biaba bie chingano chichabukhane. Ne endali eyo omwami yaba engali khuloondekhana ne bulayi bwo mwami.

⁸ Mbao owakhiingililwa khunywa tawe namwe mbao owayingiililwa khunywa tawe: Omwami aba aanile lilaka khu bakholi be mwichipi ali buli mundu anywe khuloondekhana nga enya.

⁹ Bashiti, mukho omwami yesi akholela bakhasi naikara mu lichipi lio mwami Ahuswero.

¹⁰ Khu ndaalo eya saba eya naikara, omwami Ahuswero aba omusangaafu lukali sikila aba anywele endali. Alaanga bachili saba bababechaanga bakholi bewe: Mehumani, Bisita, Haribona, Bikita, Abakita, Setari, ne Karikasi.

¹¹ Abalaka bareere omukhasi wewe Bashiti ebweeni wewe ne efwarire ekuutwa eyeewe eye bubwami. Kwini Bashiti aba owe lukoondo lulayi, ne omwami eenya khumwekesia khu baandu ne babemeelesi nga nilwo Bashiti aaba ne lukoondo lulayi.

¹² Ne kakhali Bashiti aloba khukhwicha khuloondekhana ne lilaka lio mwami khubirira khu bachili. Lino liakhola omwami aambwa lirima likali.

¹³ Kwaba kumwiima kwo omwami khunyoola likaambila khukhwama khu baandu be limanya. Khwako alaanga babaandu bamanyile kamalaka ne bakhalaki nio bamuboolele nisio akhoyela khukhola.

¹⁴ Babaandu bakesi abo ba baaba siimbi ne naye baba Karishema, Shetari, Adimata, Tarishishi, Meresi, Marisena, ne Memukani. Abano baba babemeelesi saba ba Pasha ne Metia. Babaandu saba bano nibo baba ne bubweyaangu bwe khubona omwami. Abano baba ne bubwimeelesi bwe angaaki mu bwami.

¹⁵ Omwami abareeba ali, “Khuloondekhana ne lilaka, khukhola khuriena kwini Bashiti, sikila alekelesia lilaka lio omwami khubirira khu bachili?”

¹⁶ Nio Memukani alomaloma ebweeni wo mwami ne babemeelesi bewe ali, “Bashiti se akholele omwami yeng'ene bubi tawe. Akholele bubi akhaba babemeelesi bo mwami boosi nende buli mundu oli mu bwami bwa Ahuswero.

¹⁷ Sikila sikholwa sia Kwini Bashiti sino silamanyikhana khu bakhasi boosi mala sibakhole balekelesie baseecha babwe. Balaloma bali, ‘Omwami Ahuswero alaka Kwini Bashiti khukhwicha niio ali, mala aloba khukhwicha.’

¹⁸ Endaalo eya luno bakhasi ba Pasha ne ba Metia bauliilekho kimiima kia Kwini Bashiti, bacha khukiboolela babemeelesi bowo boosi. Liilekelesia ne libiyila bilabaao mu bukali.

¹⁹ Ne liaba ne likhusiimisia omwami, rusia lilaka lie bubwami, mala liaandikwe mu malaka ka Pasha ne Medesi, nio lilekhe khukaluukhasibwa tawe. Lekha liaandikwe lili Bashiti se akhoyela abonekhekho ebweeni wo mwami tawe. Ne omwami akhoya aelesie omukhasi okundi luyali lwe khuba omukhasi owo mwami khukhila Bashiti.

²⁰ Nga lilaka lio mwami ne lilamanyikhana mu bwami bwewe bubalaayi buno, bakhasi boosi bacha khuba ne liria khu baseecha babwe, akhaba ne bali baiinda namwe bataambi.”

²¹ Likaambila lino liasiimisia omwami ne babemeelesi bewe. Nio omwami akhola nga Memukani ne omukelekela.

²² Aruma chibarwa khu ngoongo che bubwami choosi. Buli lukoongo lwanyoola ebarwa yalwo mu lulomo lwabwe. Chibarwa chaloma chili buli museecha akhoyeele abe omwami owe mungo mwewe.