Bal. 1 - EBIBILIA ENDAKATIFU

Chimbosio chichosibwa chimuufu

¹ Wele Omunyali Owa Bioosi aalanga Musa mala amulomalomakho khukhwama mu liiema lie kumuse, amuboolela ali,

² “Boolela babaandu ba Isiraeli oli, omundu yesi yesi khwinywe aba ne areera siianwa khu Wele Omunyali Owa Bioosi, akhoya areera embosio yewe khukhwama mu lituuli liewe lie chikhaafu namwe lie bibiaayo.

³ Embosio yewe yaaba neli eye khukhwosia khukhwama mu lituuli liewe, khukhwola ebe euunwa ekhalimo bubi tawe. Akhoya akiaanile amuliango kwe liiema lie kumuse, nio afukiililwe ebweeni wa Wele Omunyali Owa Bioosi.

⁴ Alara kumukhono kwewe khumurwe kwe mbosio eye khukhwosia, mala elafukiililwa nga embosio emalao bubwoni bwewe.

⁵ Nio aleera euunwa eyo ebweeni wa Wele Omunyali Owa Bioosi, ne bokhwa Aruni basaayi, balaana kamalasile khu Mwami. Bakhoya baanye kamalasile ne babotookhelesia khu ndulo khwe alutare eli amuliango kwe liiema lie kumuse.

⁶ Ne omundu oaana embosio eyo akhoya akibaake mala akitonyemo.

⁷ Ne bokhwa Aruni omusaayi balanja chiikhu chiloondekhane bulayi khu alutare mala babwaane kumulilo khu alutare.

⁸ Ne ba okhwa Aruni basaayi chana bakhare bitonyi bie chinyama, kimirwe ne kiminawa, khukhu chiili khu mulilo khu alutare.

⁹ Ne kakhali bie munda ne bileenge bikhoya bisiingwe. Ne omusaayi aloselia embosio yoosi khu alutare, nga embosio eye khukhwosia. Eyino eli embosio eye khukhwosia eaanwa ne kumulilo, ne khuunya khwayo khulayi khusiimisia Wele Omunyali Owa Bioosi.

¹⁰ “Ne kaaba bali omundu aana siianwa siewe sie khukhwosia khu khwama mu makheese, namwe mu mbusi, akhoya aane endurume namwe limiiku likhalimo bubi tawe.

¹¹ Alaliirira ebunaswa we alutare ebweeni wa Wele Omunyali Owa Bioosi. Ne ba okhwa Aruni, basaayi balaanyaka kamalasile kabotookhelele alutare.

¹² Ne omundu oyo alakitonya bitonyi, ne omusaayi alabira sitube alala ne kumurwe ne kiminawa khukhu chiburukha khu alutare.

¹³ Ne kakhali omundu oaana alasiinga bie munda ne bileenge.Ne omusaayi alaana embosio emuufu, mala akioselie khu alutare, eyino eli embosio eye khukhwosia, ne khuunya khwayo khulayi khusiimisia Wele Omunyali Owa Bioosi.

¹⁴ “Kaaba bali siianwa siewe khu Wele Omunyali Owa Bioosi sili sie khukhwosia chinyuni, akhoya aane kamabongobongo namwe kamauusi kamaana.

¹⁵ Ne omusaayi alalireera khu alutare mala atile kumurwe aborosie ne khulioselia khu alutare. Ne kamalasile kaalio koosi kache khu ndulo khwe alutare.

¹⁶ Alenyosiakho lisakhilo ne bibiindu bilimo mala abichukhe ebukwe we alutare, abuundu nio bachukhanga likokhe.

¹⁷ Akhoya alitiile chindaa mala aliswabulemo, ne kakhali akhalikabukhaniamo tawe. Ne omusaayi alalioselia khu alutare, khukhu chili khu mulilo. Esino sili sianwa sie khukhwosia, khuunya khulayi khusiimisia Wele Omunyali Owa Bioosi.”