Simuluho 1 - Bibele ye Kenile (Catholic Edition)

Ku bupwa kwa lifasi

¹ Mulimu a kala ku bupa lihalimu ni lifasi ni ze ku zona kaufela.

² Lifasi ne li si na sibupeho. Lififi ne li kwahezi liwate le lituna, mi moya o maata n'o fuka fahalimw'a mezi.

³ Cwale Mulimu a laela, a li, “Liseli a li be teñi.” Mi kwa ba ni liseli.

⁴ A li talima, mi la mu tabisa. Kiha s'a kauhanya liseli ni lififi.

⁵ Liseli a li biza Musihali, mi lififi a li biza Busihu. Manzibwana a fela, mi kwa taha kakusasana. Leo la ba lizazi la pili.

⁶ Mulimu a laela hape, a li, “Ku be ni mbyumbyulu ye ka kauhanya mezi, kuli a be mwa libaka ze peli ze kauhani.” Mi kwa ezahala cwalo.

⁷ Cwale Mulimu a eza mbyumbyulu ku kauhanya mezi a kwatas'a yona ni mezi a fahalimw'a yona.

⁸ Mbyumbyulu a i biza Lihalimu. Manzibwana a fela, mi kwa taha kakusasana. Leo la ba lizazi la bubeli.

⁹ Mulimu hape a laela, a li, “Mezi a mwatas'a lihalimu a kubukane mwa sibaka si li siñwi kuli ku bonahale mubu o omile.” Mi kwa ezahala cwalo.

¹⁰ A biza mubu Lifasi, mi mezi a n'a kubukani mwa sibaka si li siñwi, a li ki Liwate. A talima z'a ezize, mi za mu tabisa.

¹¹ A laela hape, a li, “Mubu u melise mishobo kaufela ya limela, ze beya bubeke ni ze beya miselo. Mi kwa ezahala cwalo.

¹² Cwale mubu wa melisa limela kaufela ka mifuta ya zona, ze beya bubeke ni ze beya miselo. Mulimu a talima z'a ezize, mi za mu tabisa.

¹³ Manzibwana a fela, mi kwa taha kakusasana. Leo la ba lizazi la bulalu.”

¹⁴ Cwale Mulimu a laela, a li, “Ku be ni maseli kwahalimu, ku kauhanya musihali kwa busihu, ili ku bonisa mazazi, lilimo, ni linako za miyaha fo li kalela.

¹⁵ Li ta benya kwahalimu ku tisa liseli fafasi.” Mi kwa ezahala cwalo.

¹⁶ Cwale Mulimu a eza maseli a mabeli a matuna, ili lizazi kuli li buse musihali ni kweli kuli i buse busihu. Mi a eza hape ni linaleli.

¹⁷ A beya maseli ao kwahalimu ku bonisa fafasi.

¹⁸ A a beya hape ku busa musihali ni busihu, ni ku kauhanya liseli kwa lififi. A talima z'a ezize, mi za mu tabisa.

¹⁹ Manzibwana a fela, mi kwa taha kakusasana. Leo la ba lizazi la bune.

²⁰ Mulimu cwale a laela, a li, “Mezi a tise ze pila ka mifuta ya zona kaufela, ni linyunywani ze fufa mwa mbuyumbyulu.” Mi kwa ezahala cwalo.

²¹ Mulimu kih'a eza libilimita ni libupiwa ze zamaya ka mba ni mifuta-futa ya ze pila mwa mezi kaufela ni linyunywani kamukana ka mifuta ya zona. A talima z'a ezize, mi za mu tabisa.

²² Kih'a li tohonolofaza ka taelo ye, a li, “Ze pila mwa mezi kaufela li te li ate, li taze liwate, ni palo ya linyunywani i ekezehe.”

²³ Manzibwana a fela, mi kwa taha kakusasana. Leo la ba lizazi la buketalizoho.

²⁴ Cwale Mulimu a laela, a li, “Lifasi li tahise limunanu ka mifuta ya zona kaufela ni lifolofolo za mifuta-futa, ni libupiwa kaufela ze zamaya ka mba.” Mi kwa ezahala cwalo.

²⁵ Mulimu a eza limunanu ka mifuta ya zona, ni lifolofolo za mifuta-futa, ni libupiwa ze zamaya ka mba. A talima z'a ezize, mi za mu tabisa.

²⁶ Mulimu kih'a li, “Cwale, lu eze mutu ka siswaniso sa luna ni ka ku swana ni luna. A be ni maata fahalimw'a litapi, linyunywani, limunanu, lifolofolo ni libupiwa ze zamaya ka mba kaufela.”

²⁷ Cwalehe, Mulimu a bupa mutu ka siswaniso sa hae. A bupa munna ni musali.

²⁸ A ba tohonolofaza ka taelo ye, a li, “Mu pepe, mu ate, mi mu taze lifasi kaufela. Mu be ni maata fahalimw'a litapi ze mwa mezi, linyunywani, ni ze pila fafasi kamukana.”

²⁹ Mi Mulimu a li, “Bona, ni ku fa limela kaufela ze beya bubeke, ni miselo, kuli u li ce.

³⁰ Haili kwa lifolofolo ze tuna ni ze nyinyani ni kwa linyunywani kamukana, ni libupiwa ze zamaya ka mba, ni li fa bucwañi bo butala kuli i be lico za zona.” Mi kwa ezahala cwalo.

³¹ Mulimu kih'a talima z'a ezize, mi kwa mu tabisa hahulu. Manzibwana a fela, mi kwa taha kakusasana. Leo la ba lizazi la busilela.