Sililo 1 - Bibele ye Kenile (Catholic Edition)

Maswabi a Jerusalema

¹ Jerusalema, u siyezi cwañi u nosi, bo pili n'o tezi batu! U kile wa kutekiwa ki lifasi, kono cwale u swana ni mbelwa. Munzi o n'o kutekeha hahulu mwa minzi kaufela, cwale u wezi mwa butanga.

² U lila busihu kaufela. Mioko i shulumuka fa malama a hae. Ku ba ba kile ba mu lata, ha ku sa na ya siyalezi ku mu omba-omba. U betekilwe ki balikani ba hae, mi cwale kaufel'a bona se ba mu yemezi ka mahutu.

³ Batu ba Juda ki batanga ba ba si na tuso. Ba hapelelizwe ku zwa mwa hae. Ba pila mwa manaha a mañwi, ku si na sibaka se ba ka li ki sa bona, ba beilwe ki lila mwahali, ku si na mukwa wa ku banduka.

⁴ Ha ku na ya taha kwa Tempele cwale ku t'o lapela ka mazazi a lipumulo. Basizana ba ne ba opela mwateñi nako ye ba naynda, mi baprisita ba inezi ku tonga feela. Minyako ya munzi ya li ku atama mi Sione u mwa butata.

⁵ Lila za hae ba mu konile. U sa li mwa maata a bona. Muñ'a Bupilo u mu nyandiseza libi za hae ze ñata. Mane nihaili banana ba hapilwe mi ba isizwe kwahule.

⁶ Bunde bwa Jerusalema i se li nto ya kale. Baeteleli ba hae se ba swana ni lizwii le li saba bazumi, le li sa koni ku fumana mafulelo. Maata a bona a s'a felile.

⁷ Cwale s'e li litota. Jerusalema u hupula bunde bwa hae bwa kale. Ha s'a ngilwe ki lila, ne ku si na ya n'a ka mu tusa. Ba ba mu konile ba sehiswa ki ku tula kwa hae.

⁸ Likute la hae li felile. U s'a li mapunu mi s'a nyazisezwa. Wa tonga, mi ka maswabi u s'a ikwahela kwa meeto. Jerusalema u isilafalize ka sibi se si maswe.

⁹ Masila a hae n'a iponahaza, kono n'a sa isi pilu kwa bumai bwa bae. Ku wa kwa hae n'e li ko ku maswe. Ha ku na ya ka mu omba-omba. Lila za hae li mu konile, mi cwale u lapela Muñ'a Bupilo kuli a mu shemube.

¹⁰ Lila li mu amuhile bufumu bwa hae kamukana. U iponezi bona ha ba kena mwa Tempele, mo ne ku hanisizwe bazwahule ki Muñ'a Bupilo.

¹¹ Batu ba hae ba tonga ha ba bata sa ku ca. Bufumu bwa bona ba bu lekisa lico, kuli ba pile. Munzi wa lila, u li, “Muñ'a Bupilo, ni talime, u ni bone mwa manyando a ka.”

¹² “Ni talime,” u lilela ya fita kaufela. “H'a yo ya kile a utwa butuku bo ni utwa, butuku bo ni tiselizwe ki Muñ'a Bupilo ka nako y'a n'a nyandile.

¹³ “U shetumuzi mulilo o zwa kwahalimu, mulilo o cisa mwa mubili wa ka. U ni teezi siteo mi u ni wiselize fafasi. Cwale s'a ni tuhela, mi a ni siya mwa butuku bo bu sa feli.

¹⁴ “U ñozi libi za ka kaufela, mi u li tamelezi kulokulikuñwi. A ni yaweka zona mwa mulala mi na kala ku fokoliswa ki bukiti bwa zona. Mulena u ni kashelize kwa lila za ka mi ni ipumani ni si na tuso.

¹⁵ “Mulena u sehile masole ba ka kamukana ba batata hahulu. U lumelelize mpi ku t'o ni lwanisa, ni ku bulaya micaha ba ka. U pyatile batu sakata ba ka sina mo i pyatelwa miselo ya likota za veine.

¹⁶ “Kikabakaleo meeto a ka h'a cipita. H'a yo ya ka ni omba-omba. H'a yo ya ka ni tiisa pilu. Sila si lu honile. Ha ku sa na se si siyalezi batu ba ka.

¹⁷ “Ni otolola mazoho a ka, kono ha ku na ya ka ni tusa. Muñ'a Bupilo u ni bizelize lila kwa maneku kamukana. Ba ni eza sina nto ye tezi masila.

¹⁸ “Kono Muñ'a Bupilo u lukile, kakuli ha ni si ka mu utwa. Mu ni teeleze, mina batu kai ni kai ko mu li teñi. Mu ni talime mwa butuku bwa ka. Mitangana ni likalibe ba ka ba hapilwe.

¹⁹ “Ni bizize balikani ba ka, kono ba hanile ku ni tusa. Baprisita ni baeteleli ba shwezi mwa mikwakwa ya mwa hae, ba nze ba bata lico kuli ba pile.

²⁰ “Bona, Muñ'a Bupilo! U talime ñalelwa, u bone butuku bo bu mwa moya wa ka! Pilu ya ka i lobilwe ki maswabi kabakala libi za ka. Mwa mikwakwa ku na ni lipulao, mane ni mwa mandu ku na ni lifu.

²¹ “Teeleza sitongo sa ka. Ha ku na ya ni omba-omba. Lila za ka li tabile kakuli li ni tiselize manyando. Tisa lizazi l'o n'o sepisize. U nyandise lila za ka sina mo ni nyandela.

²² “Ba atule ka bumaswe bwa bona kaufela. Ba nate sina mo u ni natezi ka libi za ka. Ni tonga ni si na tabo, mi pilu ya ka i butuku.”