Obadia 1 - Bibele ye Kenile (Catholic Edition)

Ku kokobezwa kwa Edomo

¹ Ki a manzwi a mupolofita Obadia. Manzwi a bulezwi ki Muñ'a Bupilo ya Pahami ka za sicaba sa Edomo ki a. Muñ'a Bupilo u lumile numwana wa hae kwa licaba, mi lu utwile manzwi a hae, h'a li, “A mu tahe! Lu y'o lwanisa Edomo!”

² Muñ'a Bupilo u li kwa sicaba sa Edomo, “Ni ka ku eza yo munyinyani. Mañi ni mañi u ta ku nyefula.

³ U pumilwe ki buikuhumuso bwa hao. U pila mwa lukwakwa lwa macwe a tata. Munzi wa hao u fahalimw'a malundu a matelele, mi cwale u li, ‘Ki mañi ya ka kona ku ni zwisa fateñi?’

⁴ Niha u ka pahamisa hahulu munzi wa hao sina siyaleto sa mbande, kuli mane u bonahale inge o mwahal'a linaleli, nihakulicwalo ni ka ku kokobeza,” ku bulele Muñ'a Bupilo.

⁵ “Masholi ha ba taha busihu, ba nga feela ze ba bata. Batu ha ba kutula miselo ya veine, kamita ba siyanga ye miñwi. Kono lila za mina li mi falalize kamukana ku tokwa ni wa lubandangoti.

⁶ Isau, ba fumani bufumu bwa hao kamukana, mi ba bu ngelezi.

⁷ Ne u pumilwe ki balikani ba hao. Ki bona ba ba ku lelekisize mwa naha ya hao. Batu b'o n'o pila hande ka kozo ni bona, ki bona ba ba se ba ku hapile. Balikani b'o n'o canga ni bona, ki bona ba ba ne ba ku teezi katwa, mi ba se ba li, ‘Cwale butali bw'a n'a na ni bona bu kai?’ ”

⁸ Muñ'a Bupilo u li, “Ka zazi ni ka sinya Edomo, ni ka felisa cwalo ni litalifi za bona kamukana.

⁹ Batabani ba Tomani ba ka saba hahulu, mi mulwani kaufela ya mwa Edomo u ta bulaiwa.”

Mabaka a mulatu wa Edomo

¹⁰ “Kabakala ku amuha ni ku bulaya ba lusika lwa Jakobo, bana bahesu, u ka sinyiwa mi ha u na ku kutekwa kuya kuile.

¹¹ N'o yemi kwatuko, muta lila ze zwa kwahule li t'o lobaka minyako ya makwakwa a bona. N'o li ya maswe sina batu bao, ba ba ne ba zwa ku sili, ba ba ne ba ngile bufumu bwa Jerusalema ni ku ikabela bona.

¹² N'o sa lukeli ku tabela bumai bwa banabahenu ba mwa Juda. N'o sa lukeli ku ba ni tabo ka zazi la ziezi ya bona. N'o sa lukeli ku ba seha mwa manyando a bona.

¹³ N'o si na tukelo ya ku kena mwa munzi wa batu ba ka ku tabela manyando a bona ni ku nga bufumu bwa bona ka lizazi la ziezi ya bona.

¹⁴ N'o sa swaneli ku yema fa manganandila ni ku swala ba ba ne ba lika ku banduka. N'o si na swanelo ya ku ba neela kwa lila ka zazi la manyando a bona.”

Katulo ya licaba

¹⁵ “Lizazi li fakaufi leo na, Muñ'a Bupilo, ni ka atula macaba. Edomo, s'o ezize, si ka ezahala ku wena. U ka kutisezwa ka z'o ezize.

¹⁶ Batu ba ka ba keni mwa bumai bwa ku utwiswa butuku, fa lilundu la ka le li kenile. Kono macaba kamukana a ba beile mwahali a ta utwiswa butuku hahulu ku fita bwa bona. Ba ka natwa ka tata mane ba timele kamukana.”

Isilaele u tula lila

¹⁷ “Kono fa Lilundu la Sione ba bañwi ba ka banduka, mi i ka ba sibaka se si kenile. Batu ba Jakobo ba ka nga naha ye i li ya bona luli.

¹⁸ Batu ba Jakobo ni ba Josefa ba ka swana inge mulilo. Ba ka timeza ba Isau, sina mulilo o fa matakala. Ha ku na wa lusika lwa Isau ya ka banduka. Ku bulezi na, Muñ'a Bupilo.

¹⁹ “Maisilaele ba kwa Negeve ba ka nga Lilundu la Isau. Ba ba mwatas'a malundu a Juda ba ka hapa naha ya Mafilisita. Maisilaele ba ka nga naha ya Eferaimi ni ya Samaria. Batu ba Benjamine ba ka nga Giliadi.

²⁰ Mpi ya Maisilaele, ba ba ne ba hapilwe ki mibuso ya kwa mutulo, i ka tula naha ya Mafenesia ku ya kwa mutulo mane ku t'o fita ni kwa Zerafati. Ba ba ne ba hapilwe mwa Jerusalema ba ba li mwa Sardisi bona ba ka hapa minzi ya Negeve.

²¹ Batuli ba Isilaele ba ka kambamela fa Lilundu la Sione. Ba ka busa malundu a Edomo. Muñ'a Bupilo ki yena ya ka ba mulena.”