Mututo 1 - Bibele ye Kenile (Catholic Edition)

Maisilaele ba nyandiswa mwa Egepita

¹ Mabizo a bana ba Jakobo, b'a n'a ile ni bona kwa Egepita hamoho ni mabasi a bona, ki a.

² Ki Rubeni, Simioni, Livi, Juda,

³ Isakare, Zebuloni, Benjamine,

⁴ Dani, Nafetali, Gadi ni Asere.

⁵ Palo ya batu ba ba simuluhile ku Jakobo n'e li ba mashumi a supile. Josefa, yena n'a s'a ile kale mwa Egepita.

⁶ Josefa ni banabahabo kaufela ba shwa, hamohocwalo ni ba ba ne ba li teñi ka nako yeo.

⁷ Kono Maisilaele ne ba na ni bana ba bañata. Ba ata hahulu, ba ba ni maata, mi ba tala naha kaufela.

⁸ Kwa yola mulena yo munca mwa Egepita, ya n'a sa zibi se siñwi ka Josefa.

⁹ Cwale a li kwa batu ba hae, “Mwa bona batu ba, Maisilaele, ki ba bañata hahulu, mi hape ba na ni maata. Lu mwa kozi kabakala bona.

¹⁰ Cwalehe, mu ni teeleze! Lu swanezi ku ba eza ka butali kuli ba si ke ba ata hahulu ni ku fita. Ka nako ya ndwa, mwendi ba ka swana ba y'o kopana ni lila za luna ku lu lwanisa, kuli ba buse naha ya luna.”

¹¹ Cwale kiha ba beelwa bazamaisi kuli ba ba nyandise ka ku ba hapeleza ku eza misebezi ye tata. Maisilaele ba yahela Faro munzi wa Pitomi ni wa Ramisese, kuli i be mabulukelo a lico.

¹² Kono Maegepita niha ba ba nyandisa cwalo, bona Maisilaele kihona ba ata hahulu. Maegepita ba saba Maisilaele ni ku ba toya.

¹³ Ba ba hapeleza mwa manyando a butanga.

¹⁴ Bupilo bwa bona ba bu eza bo bu maswe ka misebezi ye tata ya lizupa ni sitina, ni ya mwa masimu. Ba ba hapeleza ku eza misebezi ye bukiti kamukana.

¹⁵ Cwale mulena wa Egepita a bulela ni basali ba ba pepisa, ba ba ne ba tusa basali ba Maheberu. Yo muñwi wa bona n'a bizwa Shifira, mi yo muñwi n'e li Pua.

¹⁶ A li ku bona, “Ha mu pepisa basali ba Maheberu, haiba mwana ki mushimani, mu mu bulaye, kono haiba ki musizana, mu mu tuhele a pile.”

¹⁷ Kono bapepisi bao ne ba saba Mulimu, mi ha ba si ka eza mw'a n'a batela mulena, mane ba tuhela ni bashimani ba pila.

¹⁸ Mulena a biza bapepisi, mi a ba buza, a li, “Kiñi ha mu ezize cwalo, ku pilisa ni bashimani?”

¹⁹ Ba alaba, ba li, “Basali ba Maheberu ha ba swani ni basali ba Maegepita. Ba pepa kapili, mane mupepisi a si ka fita kale, bona ki kale ba pepa.”

²⁰ Mulimu a eza bapepisi hande, mi Maisilaele ba zwelapili ku ata ni ku ba ni maata.

²¹ Kakuli bapepisi ne ba saba Mulimu, yena kiha s'a ba fa lusika.

²² Cwale Faro a laela batu ba hae kamukana, a li, “Bana ba Maheberu ba bashimani kaufela ba nepelwe mwa nuka, ku pile feela basizana.”