Mulao 1 - Bibele ye Kenile (Catholic Edition)

Mushe u kala ku talusa za musipili wa sicaba

¹ Buka ye i talusa litaba kaufela ze bulezwi ki Mushe kwa sicaba sa Isilaele ha ne si li mwa lihalaupa, ili kwa upa wa Nuka ya Jordani. Ne ba li mwa Libala la Jordani fakaufi ni Sufi. Munzi wa Parani n'o li kwa neku le liñwi la bona, mi minzi ya bo Tofele, Labani, Hazeroti, ni Di-Zahabi ne i li ku le liñwi.

² Musipili wa ku zwa kwa Lilundu la Sinai ku ya kwa Kadeshi-Baranea, ka nzila ya naha ya malundu ya Edomo, u nga mazazi a lishumi ka li li liñwi.

³ Ka lizazi la pili la kweli ya bulishumi ka i liñwi ya silimo sa bumashumi a mane, haisali ba zwa mwa Egepita, Mushe a bulelela batu litaba kaufela z'a n'a mu laezi Muñ'a Bupilo kuli a ba bulelele zona.

⁴ Fo ne li mwamulaho a ku tulwa kwa Mulena Sihoni wa Maamori, ya n'a busa mwa munzi wa Heshiboni, ni Mulena Ogo wa Bashani, ya n'a busa mwa minzi ya Ashitaroti ni Edirei.

⁵ Batu ha ne ba li kwa upa wa Nuka ya Jordani, mwa naha ya Moabi, Mushe a kala ku ba taluseza za milao ni lituto za Mulimu. A li,

⁶ “Ha ne lu li kwa Lilundu la Sinai, Muñ'a Bupilo, Mulimu wa luna, n'a ize, ‘Mu se mu inzi nako ye telele hahulu kwa lilundu le.

⁷ Mu yahulule mafulo, mi mu zwelepili. Mu ye kwa naha ya malundu ya Maamori ni mwa libaka kamukana mo ku pila ba ba bapani ni bona, ili kwa Musindi wa Jordani, kwa naha ya malundu ni linaha ze patami, kwa sibaka sa mboela ni kwa Liwate la Mediteranea. Mu ye kwa naha ya Kanana, mi mu y'o fita kwa Nuka ye tuna ya Yuferati.

⁸ Mu bone, yeo ki yona naha ye ne ni sepisize bo kukw'a mina bo Abrahama, Isaka ni Jakobo, ni baikulu ba bona, na, Muñ'a Bupilo. Mu ye, mu y'o yaha mwateñi.’ ”

Mushe u keta baatuli

⁹ Mushe a li, “Ka yona nako yani, ne ni mi bulelezi, na li, ‘Musebezi wa ku mi etelela ki o mutuna hahulu. Ha ni koni ku u eza ni li nosi.

¹⁰ Muñ'a Bupilo, Mulimu wa mina, u mi atisize sina linaleli za kwahalimu.

¹¹ Muñ'a Bupilo, Mulimu wa bo kukw'a mina, a ekeze palo ya mina ka bo lule-lule, ni ku kondisa za mina sina mw'a n'a sepiselize!

¹² Kono na, ni li nosi, ni ka kona cwañi ku lwala musebezi o bukiti cwalo wa ku n'o mi atulanga mwa lifapahano za mina?

¹³ Mu kete mwa lusika lo luñwi ni lo luñwi banna ba bañwi ba ba na ni butali, kutwisiso, ni temuho ya bupilo, mi ni ka ba toma kuli ba mi zamaise.’

¹⁴ Mi ne mu lumezi cwalo kuli wo ne li muhupulo o munde o n'o lukela ku latelelwa.

¹⁵ Cwale ni ngile baeteleli ba ba butali ni ba ba na ni zibo, be ne mu ketile mwa masika a mina, mi ni ba beile fahalimw'a mina. Ba bañwi ne ba zamaisa batu ba ba eza sikiti, ba bañwi mwanda, ba bañwi lishumi feela. Hape ni ketile manduna ba bañwi mwa masika kamukana.

¹⁶ “Ka yona nako yeo, na ba laela, na li, ‘Mu teeleze hande kwa likañi ze taha mwahal'a batu ba mina. Mu atule taba ni taba ka swanelo, i ka ba ye ama batu ba mina feela, kamba ni bona balicaba ba ba pila mwahal'a mina.

¹⁷ Mu si ke mwa bonisa sobozi mwa likatulo za mina. Mu atule mutu ni mutu ka mukwa o swana, i ka ba ufi kamba ufi. Mu si ke mwa saba mutu ni yo mukana, kakuli likatulo ze mu atula, li zwa ku Mulimu. Haiba taba i ba tata hahulu ku mina, mu i tise ku na, mi ni ka t'o i atula.’

¹⁸ I sa li ka yona nako yeo ni mi file litaelo bakeñisa linto kamukana ze ne mu na ni ku eza.

Matwela a lumilwe kwa Kadeshi-Baranea

¹⁹ “Lu ezize se ne lu laezwi ki Muñ'a Bupilo, Mulimu wa luna. Lu zwile kwa Lilundu la Sinai, mi lu fitile mwa lihalaupa le lituna, le li sabisa, lu nze lu libile kwa malundu a naha ya Maamori. Lwa fita kwa Kadeshi-Baranea.

²⁰ Kiha ni mi bulelezi kuli, ‘Cwale, mu se mu fitile kwa naha ya malundu ya Maamori, y'a lu fa Muñ'a Bupilo, Mulimu wa luna.

²¹ A mu bone, ki ye naha y'a mi fa Muñ'a Bupilo, Mulimu wa bo kukw'a mina. Mu ye, mu y'o pila mwateñi sina mw'a mi laelezi. Mu si ke mwa saba kamba ku zwafa.’

²² “Kono mina mu tile ku na, mi mwa li, ‘A lu lume banna, ba itangete, ba y'o bona mo i inezi naha yeo, mi ba lu zibise nzila ye lu lukela ku ya ka yona, ni kuli minzi ya mwateñi i cwañi.’

²³ “Kwa bonahala kuli n'e li muhupulo o munde, mi kiha ni keta banna ba lishumi ka ba babeli, ili mutu a li muñwi mwa lusika lo luñwi ni lo luñwi.

²⁴ Ba ya mwa naha ya malundu, mane ba y'o fita kwa Libala la Eshikoli, mi ba li tatuba.

²⁵ Ba nga miselo ye miñwi mwateñi, mi ba i tisa ku luna. Kiha ba lu bulelela kuli naha y'a n'a lu fa Muñ'a Bupilo, Mulimu wa luna, i n'e nunile hahulu.

²⁶ “Kono mwa fetuhela taelo ya Muñ'a Bupilo, Mulimu wa mina, mi mwa hana ku kena mwa naha yeo.

²⁷ Mwa bilaela mwahal'a mina, mwa li, ‘Muñ'a Bupilo u lu toile. Kikabakaleo h'a lu zwisize mwa Egepita ku t'o lu fa Maamori ba, kuli ba lu bulaye.

²⁸ Lu yelañi kwateñi? Lwa saba. Banna be ne lu lumile, ba lu bulelezi kuli batu ba mwateñi ba na ni maata, mi ki ba batelele ku fita luna. Ba li ba pila mwa minzi ye mwa makwakwa a matelele a y'o fita kwahalimu. Hape ba il'o bona lingangalume kwateñi.’

²⁹ “Kono na mi bulelela, na li, ‘Mu si ke mwa saba batu bao.

³⁰ Muñ'a Bupilo, Mulimu wa mina, u ta mi etelela, mi u ta mi lwanela, sina ha mu boni mw'a ezelize mwa Egepita.

³¹ Mu boni ni mwa lihalaupa cwalo. Mu boni mw'a mi tiselize kwanu, ni mw'a mi zamaiselize mwa nzila kaufela, mane ku t'o fita mwa sibaka se. U mi babalezi sina mushemi ya lwezi mwan'a hae wa mushimani.’

³² Niha ni mi bulelezi zeo, ni teñi mwa hana ku sepa Muñ'a Bupilo,

³³ Kono ni cwale n'a mi etelela kamita ku mi fumanela matibelelo. Ka nako ya busihu n'a mi etelela ka liseli la mulilo, mi ka nako ya musihali n'a mi bonisa nzila ka lilu.

Mulimu u fa Maisilaele mulatu

³⁴ “Muñ'a Bupulo a mi utwa mu nze mu bilaela, mi a nyema. A konka, a li,

³⁵ ‘Ha ku na wa ku mina, ba lusika lo, lo lu maswe, ya ta kena mwa naha ye nunile ye ni sepisize bo kukw'a mina.

³⁶ Haisi Kalebu mwan'a Jefune, ki yena feela ya ta kena ku yona. U sepahalile ku na, mi ni ka fa yena ni baikulu ba hae naha y'a il'o twela.’

³⁷ Kabakala mina, Muñ'a Bupilo u ni nyemezi ni na, mi u ize, ‘Nihaili wena Mushe, ha u na ku kena mwa naha yeo.

³⁸ Kono mutusi wa hao, Joshua mwan'a Nuni, yena u ta y'o kena mwateñi. Tiisa Joshua pilu, kakuli ki yena ya ta etelela Maisilaele, mane ba y'o yaha mwa naha yeo.’

³⁹ “Cwale Muñ'a Bupilo a li ku luna kaufela, ‘Bana ba mina ba ba sa li ba banyinyani, ba ba si ka ba kale ni ngana ya ku keta bunde kwa bumaswe, ba ta kena mwa naha, ili bona bana ba mina luli be ne mu li ba ka hapiwa ki lila za mina. Ni ta ba fa yona, mi ba ta yaha mwateñi.

⁴⁰ Kono haili ka mina batu, mu kute, mu ye mwa lihalaupa ka nzila ye ya kwa Liwate le Lifubelu.’ ”

Ku tulwa kwa Isilaele kwa Horoma

⁴¹ “Mwa alaba, mwa li, ‘Mushe, lu foselize Muñ'a Bupilo. Kono cwale lu ta y'o lwana, sina mw'a lu laelezi Muñ'a Bupilo, Mulimu wa luna.’ Cwale yo muñwi ni yo muñwi wa mina a itukiseze ku y'o lwana, a nz'a hupula kuli ku ta ba bunolo ku hapa naha yeo ya malundu.

⁴² “Kono Muñ'a Bupilo a li ku na, ‘U ba lemuse kuli ba si ke ba y'o lwanisa lila za bona kakuli ha ni na ku ba tusa, mi ba ta tulwa ki zona.’

⁴³ Na mi zibisa s'a n'a bulezi Muñ'a Bupilo, kono ha mu si ka isa pilu kwateñi. Mu mu fetuhezi, mi ka buikuhumuso bwa mina mwa ya mwa naha ya malundu.

⁴⁴ Cwale Maamori ba ba ne ba pila mwateñi ba mi tela sina limuka. Ba mi lelekisa, mi ba y'o mi tula ha mu li kwa Horoma, mwa naha ya malundu ya Edomo.

⁴⁵ Mwa itilelela ku Muñ'a Bupilo kuli a mi tuse, kono a hana ku mi teeleza kamba ku isa pilu ku mina.

⁴⁶ Kikabakaleo ha ne mu tamehile ku ina mwa Kadeshi nako ye telele cwalo.