Mubuleli 1 - Bibele ye Kenile (Catholic Edition)

Bupilo ha bu na tuso

¹ Ki a manzwi a Mubuleli, mwan'a Davida, ya n'a li mulena mwa Jerusalema.

² Mubuleli a li, “Ha ku na tuso! Ha ku na tuso! Bupilo ha bu na tuso. Lika kaufela ha li na tuso.

³ Niha u ka sinya bupilo bwa hao kamukana u nz'o sebeza ka tata, s'o ta bonisa ka musebezi wo ki sifi?

⁴ Masika a, a taha mi ani a ya, kono lifasi li siyala hona cwalo mo ne li inezi.

⁵ Lizazi li sa pazula, mi li sa likela. Li ya li katezi ko li swanezi ku y'o kala sinca hape.

⁶ Moya u fukela mwa mboela, u ya mutulo, wa potoloha-potoloha mi wa kuta hape.

⁷ Nuka ifi kamba ifi i bubela mwa liwate, kono liwate ha li tali. Mezi a kutela ko li kalela linuka, mi hape a y'o kala sinca ku buba.

⁸ Linto kaufela li isa kwa mukatala, ili mukatala o mutuna o sa konwi ku taluswa ka manzwi. Meeto a luna h'a kuliswi ki s'a bona. Lizebe za luna ha li kuliswi ki ze li utwa.

⁹ Se si ezahalile pili si ta ezahala hape. Se ne si ezizwe pili si ta kutela ku eziwa. Mwa lifasi kamukana ha ku na se sinca.

¹⁰ Ba li, ‘A mu bone! Nto ye ñwi ye nca ki ye!’ Batili. N'e se i ezahlile pili, kale lu si ka pepwa.

¹¹ Ha ku na ya hupula ze n'e ezahalile mwa linako ze felile, ni mwa mazazi a taha ha ku na ya ta hupula ze ta ezahala, hona cwale fa ni ze tatama.

Temuho ya Mubuleli

¹² Na, Mubuleli, ne ni li mulena wa Isilaele mwa Jerusalema.

¹³ Ni itukiseza ku tatuba ni ku ituta lika kamukana ze eziwa mwa lifasi mo. Mulimu u lu file musebezi o tata, o sa tabisi.

¹⁴ Ni boni lika kamukana ze eziwa mwa lifasi le, mi na mi bulelela, kaufela zona ha li na tuso. Ku swana ni ku lelekisa moya.

¹⁵ Ha u koni ku otolola se si kopami. Ha u koni ku bala lika ze siyo.

¹⁶ Na ipulelela, na li, “Ni se ni li mutu yo mutuna, ya butali hahulu ku fita mañi ni mañi ya kalile ku busa Jerusalema pili na ni si ka busa kale. Ni ziba hande-nde mo bu inezi butali ni zibo.”

¹⁷ Ne ni itukiselize ku ziba fapahano mwahal'a zibo ni bukuba, butali ni bupulumuki. Kono na lemuha kuli mwendi ni ka swana ni lelekisa moya.

¹⁸ U sa ba ni butali bo butuna hahulu feela, u tahelwa ki lipilaelo ze ñata. Ha u ziba hahulu, u ta utwa butuku hahulu.