Mika 1 - Bibele ye Kenile (Catholic Edition)

¹ Buka ye i bulukile manzwi a Muñ'a Bupilo a n'a file Mika wa Moresheti, ka nako yeo Jotami, Akazi, ni Ezekiasi ha ne ba li malena ba Juda. Muñ'a Bupilo a sinulela Mika litaba ze za Samaria ni Jerusalema.

Sililo sa Samaria ni Jerusalema

² A mu utwe se, mina macaba kaufela. Mu teeleze taba ye, mina kamukana ba ba pila mwa lifasi! Muñ'a Bupilo ya Pahami u ka ipakela ili yena ka za bumaswe bwa mina. Mu teeleze! Mulimu u bulela, a li mwa tempele ya hae ya kwa lihalimu.

³ Muñ'a Bupilo wa taha ku zwa mwa sibaka sa hae se si kenile. U ka taha fafasi, a t'o zamaya fahalimw'a malundu.

⁴ Cwale malundu a ka sheungunuka mwatas'a hae sina bulota bo bu fa mulilo. U ka bubela mwa musindi sina mezi a zwa mwa lilundu.

⁵ Ze kamukana li ka ezahala kabakala kuli batu ba Isilaele ba fosize mi ba fulalezi Mulimu. Ki mañi ya ka nyazwa ka za petuhelo ya Isilaele? Batu ba Samaria! Ki mañi ya mulatu wa bulapeli bwa milimu ya buhata mwa Juda? Ki batu ba Jerusalema!

⁶ Cwale Muñ'a Bupilo u li, “Ni ka eza Samaria tutuma ya macwe a mwa libala, i be sibaka sa ku cala likota za veine. Ni ka sululela macwe a n'a li a miyaho ya muleneñi mwa libala, ni ku siya mitomo ya muleneñi fo ku sweu feela.

⁷ Lika kaufela ze ne li filwe kwa mahule ba tempele za sinyiwa ka mulilo. Milimu ya bona ya maswaniso i ka ba libunda le li si na tuso. Samaria n'a fumile ka ku itusisa lisebelezo za ku kupa milimu kuli limunanu za bona li zwale hahulu ni limela li konde. Cwale lila za bona li ka nga bufumu bwa bona bo kwa mahule ba litempele ku sili.”

⁸ Cwale Mika a li, “Kabakala nto ye ni ka silisa ni ku lila. Ni ka zamaya mapunu, ni ku zamaya mahutu fande, ili ku bonisa maswabi a ka. Ni ka huhula sina luwawa ni ku lila sina mpye.

⁹ Mañiba a Samaria h'a konwi ku alafiwa. Juda ni yena s'a bata ku kula mañiba a swana. Manyando a se a fitile kwa minyako ya Jerusalema kasibili, mo ku pila batu ba ka.”

Lila li atumela Jerusalema

¹⁰ Mu si ke mwa bulelela batu ba Gati mo lu tulezwi. Mu si ke mwa ba tuhela ba mi bona ha mu lila. Mu bonise ku felelwa ki sepo kwa mina mwa munzi wa Afira.

¹¹ Batu ba Shapi ba hapiwa, ba mapunu mi ba swabile. Ba ba pila mwa Zaanani ha ba na ku zwa mwateñi ba nze ba pila. Ha mu ka utwa ba Betezele ba silisa, mu zibe kuli ha ku na masabelo mwateñi.

¹² Batu ba Maroti ba minyaukiswa ki butuku. Ba tokwa tuso, kakuli Muñ'a Bupilo s'a tisize kozi fakaufi ni Jerusalema.

¹³ Mina, ba ba pila mwa Lakishi, mu pane lipizi za mina kwa likoloi. Mu likanyisize bumaswe bwa Isilaele, mi cwale mu fosisize Jerusalema.

¹⁴ Mi cwale, mina batu ba Juda, mu laeze munzi wa Moresheti Gati. Malena ba Isilaele ha ba na ku fumana tuso kwa munzi wa Akizibi.

¹⁵ Batu ba Maresha, Muñ'a Bupilo u li u ka mi neela kwa sila se si ka nga munzi wa mina. Mulena wa Isilaele u ka y'o ipata mwa liñope la licwe kwa Adulamu.

¹⁶ Batu ba Juda, mu ikute milili, mi mu silise bana bo mu lata. Mu ikeze litenda sina manoñu, kakuli bana ba, ba ka zwiswa ku mina.